ഈ മാസം മുപ്പതിനകം ആധാര്‍ നമ്പർ നല്‍കാത്തവർക്ക് റേഷന്‍ സാധനങ്ങള്‍ നല്‍കില്ലെന്ന് സിവില്‍ സപ്ലൈസ് വകുപ്പ്. ആധാര്‍ നമ്പർ രേഖപ്പെടുത്തി അതിന്റെ സാധുത ഉറപ്പ് വരുത്തി മാത്രമേ റേഷന്‍ സാധനങ്ങള്‍ നല്‍കാവൂ എന്ന കേന്ദ്ര ഭക്ഷ്യ മന്ത്രാലയത്തിന്റെ അറിയിപ്പിന്റെ അടിസ്ഥാനത്തിലാണ് നടപടി. ആധാര്‍ ലഭ്യമാക്കിയ ഗുണഭോക്താക്കള്‍ക്ക് മാത്രമേ സെപ്റ്റംബര്‍ മുപ്പതിന് ശേഷം സബ്സിഡി നിരക്കില്‍ ഭക്ഷ്യധാന്യം നല്‍കുകയുള്ളൂ. സംസ്ഥാനത്ത് ഇതിനകം തന്നെ റേഷന്‍ കടകള്‍ വഴി ആധാര്‍ നമ്പർ സ്വീകരിച്ചിട്ടുണ്ട്.

ആധാര്‍ നൽകിയവരുടെ പട്ടിക എല്ലാ റേഷന്‍ കടകളിലും ലഭ്യമാക്കും. പൊതുവിതരണ സംവിധാനത്തിലെ സുതാര്യത ഉറപ്പുവരുത്താനാണ് കാര്‍ഡിലെ അംഗങ്ങളുടെ ആധാര്‍ നമ്പർ ശേഖരിക്കുന്നത്. ഇതുവഴി റേഷന്‍ സാധനങ്ങളുടെ ദുരുപയോഗം തടയാനാകുമെന്നാണ് അധികൃതരുടെ കണക്കുകൂട്ടൽ