ആരാധകർക്ക് കർശന സുരക്ഷാ നിർദേശവുമായി കേരള സ്റ്റേറ്റ് ഇലക്ട്രിസിറ്റി ബോർഡ്. വൈദ്യുതി ലൈനുകൾക്കും ട്രാൻസ്ഫോർമറുകൾക്കും സമീപം വലിയ രീതിയിൽ ഫ്ലെക്സ് ബോർഡുകളും ബാനറുകളും സ്ഥാപിക്കുന്നതിനെതിരെയാണ് അധികൃതർ മുന്നറിയിപ്പ് നൽകിയിട്ടുള്ളത്. വിവിധയിടങ്ങളിൽ റോഡുകൾക്ക് കുറുകെയും പോസ്റ്റുകൾക്ക് മുകളിലും കൊടികളും തോരണങ്ങളും വ്യാപകമായി പ്രത്യക്ഷപ്പെടുന്നത് ശ്രദ്ധയിൽപ്പെട്ട സാഹചര്യത്തിലാണ് കെ.എസ്.ഇ.ബിയുടെ അടിയന്തര ഇടപെടൽ.

ആരാധകരുടെ ഇത്തരം പ്രവർത്തനങ്ങൾ വലിയ രീതിയിലുള്ള അപകടങ്ങൾക്ക് വഴിമാറുമെന്ന് കെ.എസ്.ഇ.ബി. കൊടികളും ഫ്ലെക്സുകളും കെട്ടുന്നതിനിടയിൽ അബദ്ധത്തിൽ ഇരുമ്പ് കമ്പികളോ നനഞ്ഞ കയറുകളോ ഹൈടെൻഷൻ ലൈനുകളടക്കമുള്ള വൈദ്യുതി കമ്പികളിൽ തട്ടിയാൽ മാരകമായ വൈദ്യുതാഘാതമേൽക്കാനും ജീവഹാനി വരെ സംഭവിക്കാനും സാധ്യതയേറെയാണ്.

വരാനിരിക്കുന്ന ശക്തമായ കാറ്റിലും മഴയിലും ഇത്തരം താൽക്കാലിക ബോർഡുകളും ബാനറുകളും പൊട്ടിവീഴാൻ സാധ്യതയേറെയാണ്. ഇവ ലൈനുകൾക്ക് മുകളിലേക്ക് വീഴുന്നത് കൊണ്ടുണ്ടാകുന്ന ഷോർട്ട് സർക്യൂട്ട് വൻ ദുരന്തങ്ങൾക്കും പ്രദേശത്തെ മുഴുവൻ വൈദ്യുതി വിതരണം തടസ്സപ്പെടാനും കാരണമായേക്കാം.