സൗദിയുടെ പിന്നാലെ യു.എ.ഇയും ഒക്ടോബര് ഒന്ന് മുതല് എക്സൈസ് നികുതി ചുമത്തുന്നു
രാജ്യത്ത് ഉത്പാദിപ്പിക്കുന്നതോ വില്ക്കുന്നതോ ആയ പ്രത്യേക ഇനം ഉത്പന്നങ്ങള്ക്ക് എക്സൈസ്നികുതി ചുമത്തുന്ന സംവിധാനം വരുന്ന ഒക്ടോബര് ഒന്നിന് നിലവില്വരും.
ധനകാര്യമന്ത്രാലയത്തിലെ അണ്ടര് സെക്രട്ടറി യൂനിസ് ഹാദി അല് ഖൂറിയാണ് ഇക്കാര്യം വെളിപ്പെടുത്തിയത്. ഫ്രീസോണില് ഉത്പാദിപ്പിക്കുന്ന ഈ വിഭാഗത്തില്പെടുന്ന ഉത്പന്നങ്ങള്ക്കും ഇത് ബാധകമാണ്. രാജ്യത്തേക്ക് വിദേശത്തുനിന്ന് എത്തുന്ന യാത്രക്കാര് കൊണ്ടുവരുന്ന ഈ ഇനം സാധനങ്ങള്ക്കും നികുതി നല്കേണ്ടിവരും. പുതിയ നികുതി ചുമത്തുന്നതോടെ പ്രാഥമിക കണക്കുകളനുസരിച്ച് ഏഴ് ബില്യന് ദിര്ഹത്തിന്റെ അധികവരുമാനം ലഭിക്കുമെന്നാണ് പ്രതീക്ഷിക്കുന്നത്.
പുകയിലെ ഉത്പന്നങ്ങള്ക്ക് നൂറുശതമാനവും ശീതളപാനീയങ്ങള്ക്ക് അമ്പത് ശതമാനവും നികുതി ഈടാക്കാനാണ് തീരുമാനം. ആരോഗ്യവും പരിസ്ഥിതിയും സംരക്ഷിക്കുന്നതിനുള്ള നടപടികളുടെ ഭാഗമായാണിത്. ഇപ്പോഴത്തെ ഉത്തരവനുസരിച്ച് പുകയില ഉത്പന്നങ്ങളും ശീതളപാനീയങ്ങളുമാണ് നികുതിയുടെ പരിധിയില് വരുന്നത്. മറ്റ് ഉത്പന്നങ്ങള്ക്ക് നികുതി ചുമത്തുന്ന കാര്യം ഇപ്പോള് പരിഗണനയിലില്ലെന്നും അദ്ദേഹം അറിയിച്ചു.
രാജ്യത്ത് എക്സൈസ് നികുതി നടപ്പാക്കുന്നതിനായുള്ള പുതിയ നിയമം സംബന്ധിച്ച ഉത്തരവ് പ്രസിഡന്റ് ശൈഖ് ഖലീഫ ബിന് സായിദ് അല് നഹ്യാന് പുറപ്പെടുവിച്ച പ്രഖ്യാപനത്തിന് പിന്നാലെയാണ് ഈ അറിയിപ്പ്. യു.എ.ഇ.യുടെ ഔദ്യോഗിക വാര്ത്താ ഏജന്സിയായ വാമിന് നല്കിയ പ്രത്യേക പ്രസ്താവനയിലാണ് നികുതി ഈടാക്കുന്ന തീയതി അണ്ടര് സെക്രട്ടറി വെളിപ്പെടുത്തിയത്. ആരോഗ്യത്തിനും പരിസ്ഥിതിക്കും ഹാനികരമായ ഉത്പന്നങ്ങളുടെമേല് ഉയര്ന്ന എക്സൈസ് നികുതി ചുമത്തുന്നതാണ് പുതിയ നിയമം. 2017-ലെ ഫെഡറല് ഡിക്രി-നിയമം ഏഴുപ്രകാരമാണ് പുതിയ എക്സൈസ് തീരുവ ചുമത്തുന്നത്. ആരോഗ്യസംരക്ഷണത്തിന് ഊന്നല് നല്കുകയാണ് പുതിയ നികുതി ചുമത്തുന്നതിലൂടെ രാജ്യം ലക്ഷ്യമിടുന്നതെന്നും അദ്ദേഹം അറിയിച്ചു.
https://www.facebook.com/Malayalivartha