ഇന്ത്യന്‍ വ്യോമസേനാ ഗ്രൂപ്പ് കമാന്‍ഡര്‍ ശുഭാംശു ശുക്ലയും സംഘവും സുരക്ഷിതമായി ബഹിരാകാശത്തെത്തി.ആക്സിയം4 വിക്ഷേപണ ദൗത്യം വിജയകരം.. സംഘം സഞ്ചരിക്കുന്ന ഡ്രാഗണ്‍ പേടകം വ്യാഴം വൈകിട്ട് 4.31ന് അന്താരാഷ്ട്ര ബഹിരാകാശ നിലയത്തില്‍ ഡോക്ക് ചെയ്യും. നിലയത്തില്‍ തുടരുന്ന സംഘം രണ്ടാഴ്ചയ്ക്കുശേഷം മടങ്ങും. ഇതോടെ അന്താരാഷ്ട്ര ബഹിരാകാശ നിലയത്തിലെത്തുന്ന ആദ്യ ഇന്ത്യക്കാരനാകും ശുഭാംശു ശുക്ല.

രാകേഷ് ശര്‍മക്ക് ശേഷം ബഹിരാകാശത്ത് എത്തുന്ന രണ്ടാമത്തെ ഇന്ത്യാക്കാരനും. സാങ്കേതിക തകരാറുകളും കാലാവസ്ഥാ പ്രശ്നങ്ങളും മൂലം ആറുവട്ടം മാറ്റിയ ദൗത്യമാണിത്. ബുധന്‍ ഉച്ചയ്ക്ക് 12.01ന് ഫ്‌ളോറിഡയിലെ നാസ കെന്നഡി സ്പേസ് സെന്ററില്‍ നിന്നായിരുന്നു വിക്ഷേപണം. പുലര്‍ച്ചെ എല്ലാ പരിശോധനകളും പൂര്‍ത്തിയാക്കി സംഘം വിക്ഷേപണത്തറയിലെ ഡ്രാഗണ്‍ പേടകത്തില്‍ കയറിയിരുന്നു.


വിക്ഷേപണത്തിന് തൊട്ടു മുമ്പ് ചെറിയ സാങ്കേതിക പ്രശ്നം ശ്രദ്ധയില്‍്‌പ്പെട്ടെങ്കിലും പെട്ടെന്ന് പരിഹരിക്കാന്‍ കഴിഞ്ഞു. സ്പേസ് എക്സിന്റെ ഫാല്‍ക്കന്‍9 റോക്കറ്റാണ് പേടകവുമായി കുതിച്ചത്. വിക്ഷേപണത്തിന്റെ ആദ്യ മിനിറ്റില്‍ റോക്കറ്റിന്റെ ഒന്നാംഘട്ടം വേര്‍പെട്ട് ഭൂമിയില്‍ തിരിച്ചെത്തി. പുനരുപയോഗിക്കാനായി കഴിയുന്ന റോക്കറ്റ് ഭാഗമാണിത്.

തുടര്‍ന്ന് രണ്ടാംഘട്ട ജ്വലനത്തിന്റെ കരുത്തില്‍ പേടകം ബഹിരാകാശത്തേക്ക് നീങ്ങി. ഒന്‍പതാം മിനിറ്റില്‍ റോക്കറ്റില്‍ നിന്ന് ഡ്രാഗണ്‍ വേര്‍പെട്ടു. 257 കിലോമീറ്റര്‍ ഉയരത്തിലെത്തിയ പേടകം ഭൂമിയെ വലംവച്ചു തുടങ്ങി. ദൗത്യത്തിന്റെ ടെസ്റ്റ് പൈലറ്റായ ശുക്ല തുടര്‍ന്ന് രാജ്യത്തെ ജനങ്ങള്‍ക്കായുള്ള സന്ദേശം വായിച്ചു. സഞ്ചാരപഥം ഉയര്‍ത്തി പേടകത്തെ അന്താരാഷ്ട്ര ബഹിരാകാശ നിലയത്തിലേക്ക് അടുപ്പിച്ച് ഡോക്കിങ്ങിനുശേഷം സംഘാംഗങ്ങള്‍ നിലയത്തില്‍ പ്രവേശിക്കും.