കേന്ദ്രമന്ത്രിയായി വി. മുരളീധരന്‍ സത്യപ്രതിജ്ഞ ചെയ്ത് അധികാരമേറ്റു. സഹമന്ത്രിയായാണ് കേന്ദ്രമന്ത്രിസഭയില്‍ മുരളീധരന്‍ എത്തുന്നത്. രാഷ്ട്രപതി രാംനാഥ് കോവിന്ദ് മുരളീധരന് സത്യവാചകം ചൊല്ലിക്കൊടുത്തു. നിലവില്‍ മഹാരാഷ്ട്രയില്‍ നിന്നുള്ള രാജ്യസഭ എംപിയാണ് മുരളീധരന്‍. കഴിഞ്ഞ മോദി മന്ത്രിസഭയില്‍ ടൂറിസം വകുപ്പിന്റെ ചുമതല ഉണ്ടായിരുന്ന അല്‍ഫോന്‍സ് കണ്ണന്താനത്തിന് ഇത്തവണ മന്ത്രി പദവിയില്ല. 

വ്യാഴാഴ്ച ഡല്‍ഹിയിലെത്തിയ മുരളീധരന് വൈകുന്നേരം മൂന്നോടെയാണ് സത്യപ്രതിജ്ഞയ്ക്ക് മുന്നോടിയായി മോദി നടത്തിയ ചായസത്കാരത്തിന് എത്തണം എന്ന അറിയിപ്പ് ലഭിക്കുന്നത്. ബിജെപി അധ്യക്ഷന്‍ അമിത്ഷാ ആണ് വിവരം ഫോണില്‍ വിളിച്ചറിയിച്ചത്. കേരളത്തിലെ ജനങ്ങള്‍ക്ക് കിട്ടിയ അംഗീകരമാണ് ഈ മന്ത്രി സ്ഥാനമെന്നായിരുന്നു മുരളീധരരന്റെ ആദ്യ പ്രതികരണം.

നരേന്ദ്ര മോദി എന്ന പ്രധാനമന്ത്രിയെ പിന്തുണക്കാന്‍ ആരെയും തെരഞ്ഞെടുത്തില്ലെങ്കിലും കേരളത്തിലെ ജനങ്ങളെ മോദി കൈവിടില്ല. ഇതിന്റെ സൂചനയായാണ് മന്ത്രിസഭയുടെ ഭാഗമാക്കിയത്. ജനങ്ങളുടേയും പാര്‍ട്ടി പ്രവര്‍ത്തകരുടേയും സംസ്ഥാന സര്‍ക്കാരിന്റെയും സഹകരണത്തോടെ ഈ ഉത്തരവാദിത്വം നിറവേറ്റാ നുള്ള പരിശ്രമം നടത്തുമെന്നും അദ്ദേഹം പറഞ്ഞു.

തലശേരി സ്വദേശിയായ മുരളീധരന്‍ ബിജെപിയുടെ വിദ്യാര്‍ഥി സംഘടനയായ എബിവിപിയുടെ സംസ്ഥാന സെക്രട്ടറിയായും അഖിലേന്ത്യാ ജനറല്‍ സെക്രട്ടറി യായും പ്രവര്‍ത്തിച്ചിട്ടുണ്ട്. ഡല്‍ഹി കേന്ദ്രീകരിച്ച് ഏറെ പ്രവര്‍ത്തിച്ച വി.മുരളീധരന് പാര്‍ട്ടി കേന്ദ്ര നേതൃവുമായി അടുത്തബന്ധമുണ്ട്. ഇതിനു പുറമേ ഹിന്ദി ഭാഷയിലുള്ള പരിജ്ഞാനവും അദ്ദേഹത്തെ സഹായിച്ചു. തലശേരിക്ക് സമീപം എരഞ്ഞോളിയാണ് മുരളീധരന്റെ ജന്മദേശം. അഛന്‍ ഗോപാലന്‍ സര്‍ക്കാര്‍ ഉദ്യോഗസ്ഥനായിരുന്നു. അമ്മ എന്‍.വി.ദേവകി െ്രെപമറി സ്‌കൂള്‍ ടീച്ചറായിരുന്നു. രണ്ട് സഹോദരന്മാരും ഒരു സഹോദരിയുമുണ്ട്.