2022 ജനുവരിയിലാണ് പ്രിയങ്ക ചോപ്ര വാടകഗർഭധാരണത്തിലൂടെ മകളെ വരവേറ്റത്. മാൾട്ടി മേരി ചോപ്ര ജൊനാസ് എന്നാണ് മകളുടെ പേര്. മകളുടെ മുഖം വ്യക്തമാക്കാത്ത ചിത്രങ്ങൾ ആണ് താരം ഇപ്പോഴും സമൂഹ മാധ്യമങ്ങളിലൂടെ പങ്കുവയ്ക്കുന്നത്. 2018- ൽ ആണ് പ്രിയങ്ക ചോപ്രയും നിക്ക് ജൊനാസും വിവാഹിതരാകുന്നത്. 2017ലെ ഗലെ പുരസ്കാര വേദിയിൽ വച്ചാണ് ഇരുവരും കണ്ടുമുട്ടിയത്. പിന്നീട് പല പൊതുപരിപാടികളിലും ഒരുമിച്ചു പങ്കെടുത്ത ഇരുവരും പ്രണയത്തിലാവുകയായിരുന്നു.

ഏപ്രിൽ 19-നാണ് തെന്നിന്ത്യൻ താരം കാജൽ അഗർവാളിന് ഒരു ആൺകുഞ്ഞ് പിറന്നത്. മകൻ നീൽ കിച്ച്‍ലുവിനൊപ്പമുള്ള ചിത്രങ്ങൾ താരം സോഷ്യൽ മീഡിയയിലൂടെ പങ്കുവയ്ക്കാറുണ്ട്. മകൻറെ മുഖം വ്യക്തമാകുന്ന ചിത്രം അടുത്തിടെയാണ് താരം പങ്കുവച്ചത്. ‘നീൽ കിച്‌ലു-എന്റെ ജീവിതത്തിലെ സ്‌നേഹവും എന്റെ ഹൃദയത്തുടിപ്പും’- എന്നാണ് അന്ന് കാജൽ കുറിച്ചത്. നേരത്തെ ലോക മാതൃദിനത്തിലാണ് മകൻറെ ആദ്യ ചിത്രം സോഷ്യൽ മീഡിയയിലൂടെ കാജൽ പങ്കുവച്ചത്. എന്നാൽ കുട്ടിയുടെ മുഖം ഒട്ടും വ്യക്തമാവാത്ത രീതിയിലായിരുന്നു ആ ചിത്രം. ഡിസൈനറും വ്യവസായിയുമായ ഗൗതം കിച്‍ലുവുമായി 2020ലാണ് കാജൽ അഗർവാൾ വിവാഹിതയായത്. വിവാഹ ശേഷവും അഭിനയത്തിൽ സജീവമാണ് കാജൽ.

2022 ഓഗസ്റ്റ് 20-നാണ് ബോളിവുഡ് നടി സോനത്തിനും ഭർത്താവ് ആനന്ദ് അഹൂജയ്ക്കും മകൻ ജനിച്ചത്. ഇക്കാര്യം ഇരുവരും ചേർന്നാണ് ഇൻസ്റ്റഗ്രാമിലൂടെ ആരാധകരെ അറിയിച്ചത്. ‘തുറന്ന ഹൃദയത്തോടെ ഞങ്ങൾ ഞങ്ങളുടെ ആൺകുഞ്ഞിനെ സ്വാഗതം ചെയ്തു. ഈ യാത്രയിൽ ഒപ്പം നിന്ന എല്ലാ ഡോക്ടർമാർക്കും നഴ്സുമാർക്കും സുഹൃത്തുക്കൾക്കും കുടുംബാംഗങ്ങൾക്കും നന്ദി. ഇത് ഒരു തുടക്കമാണെന്നറിയാം, പക്ഷേ ജീവിതം ഇനി എന്നെന്നേക്കുമായി മാറുമെന്നും ഞങ്ങൾക്കറിയാം’- ഇരുവരും ഇൻസ്റ്റഗ്രാമിൽ പങ്കുവച്ച പോസ്റ്റിൽ കുറിച്ചു. അടുത്തിടെ മകൻ വായുവിന് വേണ്ടി വീട്ടിൽ ഒരുക്കിയ നഴ്സറിയുടെ ചിത്രങ്ങളും സോനം ഇൻസ്റ്റഗ്രാമിലൂടെ പങ്കുവച്ചിരുന്നു.

തമിഴകത്തിൻറെ താര റാണി നയൻതാരയ്ക്കും വിഘ്നേഷ് ശിവനും ഇരട്ടക്കുട്ടികൾ ജനിച്ച വാർത്തയാണ് ഈ വർഷം എല്ലാവരെയും ഞെട്ടിച്ചത്. 2022 ഒക്ടോബർ ഒമ്പതിന് വിഘ്നേഷ് ശിവനാണ് തങ്ങൾക്ക് രണ്ട് ആൺകുട്ടികൾ ജനിച്ച വിവരം സോഷ്യൽ മീഡിയയിലൂടെ അറിയിച്ചത്. വാടകഗർഭധാരണത്തിലൂടെ ആണ് നയൻതാര അമ്മയായത്. “നയനും ഞാനും അമ്മയും അപ്പയും ആയി. അനുഗ്രഹിക്കപ്പെട്ട ഇരട്ട കുഞ്ഞുങ്ങളാണ്. ഞങ്ങളുടെ ഉയിരിനും ഉലകത്തിനും നിങ്ങളുടെ എല്ലാ അനുഗ്രഹങ്ങളും വേണം”- എന്നാണ് സന്തോഷ വിവരം പങ്കുവച്ച് വിഘ്നേഷ് കുറിച്ചത്. ജൂൺ 9-ന് മഹാബലിപുരത്തു വച്ചായിരുന്നു നയൻതാര-വിഘ്നേഷ് ശിവൻ വിവാഹം നടന്നത്.

നവംബർ ആറിനാണ് ബോളിവുഡ് താരങ്ങളായ ആലിയ ഭട്ടിനും രൺബീർ കപൂറിനും ഒരു മകൾ പിറന്നത്. ആലിയ തന്നെയാണ് ഇക്കാര്യം സമൂഹ മാധ്യമങ്ങളിലൂടെ പങ്കുവച്ചത്. ‘റാഹ’ എന്നാണ് മകളുടെ പേര്. ഇൻസ്റ്റ​ഗ്രാമിലൂടെയാണ് മകൾക്കും രൺബീറിനുമൊപ്പമുള്ള ചിത്രം പങ്കുവച്ച് ആലിയ പേര് വെളിപ്പെടുത്തിയത്. കുഞ്ഞിൻറെ മുഖം വ്യക്തമാകാത്ത ചിത്രമാണ് ആലിയ ഇൻസ്റ്റഗ്രാമിലൂടെ പങ്കുവച്ചത്. അഞ്ച് വർഷത്തെ പ്രണയത്തിന് ശേഷം ഈ വർഷം ഏപ്രിൽ പതിനാലിനായിരുന്നു ആലിയയുടെയും രൺബീറിൻറെയും വിവാഹം.