വിരാട് കോഹ്ലി അനുഷ്‌ക താരജോഡികളുടെ വിവാത്തിനു ശേഷം പ്രേക്ഷകര്‍ ഏറെ ഉറ്റുനോക്കിയിരുന്നത് രണ്‍വീര്‍ ദീപിക വിവാഹമായിരുന്നു. ഈ വര്‍ഷം തന്നെ താരജോഡികളുടെ വിവാഹമുണ്ടാകുമെന്ന തരത്തില്‍ നിരവധി വാര്‍ത്തകളായിരുന്നു നേരത്തെ മാധ്യമങ്ങളില്‍ വന്നിരുന്നത്. വിവാഹത്തിനുളള ഒരുക്കങ്ങളിലാണ് ഇവരെന്നും വിദേശത്ത് വെച്ചായിരിക്കും നടക്കുകയെന്നുമാണ് നേരത്തെ റിപ്പോര്‍ട്ടുകള്‍ വന്നിരുന്നത്. എന്നാല്‍ വിവാഹ വാര്‍ത്തകളോട് ഇരുവരും പ്രതികരിച്ചിരുന്നില്ല.

കഴിഞ്ഞ ദിവസമായിരുന്നു രണ്‍വീറിനെയും ദീപികയെയും കാണിക്കുന്ന ഒരു വീഡിയോ സോഷ്യല്‍ മീഡിയില്‍ ഇറങ്ങിയിരുന്നത്. വെക്കേഷന്‍ ആഘോഷിക്കാനായി വിദേശത്ത് എത്തിയതായിരുന്നു താരജോഡികള്‍. ഇരുതാരങ്ങളുടെയും ആരാധികയായിരുന്നു വീഡിയോ ഇന്‍സ്റ്റഗ്രാമില്‍ പോസ്റ്റ് ചെയ്തത്. താരജോഡികളുടെ വീഡിയോ സോഷ്യല്‍ മീഡിയയില്‍ ഒന്നടങ്കം വൈറലായി മാറിയിരുന്നു

അതേസമയം വീഡിയോ എടുത്തതിന് താരജോഡികള്‍ ആക്രമിച്ചുവെന്ന് ആരോപിച്ച് രംഗത്തെത്തിയിരിക്കുകയാണ് ആരാധിക. സൈനബ് ഖാന്‍ എന്ന യുവതിയാണ് രണ്‍വീറിനും ദീപികയ്ക്കുമെതിരെ ആരോപണവുമായി രംഗത്തെത്തിയിരിക്കുന്നത്. സൈനബിന്റെ വീഡിയോ ഒരു ഫോട്ടോഗ്രാഫര്‍ ഇന്‍സ്റ്റഗ്രാമില്‍ ഷെയര്‍ ചെയ്തിരുന്നു. ഇതിന് താഴെയാണ് താരങ്ങള്‍ തന്നെ ആക്രമിച്ചുവെന്ന് വെളിപ്പെടുത്തി സൈനബ് കമന്റിട്ടത്.

ഞാനായിരുന്നു ഈ വീഡിയോ എടുത്തത്. വീഡിയോ എടുത്തതിന് അവര്‍ എന്നോട് അപമര്യാദയായി പെരുമാറി. ഈ സംഭവത്തിലൂടെ അവര്‍ക്ക് തങ്ങളുടെ ഒരു ആരാധികയെയാണ് നഷ്ടമായത്. സൈനബ് ഇന്‍സ്റ്റഗ്രാമില്‍ കുറിച്ചു. അതേസമയം യുവതിയെ അനുകൂലിച്ചും വിമര്‍ശിച്ചും നിരവധി പേര്‍ രംഗത്തെത്തിയിരുന്നു. താരങ്ങളുടെ സ്വകാര്യതയെ മാനിക്കാതെ വീഡിയോ എടുത്തത് ശരിയായില്ലെന്നാണ് വിമര്‍ശനങ്ങള്‍ വന്നത്.