ശരീരത്തിലെ ചയാപചയ പ്രവര്‍ത്തനങ്ങള്‍ ശരീരത്തിനുള്ളില്‍ നടക്കുന്നതിന്റെ തത്സമയ ചിത്രങ്ങള്‍ പകര്‍ത്തി എടുത്തു മാക്‌സ് പ്ലാങ്ക് ഇന്‍സ്റ്റിറ്റിയൂട്ടിലെ ഗവേഷകര്‍. പാട്ടു പാടുമ്പോഴും ഹൃദയം മിടിയ്ക്കുമ്പോഴും ശരീരത്തിനുള്ളിലുള്ള അവയവങ്ങള്‍ക്ക് എന്താണ് സംഭവിയ്ക്കുന്നതെന്നു ആ ചിത്രങ്ങള്‍ നമുക്ക് മനസ്സിലാക്കി തരുന്നു. ചലിക്കുന്ന വസ്തുക്കളുടെ തത്സമയ ദൃശ്യങ്ങള്‍ പകര്‍ത്താന്‍ സഹായിയ്ക്കുന്ന പുതിയ തരം എം ആര്‍ ഐ സാങ്കേതികവിദ്യ ആണ് ഇതിനു സഹായിച്ചത്.

ഫ്‌ലാഷ് 2 എന്ന് പേരുള്ള ഈ സംവിധാനം വികസിപ്പിച്ചത് ജര്‍മനിയിലെ മാക്‌സ് പ്ലാങ്ക് ഇന്‍സ്റ്റിറ്റിയൂട്ട് ഫോര്‍ ബയോഫിസിക്കല്‍ കെമിസ്ട്രിയിലെ പ്രൊഫസര്‍ ആയ ജെന്‍സ് ഫ്രാഹിം ആണ്.

എം ആര്‍ ഐ സ്‌കാനിന്റെ ആക്‌സിലറേഷന്‍ അല്പം കൂടി കൂട്ടി 100 ഫ്രെയിംസ് പെര്‍ സെക്കന്റ് എന്നാക്കാന്‍ ഈ സങ്കേതം സഹായിച്ചു എന്നാണ് മാക്‌സ് പ്ലാങ്ക് ഇന്‍സ്റ്റിറ്റിയൂട്ടിന്റെ പ്രസ്താവനയില്‍ പറയുന്നത്. യൂറോപ്യന്‍ ഇന്‍വെന്റര്‍ അവാര്‍ഡിന്റെ മൂന്നു ഫൈനലിസ്റ്റുകളില്‍ ഒരാളാകാന്‍ ഫ്രാഹീമിനെ സഹായിച്ചത് തന്റെ ഫ്‌ലാഷ് 2 പ്രോസസ്സ് വികസിപ്പിച്ചെടുത്തതാണ്.

അദ്ദേഹത്തിന് എം ആര്‍. ഐ ടെക്‌നോളജിയുമായി വളരെക്കാലത്തെ ബന്ധമുണ്ട്. എം ആര്‍ ഐ ഇമേജിങ്ങിന്, ഫാസ്റ്റ് ലോ ആംഗിള്‍ ഷോട്ട് ടെക്‌നിക് നല്‍കി അതിനെ ഇപ്പോഴത്തെ രീതിയിലുള്ള ഫ്‌ലാഷ് ആക്കി വികസിപ്പിച്ചെടുത്ത് ഈ രംഗത്ത് വിപ്ലവകരമായ മാറ്റം കൊണ്ട് വന്നത് 1985-ല്‍ ആയിരുന്നു.

അദ്ദേഹം ഫ്‌ലാഷ് സാങ്കേതികവിദ്യ കണ്ടുപിടിയ്ക്കുന്നതിനു മുന്‍പ് പരമ്പരാഗത എം ആര്‍ ഐ സാങ്കേതിക വിദ്യ ഉപയോഗിച്ച് ഒരു 3 ഡി ഇമേജ് എടുക്കണമെങ്കില്‍ 5 മണിക്കൂറോളം വേണ്ടി വരുമായിരുന്നു. ഫ്‌ലാഷ് സാങ്കേതിക വിദ്യ എത്തിയതോടെ അത്തരം ഒരു ഇമേജിന് വേണ്ട സ്‌കാനിംഗ് സമയം എതാനും മിനിറ്റുകള്‍ മാത്രമായി ചുരുങ്ങി.

അവിടെ നിന്നാണ് എം ആര്‍ ഐ സ്‌കാന്‍ ചിത്രങ്ങള്‍ക്ക് പകരം സ്‌കാന്‍ വീഡിയോകള്‍ ലഭ്യമാകുന്ന നിലയിലെത്തിയത്.അങ്ങനെ ഹൃദയം മിടിയ്ക്കുന്നതിന്റെയും സന്ധികള്‍ ചലിയ്ക്കുന്നതിന്റേയും ഒക്കെ വീഡിയോ ലഭിയ്ക്കാന്‍ ഇടയായി. ഇത് കൂടാതെ നാം എന്തെങ്കിലും വിഴുങ്ങുമ്പോഴും സംസാരം പുറപ്പെടുവിയ്ക്കുമ്പോഴും ഒക്കെ നടക്കുന്ന ആന്തരിക ചലനങ്ങളുടെ വീഡിയോ എടുക്കാന്‍ കഴിഞ്ഞത് ഫ്‌ലാഷ് 2 സാങ്കേതികവിദ്യയുടെ സഹായത്താലാണ്.

ഇപ്പോള്‍ ജര്‍മനി,യു. കെ , യു എസ് എന്നിവിടങ്ങളില്‍ ഫ്‌ലാഷ് 2-വിന്റെ ക്ലിനിക്കല്‍ പരിശോധനകള്‍ നടക്കുകയാണെന്ന് മാക്‌സ് പ്ലാങ്ക് അധികൃതര്‍ അറിയിച്ചു.