ബിഗ് ബോസ് പാതി വഴിയിലെത്തും മുന്‍പ് ശക്തയായ ഒരു മത്സരാര്‍ത്ഥികൂടി പുറത്തേക്ക്. ശ്വേത മേനോന്‍ ബിഗ് ബോസ് ഹൗസില്‍ നിന്ന് പുറത്തായപ്പോള്‍ പകരം അജ്ഞലി അമീറാണ് പുതിയ മത്സരാര്‍ത്ഥിയായി എത്തിയത്.നേരത്തെ ഡേവിഡ് ജോണ്‍, ഹിമ ശങ്കര്‍, ശ്രീലക്ഷ്മി, ദീപന്‍, ശ്രീലക്ഷ്മി എന്നിവരും പുറത്തായിരുന്നു.

നാടകീയമായ രംഗങ്ങളാണ് ഞായറാഴ്ചയിലെ 35-ാമത്തെ എപ്പിസോഡില്‍ അരങ്ങേറിയത്. ഇനി രഞ്ജിനി ഹരിദാസ്, തരികിട സാബു, അനൂപ് ചന്ദ്രന്‍, അതിഥി റായ്, ശ്രീനിഷ് അരവിന്ദ് എന്നിവരാണ് മത്സരത്തില്‍ ബാക്കിയുള്ളത്.ക്യാപ്റ്റനെ കുറിച്ചുള്ള ചര്‍ച്ചകളായിരുന്നു ബിഗ് ബോസില്‍ പ്രധാനമായും നടന്നത്. തുടര്‍ന്നാണ് രഞ്ജിനിയെ എലിമിനേഷനിലേക്ക് നോമിനേറ്റ് ചെയ്തത് ചര്‍ച്ചയായത്. ഷിയാസും സാബുവും തന്നെ നോമിനേറ്റ് ചെയ്തത് ശക്തനായ മത്സരാര്‍ഥിയായതുകൊണ്ടാണെന്ന് മനസിലാക്കാമെന്നും, എന്നാല്‍ സുരേഷേട്ടന്റെ നിലപാട് മനസിലാകുന്നില്ലെന്നും രഞ്ജിനി പറഞ്ഞു.

എലിമിനേഷനെ കുറിച്ച് ചോദിച്ചപ്പോള്‍ ശ്വേതയ്ക്ക് പറയാനുള്ളത് പേളിയെ കുറിച്ച് മാത്രമായിരുന്നു. പേളിയില്‍ നിന്ന് പ്രതീക്ഷിക്കാത്ത പെരുമാറ്റമാണ് തനിക്കുണ്ടായതെന്ന് ശ്വേത പറഞ്ഞു. താനും ശ്രീനിഷും മുറിയില്‍ ഇരുന്നപ്പോള്‍ പേളി അവിടെ നിന്ന് ഇറങ്ങിപ്പോയി എന്ന് ശ്വേത പറഞ്ഞു. അന്ന് തുടക്കമായതുകൊണ്ട് ആ സാഹചര്യത്തോട് പൊരുത്തപ്പെടാന്‍ സാധിക്കാത്തത് കൊണ്ടാണ് അങ്ങനെ ചെയ്തതെന്ന് പേളി പറഞ്ഞു.പേളിക്ക് തന്നോട് എന്താണ് പ്രശ്‌നമെന്ന് അറിയില്ലെന്ന് പറഞ്ഞ ശ്വേത വീണ്ടും പേളിയെ പറ്റി ആരോപണം ഉന്നയിച്ചു.

നെഗറ്റീവ് ആയ വ്യക്തിത്വമാണ് പേളിയില്‍ കണ്ടെതെന്നും ആദ്യമായാണ് ഒരാല്‍ തന്നോട് ഷട്ടപ്പ് പറഞ്ഞതെന്നും ശ്വേത കുറ്റപ്പെടുത്തി. രഞ്ജിനിക്ക് നന്ദി പറയാനും ശ്വേത മറന്നില്ല. നാടകീയ സംഭവങ്ങള്‍ക്കൊടുവിലായിരുന്നു രഞ്ജിനിയെ തിരിച്ചുകൊണ്ടുവന്നത്.രഞ്ജിനി തിരിച്ചുവരാന്‍ സാധ്യതയുണ്ടെന്നും രഞ്ജിനി ഇല്ലങ്കില്‍ ശൂന്യതയാണെന്നും പേളി പറഞ്ഞു. പുറത്താവുകയാണെങ്കില്‍ രണ്ടുപേരും പോണമെന്നായിരുന്നു അനൂപ് പറഞ്ഞത്. ഇരുവരും പുറത്തുപോകുന്നതില്‍ സങ്കടമില്ലെന്നായിരുന്നു അരിസ്‌റ്റോ സുരേഷ് പറഞ്ഞത്. സുരേഷാണ് തന്നെ വ്യക്തിപരമായി ആക്രമിച്ചതെന്ന് ശ്വേത ആരോപിച്ചു.

തനിക്ക് നീതി കിട്ടിയില്ലെന്ന് ശ്വേത പറഞ്ഞു.തുടര്‍ന്ന് ശ്വേതയ്ക്ക് ടാസ്‌ക് കൊടുത്തു. 11 മത്സരാര്‍ഥികളുടെ കട്ടൗട്ടുകളില്‍ വിജയിക്കുന്നവര്‍ക്ക് തിലകം ചാര്‍ത്താമെന്നും ഇഷ്ടമുള്ളയാളെ കെട്ടിപ്പിടിക്കാമെന്നും മോഹന്‍ലാല്‍ പറഞ്ഞു. അര്‍ച്ചനയ്ക്കാണ് ശ്വേത തിലകം ചാര്‍ത്തിയത്. പേളിയെ ശ്വേത ഇടിച്ചു തെറിപ്പിച്ചും സുരേഷിനെ വെടിവച്ചിട്ടുമാണ് ശ്വേത കലിയടക്കിയത്. കട്ടൗട്ടില്‍ ബിഗ് ബോസിലുള്ള ഇഷ്ടമുള്ളയാളെ കെട്ടിപ്പിടിക്കാന്‍ പറഞ്ഞപ്പോള്‍ യാതൊരു മറിച്ചൊന്നും ചിന്തിക്കാതെ മോഹന്‍ലാലിന്റെ കട്ടൗട്ടാണ് ശ്വേത കെട്ടിപ്പിടിച്ചത്.

അരിസ്‌റ്റോ സുരേഷ് തങ്ങള്‍ പറയുന്നതൊന്നും കേള്‍ക്കാതെ പേളി പറയുന്നത് മാത്രം കേള്‍ക്കുന്നതും രഞ്ജിനിയെയും ശ്വേതയെയും ചൊടിപ്പിച്ചിട്ടുണ്ട്.അഞ്ജലി അമീറാണ് പുതിയതായി ബിഗ് ബോസ് ഹൗസിലെത്തിയത്. ട്രാന്‍സ് വുമണായ അഞ്ജലി മമ്മൂട്ടിയുടെ പേരന്‍പ് എന്ന ചിത്രത്തില്‍ അഭിനയിച്ചിട്ടുണ്ട്.