സിനിമാക്കാരെ പിണക്കി ടിക്കറ്റുകള്ക്ക് മുകളില് വിനോദ നികുതി ഏര്പ്പെടുത്തിയ ബജറ്റ് നിര്ദ്ദേശം പിന്വലിക്കണമെന്നാവശ്യപ്പെട്ട് മോഹന്ലാലിന്റെ നേതൃത്വത്തില് നടത്തിയ ചര്ച്ച ഫലം കണ്ടു, പരിശോധിക്കാമെന്ന് മുഖ്യമന്ത്രിയുടെ ഉറപ്പ്
സിനിമ ടിക്കറ്റുകള്ക്ക് മുകളില് വിനോദ നികുതി ഏര്പ്പെടുത്തിയ ബജറ്റ് നിര്ദ്ദേശം പിന്വലിക്കണമെന്നാവശ്യപ്പെട്ട് സിനിമ പ്രതിനിധികള് മുഖ്യമന്ത്രി പിണറായി വിജയനുമായി കൂടിക്കാഴ്ച നടത്തി. അമ്മ പ്രതിനിധികളായി മമ്മൂട്ടിയും മോഹന്ലാലും ഫെഫ്കയെ പ്രതിനിധീകരിച്ച് ബി.ഉണ്ണികൃഷ്ണനും രഞ്ജിത്തും ചര്ച്ചയില് പങ്കെടുത്തു. എറണാകുളം ഗസ്റ്റ് ഹൗസിലായിരുന്നു താരങ്ങളുടെയും മുഖ്യമന്ത്രിയുടെയും കൂടിക്കാഴ്ച. ടിക്കറ്റ് നിരക്കിലെ നിര്ദ്ദേശങ്ങള് വ്യക്തമാക്കിക്കൊണ്ട്് താരങ്ങള് മുഖ്യമന്ത്രിക്ക് നിവേദനവും നല്കി.
സിനിമാ ടിക്കറ്റുകള്ക്ക് വിനോദ നികുതി ഏര്പ്പെടുത്തിയത് സിനിമാ വ്യവസായത്തെ സാരമായി ബാധിക്കുമെന്ന് ഫെഫ്കയടക്കമുള്ള സംഘടനകള് നേരത്തെ തന്നെ വ്യക്തമാക്കിയിരുന്നു. ഈ സാഹചര്യത്തിലാണ് ഇത് സംബന്ധിച്ച് മുഖ്യമന്ത്രിയുമായി ഒരു ചര്ച്ച നടത്താന് സംഘടനകള് തീരുമാനിച്ചതും. ഇക്കാര്യം സംബന്ധിച്ച പരാതി അടുത്ത മന്ത്രിസഭായോഗത്തില് പരിഗണിക്കാമെന്ന് മുഖ്യമന്ത്രി ഉറപ്പ് നല്കിയതായി സംവിധായകന് ബി ഉണ്ണികൃഷ്ണന് കൂടിക്കാഴ്ചക്ക് ശേഷം പ്രതികരിച്ചു.
ചലച്ചിത്ര മേഖലക്കും കലാകാരന്മാര്ക്കും സിനിമാ മേഖലക്കും പ്രോത്സാഹനം നല്കി സര്ക്കാര് ഒപ്പമുണ്ടാകുമെന്നായിരുന്നു ചര്ച്ചയില് മുഖ്യമന്ത്രി താരങ്ങളെ അറിയിച്ചത്. കഴിഞ്ഞ സംസ്ഥാന ബജറ്റിലാണ് സിനിമാ ടിക്കറ്റിന് മേല് അധിക പത്ത് ശതമാനം വിനോദ നികുതി ഏര്പ്പെടുത്താനുള്ള നിര്ദ്ദേശം ധനമന്ത്രി തോമസ് ഐസക് മുന്നോട്ട് വെച്ചത്. തദ്ദേശ സ്വയംഭരണ സ്ഥാപനങ്ങള്ക്ക് പത്ത് ശതമാനം അധിക നികുതി ഈടാക്കാമെന്നായിരുന്നു ബജറ്റ് നിര്ദ്ദേശം.
എന്നാല് ആ തീരുമാനത്തെ എതിര്ക്കുന്ന തരത്തിലായിരുന്നു പല ചലച്ചിത്ര സംഘടനകളും രംഗത്തെത്തിയത്. സിനിമാ വ്യവസായത്തെ തന്നെ തകര്ക്കുന്ന നിര്ദ്ദേശമാണിതെന്നായിരുന്നു പ്രധാന ആരോപണം. നേരത്തെ ജിഎസ്ടി വന്നതിന് ശേഷം സിനിമാ ടിക്കറ്റിന്റെ നികുതി നിരക്കുകള് കുറച്ചിരുന്നു. നൂറ് രൂപക്ക് മുകളില് വിലയുണ്ടായിരുന്ന സാധനങ്ങള്ക്ക് 28 ശതമാനം നികുതിയുണ്ടായിരുന്ന സ്ഥാനത്ത് ജിഎസ്ടിവന്നപ്പോള് 18 ഉം നൂറ് രൂപക്ക് താഴെയുള്ള ടിക്കറ്റുകള്ക്ക് 12 ശതമാനവുമായി കുറഞ്ഞു.
കുറവ് നികുതി നിരക്കില് ജനങ്ങള് സിനിമ കണ്ടുകൊണ്ടിരുന്ന സമയത്താണ് ഇരുട്ടടി പോലെ ധനമന്ത്രിയുടെ പുതിയ പ്രഖ്യാപനമെത്തിയത്. ഇത് നടപ്പിലായാല് തിയേറ്ററുകളിലെത്തുന്ന പ്രേക്ഷകരുടെ എണ്ണത്തില് ഗണ്യമായ കുറവുണ്ടാകുമെന്നും അത് സിനിമാ വ്യവസായത്തെ ബാധിക്കുമെന്നുമായിരുന്നു ചലച്ചിത്രലോകത്തെ അഭിപ്രായം. ഇക്കാര്യങ്ങള് ചൂണ്ടിക്കാട്ടിയായിരുന്നു മുഖ്യമന്ത്രിയുമായുള്ള കൂടിക്കാഴ്ച.
പത്ത് മിനിട്ടോളം മാത്രമായിരുന്നു കൂടിക്കാഴ്ച നടന്നത്. അത് കൊണ്ട് തന്നെ സിനിമാ ലോകത്തെ നിലവിലുള്ള മറ്റ് പ്രശ്നങ്ങളൊന്നും ചര്ച്ചായായിട്ടില്ല. എന്തായാലും അടുത്ത മന്തിസഭായോഗം നടക്കാനിരിക്കെ പ്രതീക്ഷയിലാണ് ചലച്ചിത്രലോകവും പ്രേക്ഷകരും....
https://www.facebook.com/Malayalivartha