ഈ ലോകത്തുനിന്നും യാത്രയായിട്ടും ആരാധക ഹ്യദയങ്ങളിലൂടെ ജീവിക്കുന്ന അപൂര്‍വം പ്രതിഭകളിലൊരാളാണ് അമേരിക്കന്‍ നടിയും മോഡലുമായ മെര്‍ലിന്‍ മണ്‍റോ. 'ദ മിസ് ഫിറ്റെ'ന്ന ചിത്രത്തിലെ നഗ്‌നയായ മെര്‍ലിന്‍ മണ്‍റോയുടെ ചിത്രമാണ് ഇപ്പോഴത്തെ ചര്‍ച്ചാ വിഷയം. നഷ്ടപ്പെട്ടുവെന്ന് കരുതിയ ദൃശ്യങ്ങളാണ് അരനൂറ്റാണ്ടിനുശേഷം കണ്ടെത്തിയിരിക്കുന്നത്.

1961ലാണ് 'ദ മിസ് ഫിറ്റെ'ന്ന സിനിമ ചിത്രീകരിക്കുന്നത്. ക്ലാര്‍ക്ക് ഗേബിളുമായുള്ള പ്രണയരംഗങ്ങള്‍ ചിത്രീകരിച്ചുകൊണ്ടിരിക്കുന്ന സമയത്താണ് രംഗത്തില്‍ ബെഡ് ഷീറ്റ് പുതച്ചുവന്ന മെര്‍ലിന്‍ പെട്ടെന്ന് അത് മാറ്റി നഗ്‌നയാവുകയായിരുന്നു. ''അങ്ങനെയൊരു നഗ്‌നരംഗം സ്‌ക്രിപ്റ്റിലുണ്ടായിരുന്നില്ല. എന്നാല്‍ കൂടുതല്‍ സ്വാഭാവികത തോന്നാന്‍ ആ രംഗം വന്നപ്പോള്‍ മണ്‍റോ ബെഡ്ഷീറ്റ് മാറ്റുകയായിരുന്നു. പിന്നീട് സിനിമയില്‍ ആ രംഗങ്ങള്‍ ആവശ്യമില്ലെന്ന് പറഞ്ഞ് സംവിധായകന്‍ ആ രംഗങ്ങള്‍ ഒഴിവാക്കുകയായിരുന്നു.

മെര്‍ലിന്‍ മണ്‍റോയെ കുറിച്ച് പുസ്തകമെഴുതുന്ന ചാള്‍സ് കാസിലോ ആണ് അരനൂറ്റാണ്ടിനുശേഷം നശിപ്പിക്കപ്പെട്ടുവെന്ന് കരുതിയ ആ ദൃശ്യങ്ങള്‍ കണ്ടെത്തിയിരിക്കുന്നത്. 'മെര്‍ലിന്‍ മണ്‍റോ: ദ പ്രൈവറ്റ് ലൈഫ് ഓഫ് എ പബ്ലിക് ഐക്കണ്‍' എന്ന പുസ്തകത്തിന്റെ പണിപ്പുരയിലാണ് കാസിലോ. ഇതിന്റെ ഭാഗമായി 'മിസ് ഫിറ്റി'ന്റെ പ്രൊഡ്യൂസര്‍ ഫ്രാങ്ക് ടൈലറുടെ മകന്‍ കര്‍ട്ടിസിനെ ഇന്റര്‍വ്യൂ ചെയ്യുമ്പോഴാണ് 1999 അച്ഛന്‍ മരിച്ച ശേഷം താന്‍ സൂക്ഷിച്ചുവച്ചിരിക്കുന്ന ഒരു ദൃശ്യമുണ്ടെന്ന് കര്‍ട്ടിസ് വെളിപ്പെടുത്തിയത്.

അതിന് വളരെ പ്രാധാന്യമുണ്ടെന്ന് കരുതിയാണ് താന്‍ അത് സൂക്ഷിച്ചുവച്ചതെന്നും കര്‍ട്ടിസ് ടൈലര്‍ പറഞ്ഞു. 36മത്തെ വയസിലാണ് മെര്‍ലിന്‍ മണ്‍റോ മരിക്കുന്നത്. മണ്‍റോയുടെ പൂര്‍ത്തിയായ സിനിമകളില്‍ അവസാനത്തേതായിരുന്നു അവരുടെ ഭര്‍ത്താവ് ആര്‍തര്‍ മില്ലറിന്റെ തിരക്കഥയില്‍ ഒരുങ്ങിയ മിസ് ഫിറ്റ്.