കഴിഞ്ഞ വർഷം ഇന്ത്യൻ സിനിമയിൽ ഒരു കൊടുങ്കാറ്റ് സൃഷ്ടിച്ച ഒന്നായിരുന്നു മീടു വെളിപ്പെടുത്തൽ. ഹോളിവുഡിൽ ആരംഭിച്ച്‌ പിന്നീട് തെന്നിന്ത്യൻ സിനിമയിൽ വരെ വൻ ആക്രോശങ്ങളും വിവാദങ്ങളും സൃഷ്ടിച്ചിരുന്നു. നടിമാർക്ക് പുറമേ, സിനിമയിലെ സാങ്കേതിക പ്രവർത്തകരായ വനിതകളും മീടു വെളിപ്പെടുത്തലുമായി രംഗത്ത് വന്നിരുന്നു . ഇവരുടെ വെളിപ്പെടുത്തൽ വൻ ഞെട്ടലോടെയാണ് ആരാധകർ നേരിട്ടത്. ഇപ്പോൾ വീണ്ടും ഞെട്ടിക്കുന്ന വെളിപ്പെടുത്തലുമായി തെലുങ്ക് നടി ശാലു രംഗത്തെത്തിയിരിക്കുകയാണ്. തെലുങ്ക് സംവിധായകനെതിരെയാണ് നടിയുടെ വെളിപ്പെടുത്തൽ .
സംവിധായകന്റെ പേര് പറയാതെയായിരുന്നു നടിയുടെ വെളിപ്പെടുത്തൽ.

വിജയ് ദേവേരെക്കൊണ്ടയുടെ ചിത്രത്തിൽ അഭിനയിക്കാൻ വഴങ്ങി കെടുക്കണമെന്നായിരുന്നു സംവിധായകൻ പറഞ്ഞത്. സിനിമയുടെ ഓഡിഷന് സാരിധരിച്ചു വരാൻ സംവിധായകൻ തന്നോട് ആവശ്യപ്പെടുകയായിരുന്നു. അയാളുടെ ഓഫീസിൽ വെച്ചാണ് അഭിമുഖം എന്നാണ് പറഞ്ഞിരുന്നത്. മേൽ വിലാസവും നൽകിയിരുന്നു. എന്നാൽ അവിടെ എത്തിയപ്പോഴാണ് അത് ഓഫീസ് അല്ലെന്നും അയാളുടെ വീടാണെന്നും മനസ്സിലായത്. പിന്നീട് മോശമായ കാര്യങ്ങൾ സംസാരിക്കാൻ തുടങ്ങി. അപ്പോൾ ശരീരം വിയർക്കാൻ തുടങ്ങി. അയാൾ എസി ഓൺ ചെയ്തു. ചതി മനസ്സിലായതിനെ തുടർന്ന് അവിടെ നിന്ന് ഓടി രക്ഷപ്പെടുകയായിരുന്നു.

ആ സംവിധായകൻ ഒരിക്കലും സമ്മതിക്കില്ലെന്ന് ഉറപ്പുള്ളതു കൊണ്ടാണ് പരാതിപ്പെടാൻ ശ്രമിക്കാത്തതെന്നും ശാലു പറഞ്ഞു. സിനിമയിൽ നിന്ന് തനിക്ക് ആദ്യമായിട്ടല്ല ഇത്തരം അനുഭവം നേരിടേണ്ടി വന്നതെന്നും നടി പറഞ്ഞു. ഒരു ദേശീയ മാധ്യമത്തിന് നൽകിയ അഭിമുഖത്തിലാണ് താരം ഇക്കാര്യം വെളിപ്പെടുത്തിയത്.

വിവാദത്തിന് തൊട്ട് പിന്നാലെ ശാലുവിന്റെ വീഡിയോ വൈറലായിരുന്നു. ഓരാളോടൊപ്പം നൃത്തം ചെയ്യുന്ന വീഡിയോയാണ് പുറത്തു വന്നത്. ദൃശ്യങ്ങൾ സാമൂഹ്യ മാധ്യമങ്ങളിൽ വൈറലായതോടെ താരത്തിന് നേരം അസഭ്യവർഷവുമായി ചിലർ രംഗത്തെത്തുകയായിരുന്നു.വീഡിയോ പുറത്ത് വിട്ടത് ആരാണെന്ന് അറിയില്ലെന്നും അത് തന്റെ ഭാവി ജീവിതത്തെ ഗുരുതരമായി ബാധിക്കുമെന്ന ഭയമുണ്ടെന്നും നടി കൂട്ടിച്ചേര്‍ത്തു.