മഞ്ജുവാര്യര് കുടുംബശ്രീ ജൈവകൃഷി ഗുഡ്വില് അംബാസിഡര്
ഹൗ ഓള്ഡ് ആര് യു സിനിമയില് നിരുപമ എന്ന കഥാപാത്രത്തെ അവതരിപ്പിച്ച മഞ്ജുവാര്യര് കുടുംബശ്രീയുടെ മട്ടുപ്പാവിലെ ജൈവകൃഷിയുടെ ഗുഡ്വില് അംബാസിഡറാകും. മസ്കറ്റ് ഹോട്ടലില് നടന്ന ചടങ്ങില് മന്ത്രി എം.കെ. മുനീറാണ് ഇക്കാര്യം പ്രഖ്യാപിച്ചത്.
ജൈവകൃഷിയെ പ്രോത്സാഹിപ്പിക്കുന്ന ഈ സിനിമയെ വിനോദ നികുതിയില് നിന്ന് ഒഴിവാക്കും. കുടംബശ്രീ ഉല്പന്നങ്ങളുടെ ഗുണനിലവാരം പരിശോധിക്കാന് സംവിധാനമൊരുക്കുമെന്നും മന്ത്രി പറഞ്ഞു. നമ്മള് കഴിക്കുന്ന ഭക്ഷണത്തില് വിഷം അടങ്ങിയിട്ടുണ്ടെന്ന വലിയ തിരിച്ചറിവാണ് ഈ സിനിമയില് നിന്ന് തനിക്ക് ലഭിച്ചതെന്ന് മഞ്ജു പറഞ്ഞു. ഇതിനെതിരെയുള്ള സന്ദേശം ജനങ്ങളിലെത്തിക്കാന് ആശിച്ചപ്പോഴാണു ഗുഡിവില് അംബാസിഡറാകാന് സര്ക്കാര് സമീപിച്ചതെന്നും മഞ്ജു പറഞ്ഞു.
ഹൗ ഓള്ഡ് ആര് യു സിനിമയുടെ സംവിധായകന് റോഷന് ആന്ഡ്രൂസ് വീഡിയോ കോണ്ഫറന്സിലൂടെ കുടുംബശ്രീ പ്രവര്ത്തകരുമായി സംവദിച്ചു. ഇപ്പോള് കുടുംബശ്രീ 47,000 ഹെക്ടര് സ്ഥലത്ത് കൃഷി ചെയ്യുന്നുണ്ട്. ഓരോ ജില്ലയിലും 500 വീടുകളുടെ മട്ടുപ്പാവില് കൃഷി നടത്താന് പദ്ധതി തയ്യാറാക്കിയിട്ടുണ്ട്. പച്ചക്കറി തൈകള് അടങ്ങിയ പാക്കറ്റുകള് കുടുംബശ്രീ വിപണനം ചെയ്യും.
കുടുംബശ്രീ എക്സിക്യൂട്ടീവ് ഡയറക്ടര് കെ.ബി വല്സലാകുമാരി, പ്രോഗ്രാം മാനേജര് ഡോ.എം.എസ് സലിം, എക്സിക്യൂട്ടീവ് കമ്മിറ്റി അംഗം സ്വപ്ന ജോര്ജ്ജ് തുടങ്ങിയവര് പങ്കെടുത്തു.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha
