ഇംഗ്ലീഷ് പ്രീമിയര്‍ ലീഗില്‍ വിജയക്കുതിപ്പ് തുടര്‍ന്ന് ആഴ്‌സണല്‍. ഏഴ് ഗോള്‍ ത്രില്ലറില്‍ ല്യൂട്ടണ്‍ ടൗണിനെതിരെ 4-3നാണ് ഗണ്ണേഴ്‌സിന്റെ വിജയം. കളി അവസാനിക്കാനിരിക്കെ ഇഞ്ചുറി ടൈമിന്റെ ഏഴാം മിനിറ്റില്‍ ഡെക്ലാന്‍ റൈസ് നേടിയ ഗോളാണ് സമനിലയിലേക്ക് നീങ്ങിയ മത്സരത്തില്‍ വിജയം സമ്മാനിച്ചത്.

ജയത്തോടെ 36 പോയന്റായ ആഴ്‌സണല്‍ ഒന്നാം സ്ഥാനത്തെ ലീഡ് അഞ്ചായി ഉയര്‍ത്തി. ഒരു മത്സരം കുറച്ചു കളിച്ച് 31 പോയന്റുള്ള ലിവര്‍പൂള്‍ രണ്ടാമതും 30 പോയന്റുള്ള മാഞ്ചസ്റ്റര്‍ സിറ്റി മൂന്നാമതുമാണ്.

ബുകായോ സാക, ഗബ്രിയേല്‍ ജീസസ്, ഗബ്രിയേല്‍ മാര്‍ട്ടിനെല്ലി ത്രയത്തെ മുന്‍നിരയില്‍ വിന്യസിച്ചാണ് മൈക്കല്‍ ആര്‍ടേറ്റ ടീമിനെ ഇറക്കിയത്. 20ാം മിനിറ്റില്‍ സാകയുടെ മനോഹര പാസില്‍ മാര്‍ട്ടിനെല്ലിയാണ് ഗോളടിക്ക് തുടക്കമിട്ടത്.

വലതു വിങ്ങിലൂടെ മുന്നേറിയ സാക രണ്ട് പ്രതിരോധ താരങ്ങളെ കബളിപ്പിച്ച് മാര്‍ക്ക് ചെയ്യാതെ നിന്നിരുന്ന മാര്‍ട്ടിനെല്ലിക്ക് പന്തെത്തിക്കുകയായിരുന്നു. എതിര്‍ താരം ഓടിയെത്തിയപ്പോഴേക്കും പന്ത് വലയിലേക്കടിച്ചുകഴിഞ്ഞിരുന്നു. എന്നാല്‍, അഞ്ച് മിനിറ്റിനകം ഗബ്രിയേല്‍ ഓഷോയിലൂടെ ല്യൂട്ടണ്‍ തിരിച്ചടിച്ചു. ആല്‍ഫി ഡോട്ടി എടുത്ത ഫ്രീകിക്ക് തകര്‍പ്പന്‍ ഹെഡറിലൂടെ ഗോളിലേക്ക് വഴിതിരിച്ചുവിടുകയായിരുന്നു. 32ാം മിനിറ്റില്‍ മാര്‍ട്ടിനെല്ലി വീണ്ടും ഗോളിനടുത്തെത്തിയെങ്കിലും ല്യൂട്ടന്‍ ഗോള്‍കീപ്പറുടെ ടോപ്ക്ലാസ് സേവ് തടസ്സമായി.

ഏഴ് മിനിറ്റിനകം ബുകായോ സാകയുടെ വലതുവിങ്ങില്‍ നിന്നുള്ള ഉശിരന്‍ ഇടങ്കാലന്‍ ഷോട്ടും ഗോള്‍കീപ്പറുടെ മെയ്!വഴക്കത്തിന് മുന്നില്‍ നിഷ്ഫലമായി. എന്നാല്‍, ഒന്നാം പകുതിക്ക് പിരിയാനിരിക്കെ ആഴ്‌സണല്‍ അര്‍ഹിച്ച ലീഡ് നേടുകയും ചെയ്തു. ബെന്‍ വൈറ്റ് നല്‍കിയ ക്രോസ് ഉയര്‍ന്നുചാടി ഗബ്രിയേല്‍ ജീസസ് ഹെഡറിലൂടെ ലക്ഷ്യത്തിലെത്തിച്ചു.