പ്രണവ് മോഹന്‍ലാലിന്റെ സിനിമാ അരങ്ങേറ്റം താരപുത്രന്‍ എന്ന മേല്‍വിലാസത്തില്‍ തന്നെയായിരുന്നു. ഇതുവരെ മറ്റൊരു താരപുത്രന്റെയും അരങ്ങേറ്റം ആഘോഷമാക്കിയിട്ടില്ലാത്തതുപോലെ പ്രണവിനെ ആരാധകര്‍ ആഘോഷമാക്കി. മോഹന്‍ലാലിന്റെ നിര്‍മ്മാണ കമ്പനിയായ ആശിര്‍വാദ് തന്നെ മകന്റെ ആദ്യ സിനിമ നിര്‍മ്മിച്ചു. പക്ഷേ ഇതിലൊന്നും താല്‍പ്പര്യമില്ലാത്ത വ്യക്തിയാണ് പ്രണവ്. ഇതുവരെ ഒരു അഭിമുഖം പോലും നല്‍കുകയോ പൊതുവേദിയില്‍ വരാനോ താല്‍പ്പര്യം കാണിച്ചിട്ടില്ല. ആദ്യ സിനിമ റിലീസായ സമയം ഹിമാലയ യാത്രയിലായിരുന്നു പ്രണവ്. അങ്ങനെ ഏറെ സ്വകാര്യ ജീവിതം ആഗ്രഹിക്കുന്ന പ്രണവും മലയാള സിനിമയില്‍ രാജാവായി നില്‍ക്കുന്ന മോഹന്‍ലാലും തമ്മില്‍ സിനിമയോടുള്ള കാഴ്ചപ്പാടില്‍ അന്തരമുണ്ട്.

പ്രണവിന് സിനിമയോട് താല്‍പ്പര്യമില്ലെന്ന് മോഹന്‍ലാല്‍ തുറന്നു പറഞ്ഞിട്ടുണ്ട്. ഇപ്പോള്‍ പ്രണവിന്റെ രണ്ടാമത്തെ സിനിമയായ ഇരുപത്തിയൊന്നാം നൂറ്റാണ്ട് വിമര്‍ശനങ്ങള്‍ നേരിട്ടപ്പോള്‍ ഇതില്‍ പ്രതികരിച്ചിരിക്കുകയാണ് ലാല്‍. 'അഭിനയ ജീവിതത്തില്‍ എന്റെ തുടര്‍ച്ചയല്ല പ്രണവ്. അവന്റെ പ്രതിഭയും ദൈവാനുഗ്രഹവുമായി ബന്ധപ്പെട്ടാണ് അതെല്ലാമിരിക്കുന്നത്. തുടരാന്‍ പറ്റുമെങ്കില്‍ അവന്‍ തുടരും ഇല്ലെങ്കില്‍ മറ്റെന്തെങ്കിലും ജോലി കണ്ടെത്തും' എന്ന് മോഹന്‍ലാല്‍ പറഞ്ഞു. കുടുംബത്തിന്റെയും സുഹൃത്തുക്കളുടെയും നിര്‍ബന്ധത്തിന് വഴങ്ങിയാണ് പ്രണവ് ആദ്യ സിനിമ ചെയ്തത്. ഞാന്‍ പെട്ടുപോയി എന്നാണ് അവന്‍ പറയുന്നതെന്ന് നേരത്തേ മോഹന്‍ലാല്‍ പറഞ്ഞിട്ടുണ്ട്.

ഇരുപത്തിയൊന്നാം നൂറ്റാണ്ടിനെക്കുറിച്ച് സമ്മിശ്ര പ്രതികരണങ്ങളായിരുന്നു വന്നത്. ഇതിലെ പ്രണവിന്റെ അഭിനയത്തെ വിമര്‍ശിച്ച് ഒരു അധ്യാപിക രംഗത്തെത്തിയത് ചര്‍ച്ചയായിരുന്നു. രാമലീല സംവിധായകന്‍ അരുണ്‍ഗോപിയാണ് ഇരുപത്തിയൊന്നാം നൂറ്റാണ്ട് ഒരുക്കിയത്. ടോമിച്ചന്‍ മുളകുപാടമാണ് നിര്‍മ്മാണം. ചിത്രം തീയറ്ററുകളില്‍ പ്രദര്‍ശനം തുടരുകയാണ്.