വീട്ടുകളില്‍ നിന്നും ദൂരയാത്രകള്‍ക്ക് പോകുന്ന ഭൂരിഭാഗം പേരും ആശ്രയിക്കുന്നത് കുപ്പിവെള്ളത്തെയാണ്. ഇന്ന് ഭൂരിഭാഗം ഓഫീസുകളിലും ഉപയോഗിക്കുന്നത് ക്യാനുകളില്‍ വരുന്ന കുടിവെള്ളമാണ്. കുപ്പിവെള്ളം വാങ്ങുമ്പോള്‍ അത് ഏത് കമ്പനിയുടേതാണെന്നോ അതിന്റെ വിലയോ ആരും തന്നെ ശ്രദ്ധിക്കാറില്ല. മുന്‍കാലങ്ങളില്‍ നിന്നും വ്യത്യസ്തമായി കല്യാണങ്ങള്‍ക്ക് പോലും ഒരു ബോട്ടില്‍ കുപ്പിവെള്ളം വിളമ്പുന്നതാണ് പുതിയ രീതി. നിരത്തിലൂടെ മിനിട്ടുകള്‍ ഇടവെട്ട് കുപ്പിവെള്ളവുമായി പായുന്ന മിനി വാനുകളില്‍ ഒന്നും തന്നെ മതിയായ സുരക്ഷാ സംവിധാനങ്ങളില്ല. കത്തുന്ന വെയിലില്‍ മണിക്കൂറുകളോളം പ്ലാസ്റ്റിക് കുപ്പിയില്‍ ഇരുന്ന് തിളച്ച ശേഷമാണ് അത് നമ്മുടെ ഉള്ളിലേയ്ക്ക് എത്തുന്നത്. 

കുറഞ്ഞ വിലയ്ക്ക് കിട്ടുന്ന കമ്പനികളുടെ വെള്ളം അധികമായി വാങ്ങുന്നത് മിക്കപ്പോഴും ചെറുകിട കച്ചവടക്കാരാണ്. സ്വഭാവികമായും വെള്ളം അധികമായി വിറ്റഴിക്കുന്നതും ഇത്തരം ഇടങ്ങളില്‍ തന്നെയാണ്. സൂപ്പര്‍ മാര്‍ക്കറ്റുകളിലോ മാളുകളിലോ പോയി ആരും കുപ്പിവെള്ളം വാങ്ങി ഉപയോഗിക്കാറില്ല. മാത്രമല്ല ബ്രാന്‍ഡഡ് കമ്പനികളുടെ സ്റ്റിക്കര്‍ പതിച്ച് എത്തുന്ന പലതും വ്യജ കമ്പനികളുടേതുമാകാം. പലരില്‍ നിന്നും കടംവാങ്ങിയും ലോണെടുത്തും നല്ല രീതിയില്‍ വ്യവസായം മുന്നോട്ട് കൊണ്ട് പോകണം എന്നാഗ്രഹിക്കുന്നവര്‍ പരാജയപ്പെടുകയും കൊള്ളലാഭമുണ്ടാക്കാന്‍ തക്കം പാര്‍ത്ത് ഇരിക്കുന്നവര്‍ ആ മേഖലയില്‍ വിജയം കൈവരിക്കുകയും ചെയ്യുന്നു. 

കോടികള്‍ മുടക്കി ഗുണമേന്മയുള്ള യന്ത്രങ്ങള്‍ വാങ്ങി ശുദ്ധമായ വെള്ളം വിതരണം ചെയ്യുന്ന പല കമ്പനികളും ഇന്ന് ആശങ്കയിലാണ്. അടിസ്ഥാന സൗകര്യങ്ങള്‍ തൊട്ടുതീണ്ടിയിട്ടില്ലാത്ത കുപ്പിവെള്ള നിര്‍മ്മാണ പ്ലാന്റുകള്‍ ഇന്ന് സംസ്ഥാനത്ത് വ്യാപകമാണ്. കേട്ടുകേള്‍വി പോലും ഇല്ലാത്ത പേരുകളില്‍ പ്രവര്‍ത്തിക്കുന്ന ഇവ ഗുരുതരമായ ആരോഗ്യപ്രശ്‌നങ്ങളാണ് ഉണ്ടാക്കുന്നത്. ഒറ്റമുറിയ്ക്കുള്ളില്‍ പ്രവര്‍ത്തിക്കുന്ന ഈ വ്യാജന്‍മാരാണ് ഗുണമേന്മയുള്ള കമ്പനികള്‍ക്ക് കൂടി പേരുദോഷം ഉണ്ടാക്കുന്നത്. കുറഞ്ഞ വിലയ്ക്ക് ഏജന്‍സികളുമായി കരാര്‍ ഉണ്ടാക്കി തട്ടിക്കൂട്ട് കമ്പനികള്‍ വിപണി മുഴുവന്‍ കീഴടക്കുകയാണ്. 

ഏതൊരു വസ്തുവും മനുഷ്യന്‍ തിരഞ്ഞെടുക്കുന്നത് സ്വന്തം അഭിരുചി അനുസരിച്ച് മാത്രമാണ്. എന്നാല്‍ കുടിവെള്ളത്തിന്റെ കാര്യത്തിന്‍ മാത്രം ആ ഒരു നിലവാരത്തിലെത്താന്‍ നമുക്ക് കഴിഞ്ഞിട്ടില്ല. കിട്ടുന്നത് ഏതാണോ അത് വാങ്ങി കുടിക്കുക എന്നതാണ് രീതി. കുറഞ്ഞ വിലയ്ക്ക് കിട്ടുന്ന കമ്പനികളുടെ വെള്ളം അധികമായി വാങ്ങുന്നത് പലപ്പോഴും ചെറുകിട കച്ചവടക്കാരാണ്. സ്വഭാവികമായും വെള്ളം അധികമായി വിറ്റഴിക്കുന്നതും ഇത്തരം ഇടങ്ങളില്‍ നിന്നാണ്. 

2010ല്‍ 60 കമ്പനികള്‍ മാത്രം ഉണ്ടായിരുന്ന കേരളത്തില്‍ നിലവില്‍ 160 ഓളം കുപ്പിവെള്ള കമ്പനികളാണ് നിയമപരമായി പ്രവര്‍ത്തിക്കുന്നത്. എന്നാല്‍ ഇത്രയും അധികം കമ്പനികളെ മാത്രമല്ല വിപണിയില്‍ നമുക്ക് കാണാന്‍ കഴിയുന്നത.് എണ്ണമെടുത്താല്‍ കുപ്പിവെള്ള കമ്പനികള്‍ മൂന്നൂറ് കടക്കും. കൃത്യമായ ഗുണനിലവാരത്തോടെ ഒരു വിഭാഗം കമ്പനികള്‍ പ്രവര്‍ത്തിക്കുമ്പോള്‍ മറ്റൊരു വിഭാഗം അമിത ലാഭത്തിനായി ജനങ്ങളെ കബളിപ്പിക്കുകയാണ്. മിനറല്‍ വാട്ടര്‍ എന്നത് പേരില്‍ മാത്രമാണ്. വി.ഐ.പികള്‍ക്ക് മാത്രമാണ് അത് മിനറല്‍ വാട്ടറായി ലഭിക്കുന്നത്. നമ്മള്‍ ഉപയോഗിക്കുന്നതില്‍ 99 ശതമാനവും മിനറല്‍ വാട്ടര്‍ അല്ല. വെറും കുപ്പിവെള്ളം മാത്രമാണ്. മാത്രമല്ല ഇത് ഉപയോഗിച്ച് ശീലമായവര്‍ക്ക് മിനറല്‍സ് അടങ്ങിയ വെള്ളം നല്‍കിയാല്‍ പോലും വിജയിച്ചെന്ന് വരില്ല. അതാണ് നമ്മുടെ നാട്ടിലെ അവസ്ഥ.