കടലും കടലിലെ കുളിയുമെല്ലാം ആരിലും നല്ല മൂഡ് ഉണ്ടാക്കിയെടുക്കാൻ പോന്നവയാണ്. മനസിലെ ടെൻഷൻ ഒക്കെ കളഞ്ഞു റിലാക്സ് ആകാൻ എന്നും പറ്റിയത് കടൽ തീരങ്ങൾ തന്നെയാണ്. ബുർജുൽ അറബിൽ നിന്ന്​ ഒരു കിലോമീറ്റർ അകലെയായി ഉമ്മുസുഖീം ബിച്ച്​ ഒന്നിലാണ്​ ദുബൈ നഗരസഭ പുതിയ സംവിധാനം കൊണ്ടുവന്നത്. ഇനി മുതൽ ഉമ്മു സുഖീം ബീച്ചിൽ രാത്രി കാലങ്ങളിലും നീന്തിത്തുടിച്ചു ഉല്ലസിയ്ക്കാൻ അവസരം.

കാറ്റിൽ നിന്നും സൂര്യപ്രകാശത്തിൽ നിന്നും ലഭിക്കുന്ന ഉൗർജമുപയോഗപ്പെടുത്തി പരിസ്​ഥിതി സൗഹാർദപരമായാണ്​ കടലോരത്ത്​ രാത്രി നീന്താനുള്ള സൗകര്യ​ങ്ങളൊരുക്കിയത്. ദുബൈ നഗരവാസികൾക്കും സന്ദർശകർക്കും സുരക്ഷിതവും സന്തോഷകരവുമായ രാത്രി നീന്തൽ സാധ്യമാക്കുക വഴി എമിറേറ്റിനെ സ്​മാർട്ട്​ നഗരമാക്കി മാറ്റാനുള്ള സർക്കാരിന്റെ പ്രവർത്തനത്തിന്​ ആക്കം കൂട്ടുകയാണെന്ന്​ നഗരസഭാ ഡയറക്​ടർ ജനറൽ ഹുസൈൻ നാസർ ലൂത്ത പറഞ്ഞു.

സൂര്യാസ്​തമനം കഴിഞ്ഞാൽ സ്വയം പ്രകാശിക്കുന്ന സ്​മാർട്ട്​ പോളുകളാണ്​ നീന്തൽ മേഖലയിലെ ഒരു പ്രത്യേകത. 12 മീറ്ററാണു സ്മാർട് വൈദ്യുതി തൂണുകളുടെ ഉയരം. ഇവയിൽ നിന്ന്​ 120 മീറ്റർ നീളത്തിലും 50 മീറ്റർ ആഴത്തിലും പ്രകാശമെത്തും. സൂര്യപ്രകാശം ഇല്ലാതാകുമ്പോൾ തനിയെ പ്രകാശിക്കാൻ സെൻസറുകളുമുണ്ട്. കടൽ പ്രക്ഷുബ്​ധമായാൽ സഞ്ചാരികൾക്കുള്ള മുന്നറിയിപ്പും ഇതിൽ ഘടിപ്പിച്ച സെൻസർ വഴി ലഭ്യമാകുമെന്ന്​ പരിസ്​ഥിതി വകുപ്പ്​ ഡയറക്​ടർ ആലിയ അബ്​ദു റഹീം അൽ ഹർമൂദി പറഞ്ഞു.

ഓരോ വൈദ്യുതി തൂണിനും 1.5 കിലോവാട്ട് വൈദ്യുതി ഒരു ദിവസം ഉൽപാദിപ്പിക്കാനാകും. തീരസാഹചര്യങ്ങൾക്കിണങ്ങുന്ന ഫൈബർ കൊണ്ടാണു ഇവ നിർമിച്ചിരിക്കുന്നത്. കടലുമായി ബന്ധപ്പെട്ട മുന്നറിയിപ്പും അപകട സൂചനയായി ബീച്ചുകളിൽ സ്ഥാപിച്ചിരിക്കുന്ന കൊടികളുടെ നിറവും സ്‌ക്രീനിലറിയാം. വേനൽ കാലത്ത്​ പകൽ നേരങ്ങളിൽ ചൂട്​ കൂടുതലാകയാൽ രാത്രി നീന്തലിന്​ സൗകര്യമൊരുക്കണമെന്ന നിരവധി പേരുടെ ആഗ്രഹം പരിഗണിച്ചാണ്​ ഇൗ ഉദ്യമം. സന്ദർശകരുടെ സുരക്ഷയെ കരുതി രാത്രി നീന്തൽ നേരത്തെ അനുവദിച്ചിരുന്നില്ല. സുരക്ഷാ ഉപകരണങ്ങളുമായി രക്ഷാസേനയും രാത്രിയിൽ ബീച്ചിലുണ്ടാകും. ജനങ്ങളുടെ പ്രതികരണം അനുസരിച്ചായിരിക്കും ഭാവി നടപടികളെന്നും അധികൃതർ അറിയിച്ചു.