സാഫ് കപ്പ് ഫുട്ബോള് ടൂര്ണമെന്റില് ആദ്യ ജയം ശ്രീലങ്കയ്ക്ക്
സാഫ് കപ്പ് ഫുട്ബോള് ടൂര്ണമെന്റില് ആദ്യ ജയം ശ്രീലങ്കയ്ക്ക്. തിരുവനന്തപുരം കാര്യവട്ടം രാജ്യാന്തര സ്റ്റേഡിയത്തില് മറുപടിയില്ലാത്ത ഒരുഗോളിന് നേപ്പാളിനെ പരാജയപ്പെടുത്തി. കളിതീരാന് നിമിഷങ്ങള് ബാക്കിനില്ക്കെ ശ്രീലങ്കയ്ക്കുവേണ്ടി മുഹമ്മദ് റിഫ്നാസാണ് ഗോളടിച്ചത്.
കളിച്ചതുമുഴുവന് നേപ്പാള് പക്ഷേ ജയിച്ചത് ശ്രീലങ്ക. അതാണ് പതിനൊന്നാമത് സാഫ് കപ്പ് ഫുട്ബോളിന്റെ ആദ്യ ദിനത്തിന്റെ സവിഷേത. ഭാഗ്യത്തിന്റെ കൂടി പിന്ബലത്തില് വിജയത്തോടെ തുടങ്ങിയ ലങ്കയ്ക്ക് മുന്നു പോയിന്റായി
മുന് ചാംപ്യന്മാരായ ലങ്കയെ വെള്ളം കുടിപ്പിക്കുന്ന പ്രകടനമാണ് നേപ്പാള് കാഴ്ചവച്ചത്. ചെല്സിയുടെ റിസര്വ് ടീം ട്രയല്സിലേക്ക് തിരഞ്ഞെടുക്കപ്പെട്ട് നാലു മാസം ഇംഗ്ളണ്ടില് പരിശീലിച്ചതിന്റെ മികവു മുഴുവന് പുറത്തെടുക്കുകയായിരുന്നു ഫോര്വേര്ഡില് ക്യാപ്റ്റന് അനില് ഗുരുങ്.
നേപ്പാളിലെ മനംഗ് മാര്ഷ്യാങ്ഡി ക്ളബിനു കളിക്കുന്ന അനില് ഗുരുങിന്റെയും മിഡ്ഫീല്ഡര് ഹേമങ് ഗുരുങ്ങിന്റെ നീക്കങ്ങളിലായിരുന്നു നേപ്പാളിന്റെ മുന്നേറ്റം. ലങ്കന് പ്രതിരോധ നിരയിലൂടെ ഇരുവരും തുളച്ചുകയറിയെങ്കിലും ഗോളുകള് മാത്രം പിറന്നില്ല.
പ്രതിരോധത്തിലും മധ്യനിരയിലും നാലു പേരുമായി നേപ്പാള് കളം നിറഞ്ഞപ്പോള് ഒറ്റ ഫോര്വേര്ഡിനെ മാത്രം ഇറക്കിയുള്ള ലങ്കന് കോച്ച് കൊളോനാഗെ പെരേരയുടെ തന്ത്രങ്ങള് പിഴച്ചു.
അനില് ഗുരുങിന്റെ മുന്നേറ്റം തടഞ്ഞ ലങ്കയുടെ ഹക്കീം ആദ്യ പകുതിയില് മഞ്ഞക്കാര്ഡ് കണ്ടു. നേപ്പാളിന്റെ ഉറച്ചഗോള് ലങ്കന് ഗോളി ഡോണ് സുജന് പെരേര തടുത്തു.
ഇരു ടീമുകളുടെയും ജഴ്സി നിറങ്ങള് ഏതാണ്ട് ഒന്നു പോലെയായതിനാല് ആകെ ആശയക്കുഴപ്പമായിരുന്നു ഗ്രൗണ്ടില്. രണ്ടാം പകുതിയില് നേപ്പാള് ജഴ്സി മാറ്റി നീലയാക്കി. അതിനിടെ സംഘാടത്തിലെ പിഴവുകള് കളിതുടങ്ങിയിട്ടും പരിഹരിച്ചിട്ടില്ല. ഉദ്ഘാടന മല്സരം മൂന്നരയ്ക്കാണെന്ന അറിയിച്ചിരുന്നു. പക്ഷേ അവസാന നിമിഷം ആറയിലേക്ക് മാറ്റി. ഒഴിഞ്ഞ ഗ്യാലറികള്ക്കു മുന്നിലാണ് ടൂര്ണമെന്റ് നടക്കുന്നത്.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha