ഒരങ്ങാടിയില്‍ പണ്ടെന്നോ കട നടത്തിയിരുന്ന ഒരാള്‍ വന്നിട്ട് കച്ചവടക്കാരോടെല്ലാം നാളെ ഈ തെരുവില്‍ ആരും കട നടത്തരുതെന്ന് പറയുന്നതുപോലെയാണ് സിനിമാനിര്‍മ്മാതാക്കളുടെ സംഘടന ഭരിക്കുന്ന നിര്‍മ്മാതാക്കള്‍ എന്ന് സംവിധായകന്‍ രഞ്ജിത്ത്. 'ലീല' എന്ന ചിത്രത്തിനെതിരെ നിര്‍മ്മാതാക്കളുടെ സംഘടന നിലപാടെടുത്തതില്‍ പ്രതിഷേധിച്ചാണ് രഞ്ജിത്ത് തുടര്‍ന്നടിച്ചത്.
സിനിമാതൊഴിലാളികള്‍ക്ക് ശമ്പളം വര്‍ധിപ്പിച്ച് നല്‍കിയതാണ് താന്‍ ചെയ്ത തെറ്റെന്ന് രഞ്ജിത്ത് പറയുന്നു. ആദ്യം ഉണരുകയും അവസാനം ഉറങ്ങുകയും ചെയ്യുന്നവരാണ് അവര്‍. ലീലയുടെ സഹപ്രവര്‍ത്തകര്‍ക്ക് വേതനം വര്‍ദ്ധിപ്പിച്ചതോടെ വിവാദം കൊഴുത്തു. നിര്‍മ്മാതാക്കളുടെ സംഘടനാതലപ്പത്തിരിക്കുന്ന പലര്‍ക്കും ഇപ്പോള്‍ സിനിമയില്‍ എന്താണ് നടക്കുന്നതെന്നറിയില്ലെന്നും രഞ്ജിത്ത് പറഞ്ഞു. അവര്‍ പത്തോ പതിനഞ്ചോ വര്‍ഷം മുമ്പ് സിനിമാനിര്‍മ്മാണം നിര്‍ത്തിയവരാണ്.
സംഘടനയിലുള്ളവരെല്ലാം വര്‍ഷങ്ങളായി സംഘടനാനേതാക്കളുടെ മണ്ടത്തരങ്ങള്‍ സഹിക്കുകയാണെന്നും രഞ്ജിത്ത് പറയുന്നു. ചലച്ചിത്രനിര്‍മ്മാതാവ് വിന്ധ്യന്‍ മരിക്കുമ്പോള്‍ അദ്ദേഹത്തിന് കോടികള്‍ കടമുണ്ടായിരുന്നു. സിനിമ പിടിച്ചുണ്ടായ കടമാണത്. അദ്ദേഹത്തിന്റെ അവസാനചിത്രമായ 'ഇലക്ട്ര'ഇപ്പോഴും പെട്ടിയിലാണ്. അത് പുറത്തിറക്കാനുള്ള വിവേകം പോലും നിര്‍മ്മാതാക്കളുടെ സംഘടന കാണിച്ചില്ലെന്നും രഞ്ജിത്ത്പ്രതിഷേധത്തോടെ പറഞ്ഞു.
ലീലയിലെ നായകനായി മമ്മൂട്ടിയേയും മോഹന്‍ലാലിനേയും തീരുമാനിച്ചതാണെന്നും എന്തുകൊണ്ടോ അത് നടക്കാതെ പോയെന്നും രഞ്ജിത്ത് പറഞ്ഞു.' ഇരുവരോടും കഥാപാത്രത്തെ കുറിച്ച് സംസാരിച്ചു. എന്നാല്‍ എനിക്കറിയാത്ത കാരണംകൊണ്ട് നടന്നില്ല'. നടന്‍ സുരേഷ്‌കൃഷ്ണയാണ് ബിജുമേനോനെ നായകനാക്കാന്‍ നിര്‍ദ്ദേശിച്ചത്. അതൊടുവില്‍ സംഭവിച്ചെന്നാണ് രഞ്ജിത്ത് പറഞ്ഞത്. ഇതിനു വേണ്ടി ശങ്കര്‍ രാമകൃഷ്ണനേയും മുരളീഗോപിയേയും വരെ നോക്കിയിരുന്നതായും രഞ്ജിത്ത് പറഞ്ഞു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha