മോഹന്‍ലാലിന്റെ നായികയായി റോക്ക് ആന്‍ഡ് റോള്‍ എന്ന ചിത്രത്തിലൂടെയായിരുന്നു നടി റായ് ലക്ഷ്മി മലയാളത്തിലെത്തിയത്. തുടര്‍ന്ന് മമ്മൂട്ടിയുടെയും മോഹന്‍ലാലിന്റെയും നായികയായി ഒട്ടേറെ ഹിറ്റ് ചിത്രങ്ങളിലും നടി അഭിനയിച്ചിരുന്നു. തെന്നിന്ത്യന്‍ സിനിമകളിലൂടെ തിളങ്ങിയ നടി അടുത്തിടെയായിരുന്നു ബോളിവുഡ് അരങ്ങേറ്റം കുറിച്ചിരുന്നത്.

ജൂലി എന്ന സൂപ്പര്‍ഹിറ്റ് ചിത്രത്തിന്റെ രണ്ടാം ഭാഗത്തിലായിരുന്നു നടി അഭിനയിച്ചിരുന്നത്. എന്നാല്‍ വലിയ പ്രതീക്ഷകളുമായി എത്തിയ ചിത്രം ബോക്‌സ് ഓഫീസില്‍ പരാജയപ്പെട്ടിരുന്നു. അടുത്തിടെ ചിത്രത്തിന് പ്രതീക്ഷിച്ച വിജയം കൈവരിക്കാന്‍ സാധിക്കാതെ പോയതിന്റെ കാരണം റായ് ലക്ഷ്മി തന്നെ പറഞ്ഞിരുന്നു.

ദീപക്ക് ശിവ്ദസനി സംവിധാനം ചെയ്ത ജൂലി 2 എന്ന ചിത്രത്തിലൂടെയായിരുന്നു നടി ബോളിവുഡ് അരങ്ങേറ്റം നടത്തിയിരുന്നത്. ചിത്രത്തില്‍ ജൂലി എന്ന ടൈറ്റില്‍ റോളില്‍ തന്നെയായിരുന്നു നടി എത്തിയിരുന്നത്. ചിത്രത്തില്‍ ശ്രദ്ധേയ പ്രകടനമായിരുന്നു റായ് ലക്ഷ്മി നടത്തിയിരുന്നത്. ഗ്ലാമറിന് പ്രാധാന്യം നല്‍കിയുളള ഒരു കഥാപാത്രമായിരുന്നു ചിത്രത്തില്‍ നടി അവതരിപ്പിച്ചിരുന്നത്. ഒരു ത്രില്ലര്‍ സിനിമയായിട്ടായിരുന്നു സംവിധായകന്‍ ചിത്രം അണിയിച്ചൊരുക്കിയിരുന്നത്.

വലിയ പ്രതീക്ഷകളുമായി എത്തിയ ചിത്രം ബോക്‌സ് ഓഫീസില്‍ പരാജയപ്പെട്ടിരുന്നു. മുടക്കുമുതല്‍ പോലും തിരിച്ചുപിടിക്കാന്‍ സാധിക്കാതെയാണ് ചിത്രം ബോക്‌സ് ഓഫീസില്‍ തകര്‍ന്നു തരിപ്പണമായത്. റായ് ലക്ഷ്മി ഏറെ പ്രതീക്ഷയര്‍പ്പിച്ച് ചെയ്‌തൊരു ചിത്രം കൂടിയായിരുന്നു ജൂലി 2. എന്നാല്‍ ചിത്രത്തിന് സംഭവിച്ച പരാജയം നടിയ്ക്ക് വിഷമമുണ്ടാക്കിയിരുന്നു.

തെറ്റായ മാര്‍ക്കറ്റിംഗ് കാരണമാണ് ജൂലി 2 പരാജയപ്പെട്ടതെന്ന് റായ് ലക്ഷ്മി പറയുന്നു. വലിയ രീതിയില്‍ ജനശ്രദ്ധയാകര്‍ഷിക്കാനാണ് മാര്‍ക്കറ്റിംഗ് ടീം ശ്രമിച്ചതെങ്കിലും അത് കാര്യമായി വിജയിച്ചില്ല. എല്ലാം അബദ്ധത്തില്‍ചെന്ന് ചാടുകയായിരുന്നു. സിനിമ ഒരു ഇറോട്ടിക്ക് ത്രില്ലര്‍ ആണെന്ന പ്രതീതിയാണ് ട്രെയിലര്‍ വഴി ഉണ്ടാക്കിയത്. ഇത് കുടുംബ പ്രേക്ഷകരെ തിയ്യേറ്ററുകളില്‍ നിന്നും അകറ്റിനിര്‍ത്തിയിരുന്നു.

സിനിമയില്‍ നല്ലൊരു സന്ദേശമുണ്ടായിരുന്നെന്നും മികച്ചൊരു കഥാപാത്രമായിരുന്നു തന്റെതെന്നും നടി പറയുന്നു. സ്ത്രീകള്‍ സിനിമ കാണണമെന്ന് തന്റെ വലിയ ആഗ്രഹമായിരുന്നു. എന്നാല്‍ ചില തെറ്റിദ്ധാരണകള്‍ പരന്നത് സിനിമയുടെ വിജയത്തെ കാര്യമായി ബാധിച്ചു. എന്നാല്‍ തനിക്കതില്‍ ഇപ്പോള്‍ നിരാശയില്ലെന്നും ബോളിവുഡില്‍ നിന്നും കുടുതല് ഓഫറുകള്‍ വരുന്നുണ്ടെന്നും റായ് ലക്ഷ്മി പറഞ്ഞു.