ഇറ്റാലിയന് സീരി എ കിരീടത്തില് മുത്തമിട്ട് ഇന്റര് മിലാന്...
ഇറ്റാലിയന് സീരി എ കിരീടത്തില് മുത്തമിട്ട് ഇന്റര് മിലാന്. ആവേശകരമായ മിലാന് ഡര്ബിയില് ബദ്ധവൈരികളായ എ.സി മിലാനെ അവരുടെ തട്ടകത്തില് ഒന്നിനെതിരെ രണ്ടു ഗോളുകള്ക്ക് വീഴ്ത്തിയാണ് ഇന്ററിന്റെ കിരീട നേട്ടം.
ലീഗില് ഇനിയും അഞ്ചു മത്സരങ്ങള് ബാക്കി നില്ക്കെയാണ് ഇന്റര് തങ്ങളുടെ 20ാം കിരീടം ഉറപ്പിച്ചത്. രണ്ടാമതുള്ള എ.സി മിലാനേക്കാള് 17 പോയന്റിന്റെ ലീഡുണ്ട് ഇന്ററിന്. ഇനിയുള്ള മത്സരങ്ങള് ജയിച്ചാലും എ.സി മിലാന് ഒന്നാമതെത്താനാകില്ല.
ഇന്ററിന് 33 മത്സരങ്ങളില്നിന്ന് 86 പോയന്റ്. ഇത്രയും മത്സരങ്ങളില്നിന്ന് എ.സി മിലാന് 69 പോയന്റും. 36 കിരീടങ്ങളുമായി യുവന്റസാണ് ചാമ്പ്യന്പട്ടത്തില് ഇന്ററിനു മുന്നിലുള്ളത്. എ.സി മിലാന് 19 കിരീടങ്ങളുമാണുള്ളത്.
സാന് സിറോ സ്റ്റേഡിയത്തില് നടന്ന മത്സരത്തില് 18ാം മിനിറ്റില് ഫ്രാന്സെസോ അസെര്ബിയയുടെ ഗോളിലൂടെ ഇന്ററാണ് ആദ്യം ലീഡെടുത്തത്. 49-ാം മിനിറ്റില് മാര്കസ് തുറാം ഇന്ററിന്റെ ലീഡ് വര്ധിപ്പിക്കുകയും ചെയ്തു.
80ാം മിനിറ്റില് ഇംഗ്ലണ്ടിന്റെ ഫികായോ തൊമോരി ക്ലോസ് റേഞ്ച് ഹെഡ്ഡറില് ഒരു ഗോള് മടക്കി എ.സി മിലാന് പ്രതീക്ഷ നല്കിയെങ്കിലും ഫലമുണ്ടായില്ല. ഇന്ററിന് കിരീടം ഉറപ്പിക്കാന് ഒരു സമനില മതിയായിരുന്നു. 116 വര്ഷത്തിനിടെ മിലാന് ഡര്ബിയില് സീരി എ കിരീടം ഉറപ്പിക്കുന്നത് ആദ്യമായിട്ടാണ്.
"
https://www.facebook.com/Malayalivartha