ഇന്ത്യന് ക്രിക്കറ്റ് താരം യുസ്വേന്ദ്ര ചെഹലിനെതിരായ ജാതീയ പരാമര്ശം; മുന് ക്രിക്കറ്റ് താരം യുവരാജ് സിങ് അറസ്റ്റില്; യുവരാജിന്റെ ഫോണ് പിടിച്ചെടുത്തതായി സൂചന
ഇന്ത്യന് ക്രിക്കറ്റ് താരം യുസ്വേന്ദ്ര ചെഹലിനെതിരെ ഇന്സ്റ്റഗ്രാം ലൈവ് ചാറ്റിനിടെ നടത്തിയ ജാതീയ പരാമര്ശത്തിന്റെ പേരില് മുന് ക്രിക്കറ്റ് താരം യുവരാജ് സിങ് അറസ്റ്റില്.ചെഹലിനെതിരെ നടത്തിയ ജാതീയ പരാമര്ശത്തില് ദലിത് ആക്ടിവിസ്റ്റും അഭിഭാഷകനുമായ രജത് കല്സന് നല്കിയ പരാതിയുടെ അടിസ്ഥാനത്തിലാണ് അറസ്റ്റ്. ഹാന്സി പൊലീസ് അറസ്റ്റു ചെയ്ത യുവരാജിനെ പിന്നീട് ഇടക്കാല ജാമ്യത്തില് വിട്ടു. മൂന്നു മണിക്കൂറോളം നീണ്ട ചോദ്യംചെയ്യലിനു ശേഷമാണ് താരത്തിന് ജാമ്യം അനുവദിച്ചത്. ഇന്ത്യന് പീനല് കോഡിലെ എസ്സി/എസ്ടി ആക്ട് പ്രകാരമാണ് താരത്തെ അറസ്റ്റ് ചെയ്തത്.
ശനിയാഴ്ചയാണ് താരത്തെ അറസ്റ്റ് ചെയ്തതെന്ന് ഹാന്സി എസ്പി നിതിക ഗേലോട്ട് വ്യക്തമാക്കി. താരത്തിന് പിന്നീട് ജാമ്യം അനുവദിച്ചതായും എസ്പി അറിയിച്ചു. യുവരാജിന്റെ ഫോണ് പിടിച്ചെടുത്തതായി റിപ്പോര്ട്ടുണ്ട്.
2020 ഏപ്രിലില് ഇന്ത്യന് താരം രോഹിത് ശര്മയുമായി നടത്തിയ ഇന്സ്റ്റഗ്രാം ലൈവ് ചാറ്റിനിടെയാണ് യുവരാജ് വിവാദ പരാമര്ശം നടത്തിയത്. താഴ്ന്ന ജാതിക്കാരെ പരിഹസിക്കാനായി ഉപയോഗിക്കുന്ന വാക്കാണ് ചെഹലിനെതിരെ യുവരാജ് ഉപയോഗിച്ചത്. നിര്ദ്ദോഷമായി പറഞ്ഞ തമാശയാണെങ്കിലും പരിഹാസത്തിന് യുവരാജ് തിരഞ്ഞെടുത്ത വാക്കാണ് ദലിത് സംഘടനകളെയും ഒരു വിഭാഗം ആരാധകരെയും കുപിതരാക്കിയത്.
ഇതോടെ, യുവരാജ് മാപ്പു പറയണം എന്നാവശ്യപ്പെടുന്ന ഹിന്ദി ഹാഷ്ടാഗ് (#युवराज_सिंह_माफी_मांगो) സമൂഹമാധ്യമങ്ങളില് വ്യാപകമായിരുന്നു. അര്ബുദത്തെപ്പോലും തോല്പ്പിച്ച യുവരാജിന് ജാതീയചിന്തകളെ തോല്പ്പിക്കാന് ഇനിയുമായിട്ടില്ലെന്നായിരുന്നു വിമര്ശനം.
കോവിഡ് വ്യാപനത്തെ തുടര്ന്ന് രാജ്യം ലോക്ഡൗണിലായതിനു പിന്നാലെ ടിക്ടോക്കില് വിഡിയോകള് ചെയ്ത് സമൂഹമാധ്യമങ്ങളില് സജീവമായിരുന്നു യുസ്വേന്ദ്ര ചെഹല്. കുടുംബാംഗങ്ങളെപ്പോലും പങ്കെടുപ്പിച്ചാണ് ചെഹല് ടിക്ടോക്കില് വിഡിയോ ചെയ്തിരുന്നത്.
ഇന്സ്റ്റഗ്രാം ലൈവ് ചാറ്റിനിടെ ഇക്കാര്യം ചര്ച്ചയായപ്പോഴാണ് ചെഹലിനെ കളിയാക്കാന് യുവരാജ് വിവാദ പരാമര്ശം നടത്തിയത്. സംസാരത്തിന്റെ ഒഴുക്കില് യുവരാജുപോലും അറിയാതെയാണ് വിവാദ പരാമര്ശം ഉണ്ടായതെങ്കിലും ആരാധകര് ഇതിനെതിരെ ശക്തമായി രംഗത്തെത്തുകയായിരുന്നു.
https://www.facebook.com/Malayalivartha
