ഹൃദയ സംബന്ധമായ അസുഖത്തെ തുടര്‍ന്ന് കഴിഞ്ഞ 20 ദിവസങ്ങളായി ചികിത്സയിലായിരുന്ന നടന്‍ ശ്രീനിവാസന്‍ ആശുപത്രി വിട്ടു. മാര്‍ച്ച് 30നാണ് അങ്കമാലിയിലെ അപ്പോളോ അഡ്‌ലക്‌സ് ആശുപത്രിയില്‍ താരത്തെ പ്രവേശിപ്പിച്ചിരുന്നത്. നെഞ്ചുവേദന അനുഭവപ്പെട്ടതിനെ തുടര്‍ന്നായിരുന്നു ഇത്. കൊച്ചി അപ്പോളോ ആഡ്ലക്സ് ആശുപത്രി അധികൃതര്‍ പുറത്തുവിട്ട മെഡിക്കല്‍ ബുളളറ്റിനിലാണ് നടന്‍ ആശുപത്രി വിട്ട വിവരം സ്ഥിരീകരിച്ചത്. ശ്രീനിവാസന്റെ ആരോഗ്യാവസ്ഥ തൃപ്തികരമാണെന്ന് ആശുപത്രി അധികൃതര്‍ പുറത്തുവിട്ട മെഡിക്കല്‍ ബുള്ളറ്റിനില്‍ പറയുന്നു.

ആന്‍ജിയോഗ്രാം പരിശോധന ടത്തിയപ്പോള്‍ നടന് ട്രിപ്പിള്‍ വെസ്സല്‍ ഡിസീസ് (ധമനികളിലെ രക്തമൊഴുക്കിന് തടസം നേരിടല്‍) കണ്ടെത്തി. പിന്നീട് മാര്‍ച്ച് 31 വ്യാഴാഴ്ച്ച ബൈപാസ് സര്‍ജറി നടത്തി. ശസ്ത്രക്രിയക്ക് ശേഷം മൂന്ന് ദിവസം വെന്റിലേറ്ററിലായിരുന്നു.

വെന്റിലേറ്ററില്‍ നിന്ന് മാറ്റിയതിന് പിന്നാലെ ശ്രീനിവാസന് അണുബാധയുണ്ടാകുകയും വീണ്ടും വെന്റിലേറ്ററില്‍ പ്രവേശിപ്പിക്കുകയുമായിരുന്നു. ആരോഗ്യ നില തൃപ്തികരമായതിനെ തുടര്‍ന്ന് ഈ മാസം 12ന് വെന്റിലേറ്ററില്‍ നിന്ന് മാറ്റിയിരുന്നു.

ഉയര്‍ന്ന രക്തസമ്മര്‍ദ്ദത്തിനും പ്രമേഹത്തിനും ശ്രീനിവാസന്‍ മുന്‍പ് പല തവണ ചികിത്സ തേടിയിട്ടുണ്ട്. 66കാരനായ നടന് ഹൃദ്രോഗമുള്ളതായും മുന്‍പ് ഡോക്ടര്‍മാര്‍ സ്ഥിരീകരിച്ചിരുന്നു.

ശ്രീനിവാസന്‍ ആശുപത്രിയില്‍ പ്രവേശിപ്പിക്കപ്പെട്ട വിവരം അറിഞ്ഞയുടന്‍ സമൂഹമാദ്ധ്യമങ്ങളില്‍ അദ്ദേഹത്തിന് ആദരാഞ്ജലി പോസ്റ്റുകള്‍ വന്നിരുന്നു. ഇതിനെതിരെ സിനിമാ മേഖലയില്‍ നിന്നുള്ളവരടക്കം രംഗത്തെത്തിയിരുന്നു. എന്നാല്‍ ഇതിനെക്കുറിച്ച് നിര്‍മ്മാതാവ് മനോജ് രാംസിംഗിനോട് നര്‍മ്മത്തില്‍ കലര്‍ന്ന മറുപടിയാണ് നടന്‍ പറഞ്ഞത്. 'ആദരവോടെ തരുന്നതല്ലേ ഒന്നും പാഴാക്കേണ്ട, കിട്ടുന്നതൊക്കെ എനിക്ക് തന്നേക്ക്, കൂടുതല്‍ ആയിപ്പോയാല്‍ മനോജിനും തന്നേക്കാം' എന്നാണ് നടന്‍ അന്ന് പ്രതികരിച്ചത്.