വളരെ പബ്ല്‌സിറ്റി കിട്ടുന്ന രണ്ട് മേഖലകളാണല്ലോ രാഷ്ട്രീയവും സിനിമയും. രാഷ്ട്രീയത്തെ ആവശത്തോടെ കാണുന്ന ചില ചലച്ചിത്രതാരങ്ങളുണ്ട്. രാഷ്ട്രീയം എന്ന മേഖലയില്‍ ഒരു കൈ നോക്കിയാലോ എന്ന് ചിന്തിക്കുന്ന നിരവധി താരങ്ങള്‍ മലയാളത്തിലുണ്ട്. എന്നാല്‍, രാഷ്ട്രീയത്തെ പൂര്‍ണമായി അവഗണിക്കുന്ന ഒരു കൂട്ടം ചലച്ചിത്രതാരങ്ങളുമുണ്ട്. ആരെക്കെയാണെന്നറിയാന്‍ എല്ലാവര്‍ക്കും ആഗ്രഹമുണ്ടാകും. മലയാളത്തിന്റെ പ്രിയ താരങ്ങളായ ജഗദീഷ്, സലീം കുമാര്‍, നവ്യ നായര്‍, ശ്രീനിവാസന്‍, കല്‍പന, ജയറാം, വിജയരാഘവന്‍, അനന്യ, ഉണ്ണി മുകുന്ദന്‍, രചന നാരായണന്‍കുട്ടി എന്നിവര്‍ അവരുടെ രാഷ്ട്രീയത്തെ കുറിച്ച് പറയുന്നു.
ചലച്ചിത്രമേഖലയിലുള്ളവര്‍ രാഷ്ട്രീയത്തിലേക്ക് വരുന്നത് നല്ലത് തന്നെയാണ്. എന്നാല്‍ സിനിമയില്‍ നിന്നും രാഷ്ട്രീയത്തിലേക്ക് പോകുമ്പോള്‍ സിനിമ പൂര്‍ണമായും ഉപേക്ഷിക്കണം. കാരണം, രണ്ടും കൂടെ കൊണ്ട് പോകാന്‍ പ്രയാസമായിരിക്കും. ഒരു ജനപ്രതിനിധി എന്ന നിലയില്‍ ഒരു പാട് കാര്യങ്ങള്‍ ചെയ്യാനുണ്ടാവും. കുറച്ച് സിനിമ, കുറച്ച് രാഷ്ട്രീയം ഈ നിലയില്‍ കൊണ്ടു പോയാല്‍ രണ്ട് മേഖലയിലും ആത്മാര്‍ഥത പുലര്‍ത്താന്‍ സാധിക്കില്ല. എല്ലാം കൂടി കൈപിടിയില്‍ ഒതുക്കാന്‍ ശ്രമിക്കരുതെന്നും നടന്‍ ജഗദീഷ് പറയുന്നു.

ഞാനെന്നേ രാഷ്ട്രീയത്തില്‍ ഇറങ്ങിയ ആളാണ്. ആദ്യമായി മലയാള സിനിമയില്‍ രാഷ്ട്രീയം തുറന്നു പറഞ്ഞ ആളാണ്. ഞാനൊരു കോണ്‍ഗ്രസുകാരനാണ്. പാര്‍ലമെന്ററി രാഷ്ട്രീയത്തില്‍ ഇറങ്ങാന്‍ താല്‍പര്യമില്ലായെന്നും നടന്‍ സലീം കുമാര്‍ പറഞ്ഞു. എനിക്ക് രാഷ്ട്രീയത്തിലേക്ക് വരാന്‍ താല്‍പര്യമില്ല. ഇനി എന്നെങ്കിലും അങ്ങനെ ഒരു ആഗ്രഹം വരുമോ എന്ന് ഇപ്പോള്‍ പറയാന്‍ കഴിയില്ല. രാഷ്ട്രീയം മോശമായതു കൊണ്ടല്ല. എല്ലാ മേഖലയിലും നല്ലതും ചീത്തയുമുണ്ട്. രാഷ്ട്രീയം ജനസേവനമാണ്. രാഷ്ട്രീയം മുഴുവന്‍ അഴിമതിയൊന്നുമല്ല. അത് പാര്‍ട്ടിയുടേയും പ്രസ്ഥാനത്തിന്റേയും കുഴപ്പമല്ലയെന്നും നടി നവ്യാ നായര്‍ വ്യക്തമാക്കി. ജനങ്ങളെ സേവിക്കാന്‍ രാഷ്ട്രീയക്കാരന്റെ കുപ്പായമിടേണ്ട കാര്യമില്ല. സ്ഥാനമാനങ്ങള്‍ മോഹിക്കുന്നവരാണ് രാഷ്ട്രീയക്കാരന്റെ കുപ്പായമിട്ട് വരുന്നത്. മിക്കവാറും ആള്‍ക്കാര്‍ അങ്ങനെയാണ്.എനിക്ക് അങ്ങനെ യാതൊരു ദുര്‍ മോഹവുമില്ല. ഒരു സാഹചര്യത്തിലും അത്തരമൊരു പരിപാടിയുമായി ഞാനിറങ്ങില്ല. എനിക്കതില്‍ പൂര്‍ണ ബോധ്യമുണ്ടെന്നും നടന്‍ ശ്രീനിവാസന്‍ പറഞ്ഞു.
കലാപ്രവര്‍ത്തനവുമായി മുന്നോട്ടു പോകുക. രാഷ്ട്രീയത്തിലിറങ്ങാന്‍ യാതൊരു താല്‍പര്യവുമില്ല. നമുക്കതിനെക്കുറിച്ച് യാതൊരു പിടിയുമില്ല. ജനങ്ങളെ ചിരിപ്പിക്കുക എന്നതാണ് ഏറ്റവും വലിയ ജനസേവനമെന്നും നടി കല്‍പന പറഞ്ഞു. നല്ല കുറെ സിനിമകള്‍ ചെയ്യുക എന്നു മാത്രമേ ഇപ്പോള്‍ ഉദ്ദേശമുള്ളൂ. എന്തെങ്കിലും പ്ലാനുണ്ടെങ്കില്‍ ആദ്യം മാധ്യമങ്ങളെ അറിയിക്കുന്നതായിരിക്കും. ഇപ്പോള്‍ കലാപ്രവര്‍ത്തനവുമായി മുന്നോട്ടു പോകണമെന്നും നടന്‍ ജയറാം പറയുന്നു.

രാഷ്ട്രീയത്തിലേക്കില്ല. ജീവിക്കാന്‍ പണം വേണം. അതിന് അത്യാവശ്യം സിനിമയൊക്കെ ചെയ്യുന്നു. കയ്യില്‍ കാശില്ലാതെ രാഷ്ട്രീയത്തിലിറങ്ങിയാല്‍ മറ്റുള്ളവരുടെ പണം കയ്യിട്ടു വാരാന്‍ തോന്നും. എന്തിന് വെറുതെ പാപം ചെയ്യണം. അഴിമതിക്കാരനെന്ന പേര് കേള്‍ക്കണം? എന്നും നടന്‍ വിജയരാഘവന്‍ ചോദിക്കുന്നു.
തല്‍ക്കാലം രാഷ്ട്രീയത്തില്‍ ഇറങ്ങാന്‍ താല്‍പര്യമില്ല. അതൊരു വലിയ ലോകമാണ്. എന്റെ വീട്ടുകാര്‍ക്കെല്ലാം വ്യക്തമായ രാഷ്ട്രീയമുണ്ട്. എന്റെ മുത്തച്ഛന്‍ വലിയ രാഷ്ട്രീയ നേതാവാണ്. അതുകൊണ്ട് തന്നെ ഭാവിയില്‍ രാഷ്ട്രീയത്തില്‍ നിന്നൊരു ഓഫര്‍ വന്നാല്‍ നിരസിക്കുമോ എന്ന് പറയാന്‍ കഴിയില്ലയെന്നും നടി അനന്യ വ്യക്തമാക്കി. ജോലിയില്‍ ആദ്യം പെര്‍ഫെക്ട് ആവട്ടെ, എന്നിട്ട് മതി രാഷ്ട്രീയമൊക്കെ, തല്‍ക്കാലം അതിനെക്കുറിച്ചൊന്നും ചിന്തിക്കുന്നില്ല. എനിക്ക് അതിനുള്ള പക്വതയൊന്നും ആയിട്ടില്ലയെന്ന് യുവതാരം ഉണ്ണി മുകുന്ദന്‍ തന്റെ അഭിപ്രായം വ്യക്തമാക്കി.

അറിയുന്ന പണി ചെയ്താല്‍ പോരെ .എന്തിനാണ് ആവശ്യമില്ലാത്ത പണിക്കു പോകുന്നത്. നൃത്തമാണ് എനിക്ക് പ്രാധാനം. പിന്നെ അഭിനയവും. ജനങ്ങളെ രസിപ്പിക്കാന്‍ ഇത്രയും ചെയ്താല്‍ പോരെയെന്നും നടി രചന നാരായണന്‍ കുട്ടി ചോദിച്ചു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha