നാലു മിനിറ്റിനിടെ ഇരട്ടഗോളുമായി വിനീത്; കേരള ബ്ലാസ്റ്റേഴ്സിന് ഗംഭീര വിജയം; 10 മല്‍സരങ്ങളില്‍നിന്ന് 15 പോയിന്റുമായി ബ്ലാസ്‌റ്റേഴ്‌സ് രണ്ടാം സ്ഥാനത്തേക്ക്
ഇരട്ടഗോളുകളുമായി സികെ വിനോദ് കളം നിറഞ്ഞപ്പോള്‍ ചെന്നൈയിന്‍ എഫ്‌സിക്കെതിരെ കേരളാ ബ്ലാസ്റ്റേഴ്സിന് തകര്‍പ്പന്‍ ജയം. ഒന്നിനെതിരെ മൂന്നു ഗോളുകള്‍ക്കായിരുന്നു ബ്ലാസ്‌റ്റേഴ്‌സിന്റെ വിജയം. ചെന്നൈയിന്‍ ക്യാപ്റ്റന്‍ ബെര്‍നാര്‍ഡ് മെന്‍ഡ് നേടിയ ഗോളിന് ആദ്യപകുതിയില്‍ പിന്നിലായിരുന്ന ബ്ലാസ്‌റ്റേഴ്‌സ് രണ്ടാം പകുതിയില്‍ മൂന്നു ഗോളുകള്‍ തിരിച്ചടിച്ചാണ് വിലയേറിയ മൂന്ന് പോയിന്റ് പോക്കറ്റിലാക്കിയത്. 85, 89 മിനിറ്റികളിലായിരുന്നു വിനീതിന്റെ ഗോളുകള്‍. ബ്ലാസ്‌റ്റേഴ്‌സിന്റെ ആദ്യഗോള്‍ ദിദിയര്‍ കാഡിയോ (66) നേടി.
സീസണിലെ നാലാം വിജയത്തോടെ 10 മല്‍സരങ്ങളില്‍നിന്ന് 15 പോയിന്റുമായി ബ്ലാസ്‌റ്റേഴ്‌സ് രണ്ടാം സ്ഥാനത്തേക്ക് കയറി. ഒന്‍പത് മല്‍സരങ്ങളില്‍നിന്ന് 10 പോയിന്റുള്ള ചെന്നൈയിന്‍ എഫ്‌സി ഏഴാം സ്ഥാനത്ത് തുടരുന്നു. സീസണില്‍ രണ്ടാം മല്‍സരം മാത്രം കളിച്ച സി.കെ.വിനീത് മൂന്നു ഗോളോടെ ടോപ്‌സ്‌കോറര്‍മാരുടെ പട്ടികയിലും സാന്നിധ്യമറിയിച്ചു. ചെന്നൈയില്‍ മുന്‍പ് ഇരുടീമുകളും മുഖാമുഖമെത്തിയ മല്‍സരത്തിനുശേഷം ബ്ലാസ്‌റ്റേഴ്‌സ് താരങ്ങളോട് അപമര്യാദയായി പെരുമാറിയ ചെന്നൈയിന്‍ പരിശീലകന്‍ മറ്റെരാസിക്കുള്ള മറുപടി കൂടിയായി ഈ വിജയം. ഒപ്പം, ബ്ലാസ്‌റ്റേഴ്‌സ് താരങ്ങളെ അപമാനിച്ച മറ്റെരാസിക്കെതിരെ വൈകാരികമായി പ്രതികരിച്ച ആരാധകര്‍ക്കുള്ള സമര്‍പ്പണവും.
സീസണിലാദ്യമായി ആദ്യ ഇലവനില്‍ കളിക്കാനെത്തിയ വിനീതും ആദ്യപകുതിയില്‍ തീര്‍ത്തും നിരാശപ്പെടുത്തി. എന്നാല്‍ രണ്ടാം പകുതിയില്‍ കളി മാറി. ചോപ്രയ്ക്ക് പകരം ദിദിയര്‍ കാഡിയോയേയും റഫീഖിന് പകരം റിനോ ആന്റോയേയും ഇറക്കാനുള്ള കോച്ച് സ്റ്റീവ് കോപ്പലിന്റെ തീരുമാനവും മല്‍സരഫലത്തില്‍ നിര്‍ണായകമായി. കാഡിയോ എത്തിയതോടെയാണ് ബ്ലാസ്റ്റേഴ്സിന് മല്‍സരത്തിലാദ്യമായി മേധാവിത്വം ലഭിച്ചത്. അലകടലായെത്തിയ മുന്നേറ്റങ്ങള്‍ക്കൊടുവിലായിരുന്നു കാഡിയോയിലൂടെ ബ്ലാസ്‌റ്റേഴ്‌സിന്റെ ആദ്യഗോള്‍. എഎഫ്‌സി കപ്പിനുശേഷം തങ്ങള്‍ തിരിച്ചെത്തുന്നതും കാത്തിരുന്ന ആരാധകര്‍ക്കായി വിനീത് ഇരട്ടഗോളും നേടിയതോടെ മല്‍സരം ബ്ലാസ്റ്റേഴ്സിന്.
ചെന്നൈയിന്‍ എഫ്‌സിയുടെ ഗോള്‍: 22ാം മിനിറ്റില്‍ ചെന്നൈയിന്‍ ആദ്യ വെടിപൊട്ടിച്ചു. റാഫേല്‍ അഗസ്‌റ്റോയില്‍നിന്നും പന്ത് സ്വീകരിക്കുമ്പോള്‍ മധ്യവരയ്ക്ക് സമീപത്തായിരുന്നു ചെന്നൈയിന്‍ ക്യാപ്റ്റന്‍. ബ്ലാസ്‌റ്റേഴ്‌സ് പ്രതിരോധത്തിലെ കരുത്തരെല്ലാം മുന്നില്‍നില്‍ക്കുമ്പോള്‍ പന്തുമായി മെന്‍ഡിയുടെ മുന്നേറ്റം. മെന്‍ഡി കയറിയെത്തുന്നതിനനുസരിച്ച് പിന്നോട്ടിറങ്ങിയ ബ്ലാസ്‌റ്റേഴ്‌സ് പ്രതിരോധത്തിന് പിഴച്ചു. ബോക്‌സിലേക്ക് കടന്ന മെന്‍ഡി പോസ്റ്റ് ലക്ഷ്യമാക്കി ഷോട്ട് തൊടുത്തു. ബ്ലാസ്‌റ്റേഴ്‌സ് ക്യാപ്റ്റന്‍ ഹെങ്ബാര്‍ത്തിന്റെ ദേഹത്ത് തട്ടിയ പന്ത് ചെറിയൊരു ഡിഫഌനോടെ വലയില്‍ കയറുമ്പോള്‍ ഗോളി നിസഹായനായി. സ്‌റ്റേഡിയമൊന്നാകെ നിശബ്ദരായിപ്പോയ നിമിഷം. സ്‌കോര്‍ 10.
നീണ്ട നിര്‍ഭാഗ്യത്തിന്റെ നിമിഷങ്ങള്‍ക്കുശേഷം 67ാം മിനിറ്റില്‍ പ്രതിഭയും ഭാഗ്യവും ഒന്നിച്ച ആ നിമിഷമെത്തി. ഗോളിന് കാരണക്കാരായത് പകരക്കാരായെത്തിയ രണ്ടുപേര്‍. ബോക്‌സിന് പുറത്തുനിന്നും ലഭിച്ച പന്തുമായി ചെന്നൈയിന്‍ പ്രതിരോധനിരക്കാര്‍ക്കിടയിലൂടെ ജര്‍മന്റെ മുന്നേറ്റം. പോസ്റ്റിന് തൊട്ടടുത്തുവച്ച് പോസ്റ്റിന് സമാന്തരമായി ജര്‍മന്‍ പന്ത് നീട്ടിനല്‍കി. പോസ്റ്റിന് മുന്നില്‍നിന്ന ദിദിയര്‍ കാഡിയോയ്ക്ക് പന്ത് തട്ടി വലയിലിടേണ്ട ചുമതലയേ ഉണ്ടായിരുന്നുള്ളൂ. പന്ത് വലയില്‍ തൊട്ടതും സ്‌റ്റേഡിയം പൊട്ടിത്തെറിച്ചു. സ്‌കോര്‍ 11.
85ാം മിനിറ്റില്‍ മല്‍സരത്തിന്റെ ഗതി മാറ്റിയ ഉജ്വല ഗോളെത്തി. അതും സീസണിലെ രണ്ടാമത്തെ മാത്രം മല്‍സര കളിക്കുന്ന മലയാളി താരം സി.കെ.വിനീതിന്റെ ബൂട്ടില്‍നിന്നും. മൈതാനത്തിന്റെ ഇടതുഭാഗത്തുനിന്ന് പോസ്റ്റ് ലക്ഷ്യമാക്കി ഹോസു പ്രീറ്റോയുടെ ക്രോസ്. ചെന്നൈയിന്‍ ബോക്‌സിലേക്ക് മഴവില്ലു കണക്കെ വളഞ്ഞിറങ്ങിയ പന്ത് കൈപ്പിടിയിലൊതുക്കാന്‍ ഗോള്‍കീപ്പര്‍ ഡുവയിന്‍ കേറിനായില്ല. പന്ത് ക്ലിയര്‍ ചെയ്യാനുള്ള പ്രതിരോധനിര താരം ജെറിയുടെയും ശ്രമം പാളിയതോടെ പന്ത് വിനീതിലേക്ക്. പുറത്തേക്ക് പോകാനൊരുങ്ങിയ പന്തിനെ അസാധ്യമായ ആംഗിളില്‍നിന്നും അസാധ്യമായ മെയ് വഴക്കത്തോടെ വിനീത് ഗോളിലേക്ക് തിരിച്ചുവിട്ടു. രാജ്യാന്തര നിലവാരമുള്ള തകര്‍പ്പന്‍ ഗോള്‍. സ്‌റ്റേഡിയമൊന്നാകെ പൊട്ടിത്തെറിച്ചു. സ്‌കോര്‍ 21.
സീസണിലെ രണ്ടാം മല്‍സരത്തിനിറങ്ങിയ വിനീതിന്റെ മൂന്നാം ഗോള്‍ തൊട്ടുപിന്നാലെയെത്തി. മധ്യവരയ്ക്കു സമീപത്തുനിന്നും വിനീതിനെ ലക്ഷ്യമാക്കി ജര്‍മന്റെ ത്രൂപാസ്. ചെന്നൈയിന്‍ താരങ്ങളുടെ ഓഫ്‌സൈഡ് കെണി വിദഗ്ധമായി പൊട്ടിച്ച് വിനീതിന്റെ മുന്നേറ്റം. കയറിയെത്തിയ ഗോളിക്ക് യാതൊരു അവസരവും നല്‍കാതെ വിനീത് പന്തിന് ഗോളിലേക്കുള്ള വഴി കാട്ടി. സ്‌റ്റേഡിയമൊന്നാകെ കോരിത്തരിച്ചുപോയി. സ്‌കോര്‍ 31.
https://www.facebook.com/Malayalivartha
