സാമൂഹ്യമാധ്യമത്തിന്റെ സാധ്യതകള്‍ ഉപയോഗിച്ച് തന്നെ അപകീര്‍ത്തിപ്പെടുത്തുന്ന പ്രതിഭകളോട് മോഹന്‍ലാല്‍ പറയുന്നു; 'പോ മോനേ ദിനേശാ' ഒരു ദേശീയ ദിനപത്രത്തിന് നല്‍കിയ അഭിമുഖത്തിലാണ് സാമൂഹ്യ മാധ്യമത്തിലെ അന്താരാഷ്ട്ര പ്രതിഭകളോട് മോഹന്‍ലാലിന്റെ ഉപദേശം.
ഇത്തരം കക്ഷികളോട് പ്രതികരിക്കാന്‍ തനിക്ക് സമയമില്ലെന്നാണ് മോഹന്‍ലാലിന് പറയാനുള്ളത്. സാമൂഹ്യ മാധ്യമങ്ങളില്‍ ആര്‍ക്കും എപ്പോഴും എന്തും പറയാമെന്ന അവസ്ഥയാണുള്ളതെന്നും മോഹന്‍ലാല്‍ പറയുന്നു. പ്രതികരിക്കാന്‍ നിന്നാല്‍ സമയംപോകും. തനിക്കാണെങ്കില്‍ സര്‍ഗ്ഗാത്മകമായ നിരവധി ജോലികള്‍ ചെയ്തു തീര്‍ക്കാനുണ്ട്. ആരെങ്കിലുമൊക്കെ സംസാരിക്കുന്നതിനോട് പ്രതികരിക്കുമ്പോഴാണ് കുഴപ്പം. പ്രതികരിക്കുന്നവര്‍ ആരാണെന്നും അവരോട് പ്രതികരിച്ചതുകൊണ്ട് എന്തെങ്കിലും ഫലമുണ്ടോ എന്നും മനസ്സിലാക്കിയിരിക്കണം.
സാമൂഹ്യ മാധ്യമങ്ങളില്‍ ആരെയെങ്കിലും അപകീര്‍ത്തിപ്പെടുത്തുന്ന തരത്തില്‍ പോസ്റ്റിങ്ങ് നടത്തുന്നവര്‍ വെറുതെ സമയം കളയുകയാണെന്ന് മോഹന്‍ലാല്‍ പറയുന്നു. ജീവിതത്തില്‍ സമയത്തിന് വളരെയധികം വിലയുണ്ട്. സമയം ക്രിയാത്മകമായി ഉപയോഗിക്കണം. തന്നെ ആക്രമിക്കാന്‍ തയ്യാറായിക്കോളൂ എന്നല്ല ഇതിനര്‍ത്ഥം. ഒരുപാട് പേര്‍ സാമൂഹ്യ മാധ്യമങ്ങളില്‍ തനിക്കെതിരെ എഴുതുന്നുണ്ടെന്നും മോഹന്‍ലാല്‍ പറയുന്നു. ചിലര്‍ തനിക്കെതിരെ കേസ് കൊടുക്കുന്നു. ഇതിനെ ജോലിയുടെ ഭാഗമായാണ് താന്‍ കാണുന്നത്. തൊഴില്‍പരമായ തലവേദനയായി മാത്രമേ താന്‍ ഇതിനെ കാണുകയുള്ളൂവെന്നും മോഹന്‍ലാല്‍ പറയുന്നു. പ്രശസ്ത വ്യക്തികള്‍ക്കെതിരെ ഇത്തരം വ്യക്തിഹത്യകള്‍ സ്വാഭാവികം മാത്രമാണ്. അതിനെക്കുറിച്ചോര്‍ത്ത് വ്യാകുലപ്പെടാന്‍ താനില്ലെന്നും അദ്ദേഹം പറയുന്നു. ജെ.എന്‍.യു വിഷയത്തില്‍ മോഹന്‍ലാല്‍ എഴുതിയ ബ്ലോഗ് വിവാദങ്ങള്‍ക്ക് കാരണമായിരുന്നു. കലാഭവന്‍ മണിയുടെ വീട്ടില്‍ മോഹന്‍ലാല്‍ എത്താത്തതും വിവാദത്തിനു കാരണമായിരുന്നു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha