വിഴിഞ്ഞം തുറമുഖം യാഥാർത്ഥ്യമായാൽ ഏറ്റവും കൂടുതൽ ജോലി ഏത് മേഖലയിലെന്ന് അറിയുമോ? രാജ്യത്തിനകത്തും വിദേശത്തും ഒരുപോലെ സാദ്ധ്യതയേറെയുള്ളതാണ് ലോജിസ്റ്റിക് കോഴ്സുകൾ. എന്നാൽ കോഴ്സിനെക്കുറിച്ചും, പഠനസാദ്ധ്യതകളെക്കുറിച്ചും വിദ്യാർത്ഥികളിലും, രക്ഷിതാക്കളിലും സംശയങ്ങളേറെയുണ്ട്. ഉത്പന്നങ്ങൾ ലോകത്തിന്റെ വിവിധഭാഗങ്ങളിൽ ആവശ്യക്കാരിലെത്തിക്കുന്ന പ്രക്രിയയാണ് ലോജിസ്റ്റിക്സ്. ഇതുമായി ബന്ധപ്പെട്ട എല്ലാ നടപടിക്രമങ്ങളും ഉൾപ്പെടുന്ന മേഖലയാണിത്.

ലോകത്തെമ്പാടുമുള്ള ഷിപ്പിംഗ്, എയർലൈൻ, റോഡ് ഗതാഗതം, ഫ്രൈറ്റ് ഫോർവേഡിംഗ്, കയറ്റുമതി, ഇറക്കുമതി, സെയിൽസ്, മാർക്കറ്റിംഗ്, ഓഫീസ് നിർവ്വഹണം, കസ്റ്റമർ സർവീസ്, ഡോക്യുമെന്റഷൻ എന്നിവയെല്ലാം ലോജിസ്റ്റിക്സിൽപ്പെടുന്നു. രാജ്യത്ത് പ്രതിവർഷം ഒരുലക്ഷത്തോളം ലോജിസ്റ്റിക്സ് വിദഗ്ദ്ധരുടെ ആവശ്യമുണ്ട്. വ്യാപാര വിനിമയ രംഗത്ത് ആഗോളതലത്തിൽ പ്രവർത്തിക്കാൻ ലോജിസ്റ്റിക് വിദഗ്ദ്ധർക്കാകും.

ഷിപ്പിംഗ് ആൻഡ് ലോജിസ്റ്റിക് മന്ത്രാലയത്തിന്റെ അംഗീകാരമുള്ള കോഴ്സുകൾക്കാണ് സാദ്ധ്യതയേറെ. ഇന്റഗ്രേറ്റഡ് ലോജിസ്റ്റിക്സിൽ മികച്ച തൊഴിൽ നൈപുണ്യമുള്ളവരെയാണ് രാജ്യത്തെ ലോജിസ്റ്റിക് കമ്പനികൾക്ക് ആവശ്യം.

ലോജിസ്റ്റിക്സ് മേഖലയിൽ നിരവധി സർട്ടിഫിക്കറ്റ്, ഡിപ്ലോമ, ബിരുദ, ബിരുദാനന്തര ഡിപ്ലോമ പ്രോഗ്രാമുകളുണ്ട്. പ്ലസ്ടു പൂർത്തിയാക്കിയവർക്ക് ബി.ബി.എ /ബി.കോം ലോജിസ്റ്റിക്സ് ആൻഡ് സപ്ലൈചെയിൻ മാനേജ്മെന്റ് കോഴ്സിന് ചേരാം. ഇതിൽ സർട്ടിഫിക്കറ്റ്, ഡിപ്ലോമ പ്രോഗ്രാമുകളുമുണ്ട്.

ബിരുദധാരികൾക്ക് എം.ബി.എ /പി.ജി ഡിപ്ലോമ ഇൻ ലോജിസ്റ്റിക് ആൻഡ് സപ്ലൈ ചെയിൻ മാനേജ്‌മന്റ് കോഴ്സിന് ചേരാം. നിരവധി ഹ്രസ്വകാല സ്പെഷ്യലൈസേഷൻ കോഴ്സുകളുമുണ്ട്. International Ocean Freight Logistics Professional ഒരു മാസത്തെ മികച്ച സർട്ടിഫിക്കേഷൻ പ്രോഗ്രാമാണ്. eeeeeeeeeeeeeeeeeeeeeee eeeeeeeeeeeee

ഇന്ത്യ മാരിടൈം യൂണിവേഴ്സിറ്റിയിൽ മികച്ച ലോജിസ്റ്റിക് പ്രോഗ്രാമുണ്ട്. കൊച്ചിയിലെ ഫിഷറീസ് സർവകലാശാല, സ്വാശ്രയ കോളേജുകൾ എന്നിവിടങ്ങളിൽ ലോജിസ്റ്റിക് മാനേജ്‌മന്റ് കോഴ്സുകളുണ്ട്.

കാക്കനാട് ഇൻഫോപാർക്കിലുള്ള എസ്.സി.എം ഹബ്ബിലും മികച്ച ക്യാമ്പസ് പ്ലേസ്‌മെന്റുണ്ട്. അമേരിക്ക, യു.കെ, കാനഡ, ഓസ്ട്രേലിയ, ഗൾഫ് രാജ്യങ്ങൾ എന്നിവിടങ്ങളിലേക്ക് ലോജിസ്റ്റിക് മാനജ്മെന്റ് പൂർത്തിയാക്കിയവർക്ക് മികച്ച അവസരങ്ങളുണ്ട്.

ഉപരിപഠന സാദ്ധ്യതകളേറെയുള്ള മേഖല കൂടിയാണിത്. രാജ്യത്ത് പോർട്ടുകളും വിമാനത്താവളങ്ങളും കാർഗോ സിസ്റ്റവും കൂടുതലായി രൂപപ്പെടുമ്പോൾ മികച്ച സ്ട്രാറ്റജിക് ഓപ്പറേഷൻസ് രീതി പ്രാവർത്തികമാക്കാൻ ലോജിസ്റ്റിക് മാനേജ്‌മന്റ് വിദഗ്ദ്ധർക്കാകും.

വിഴിഞ്ഞം പോർട്ട് ആരംഭിക്കുന്നതോടെ പോർട്ട്മാനേജ്മെന്റിനോടൊപ്പം ലോജിസ്റ്റിക്സ് തൊഴിലുകൾക്ക് സാദ്ധ്യതയേറും.ഉപരിതല ഗതാഗതമേഖലയിലും അന്താരാഷ്ട്ര ഷിപ്പിംഗ് കമ്പനികൾ, ഷിപ്പിംഗ് കോർപറേഷൻ ഒഫ് ഇന്ത്യ എന്നിവയിലും ലോജിസ്റ്റിക്സിന് അനന്ത സാദ്ധ്യതകളുണ്ട്. ജലഗതാഗത സാദ്ധ്യതകൾ അനുദിനം വർദ്ധിച്ചു വരികയാണ്. ലോജിസ്റ്റിക്സ് മേഖലയിൽ പ്രവർത്തിക്കാൻ താത്പര്യം, അഭിരുചി എന്നിവ പ്രത്യേകം വിലയിരുത്തണം.

അംഗീകാരമുള്ള ലോജിസ്റ്റിക് സ്കൂളുകളിൽ മാത്രമേ ചേരാവൂ. പ്ലേസ്‌മെന്റ്, യോഗ്യരായ അദ്ധ്യാപകർ, ഭൗതിക സൗകര്യം, വ്യവസായ സ്ഥാപനങ്ങളുമായുള്ള സഹകരണം എന്നിവ പ്രത്യേകം വിലയിരുത്തണം.

വിഴിഞ്ഞം തുറമുഖം പ്രവർത്തനമാരംഭിക്കുന്നതോടെ വരുന്ന അഞ്ച് വർഷക്കാലയളവിൽ പ്രത്യക്ഷമായും പരോക്ഷമായും അഞ്ചു ലക്ഷം തൊഴിലവസരങ്ങളാണ് ഇവിടെ വരാനിരിക്കുന്നത്. ലോകത്ത്‌ ഉപരിതല, വ്യോമ ഗതാഗതത്തെ അപേക്ഷിച്ച് കടൽവഴിയുള്ള ഗതാഗതത്തിനും, ചരക്കു നീക്കത്തിനും 75 ശതമാനത്തോളം അധിക സാദ്ധ്യതകളുണ്ട്. ഇതിലൂടെ നിരവധി ടെക്‌നിഷ്യൻ, സൂപ്പർവൈസറി, മാനേജീരിയൽതല തൊഴിലുകൾ രൂപപ്പെട്ടുവരുന്നു.

മാരിടൈം മേഖലയിൽ സാങ്കേതികവിദ്യ, മാനേജ്മെന്റ്, സ്കിൽ വികസനം എന്നിവ കൈവരിച്ചവരുടെ വലിയ ക്ഷാമം നിലനിൽക്കുന്നു. ഈ രംഗത്ത് തൊഴിൽ നൈപുണ്യമുള്ളവരുടെ എണ്ണം ആവശ്യകതയുടെ ഒരുശതമാനത്തിൽ താഴെ മാത്രമാണ്. ഐ.ടി.ഐ, ഡിപ്ലോമ, എൻജിനിയറിംഗ് പൂർത്തിയാക്കിയവർക്ക് സാങ്കേതിക മേഖലയിൽ യഥേഷ്ടം അവസരങ്ങൾ ലഭിക്കും.

ലോജിസ്റ്റിക് മാനേജ്‌മന്റ്, സപ്ലൈ ചെയിൻ മാനേജ്മെന്റ്, മാരിടൈം എൻജിനിയറിംഗ്, ഷിപ് ബിൽഡിംഗ്, നേവൽ ആർക്കിടെക്ചർ, മെക്കാനിക്കൽ എൻജിനിയറിംഗ്, ഐ.ടി, കംപ്യൂട്ടർസയൻസ് പൂർത്തിയാക്കിയവർക്ക് നിരവധി തൊഴിലവസരങ്ങളാണ് വിഴിഞ്ഞം പോർട്ടിലുള്ളത്. ഉദ്യോഗാർത്ഥികൾക്ക്‌ ആഗോളതലത്തിൽ വിദേശ, ഇന്ത്യൻ ഷിപ്പിംഗ് കമ്പനികളിൽ അവസരങ്ങൾ ലഭിക്കും.

അക്കൗണ്ടിംഗ് മാനേജ്മെന്റ്, ബിസിനസ്സ് ഇക്കണോമിക്സ്, ഡാറ്റാ മാനേജ്‌മെന്റ്, അനലിറ്റിക്‌സ്, ഓട്ടോമേഷൻ, ആർട്ടിഫിഷ്യൽ ഇന്റലിജൻസ്, വ്യാപാര വിനിമയ കോഴ്‌സുകൾ, ഫിഷറീസ് ടെക്നോളജി, സംസ്കരണം വിപണനം, ഗുണനിലവാരം ഉറപ്പുവരുത്തൽ, കയറ്റുമതി എന്നിവയിൽ മികച്ച അവസരങ്ങൾ മലയാളികൾക്ക് ലഭിക്കും. ആസ്‌ടേലിയയിലും യൂറോപ്യൻ രാജ്യങ്ങളിലും കാനഡയിലും അമേരിക്കയിലും മികച്ച തൊഴിലവസരങ്ങൾ ഷിപ്പിംഗ് ആൻഡ് ലോജിസ്റ്റിക്, സാങ്കേതിക മേഖലയിലുണ്ട്‌.

മാരിടൈം നിയമം, ഫിഷറീസ് ആൻഡ് ഓഷ്യാനോഗ്രാഫിക് സ്റ്റഡീസ്, നോട്ടിക്കൽ സ്റ്റഡീസ്, കാലാവസ്ഥ വ്യതിയാനം, പോർട്ട് മാനേജ്‌മന്റ്, പോർട്ട് ഓപ്പറേഷൻസ്, മാരിടൈം സപ്ലൈ ചെയിൻ മാനേജ്‌മെന്റ്, ബി.ബി.എ, എം.ബി.എ പ്രോഗ്രാമുകൾ തുടങ്ങി 10, 12 ക്ലാസ് പഠനം പൂർത്തിയാക്കിയവർക്കും ബിരുദധാരികൾക്കും ചെയ്യാവുന്ന നിരവധി തൊഴിലധിഷ്ഠിത കോഴ്സുകളുണ്ട്‌.

ബിരുദധാരികൾക്ക് ചെയ്യാവുന്ന നിരവധി ഓൺലൈൻ കോഴ്സുകളുമുണ്ട്. സുസ്ഥിര വികസനത്തിൽ ഏറെ ഗവേഷണ സാദ്ധ്യതകളുമുണ്ട്. പഠനത്തിനുശേഷം ഇ കോമേഴ്‌സ് വ്യവസായ മേഖലകൾ, ഷിപ്പിംഗ്, എയർ ലൈൻ, ട്രേഡിംഗ് കമ്പനികൾ, ഡിഫെൻസ് ട്രേഡിംഗ് കമ്പനികൾ, റെയിൽവേ, കൺസ്ട്രക്‌ഷൻ കമ്പനികൾ, ഫാക്ടറി നിർമ്മാണ കമ്പനികൾ, കയറ്റുമതി-ഇറക്കുമതി കമ്പനികൾ, വെയർ ഹൗസിംഗ്, ഫ്രൈറ്റ് ഫോർവേഡിംഗ് കമ്പനികൾ മുതലായവയിൽ തൊഴിൽ ലഭിക്കും. സംരംഭകരായി ട്രേഡിംഗ് കമ്പനികൾ തുടങ്ങാൻ അവസരങ്ങളുമുണ്ട്