സിനിമ ചിത്രീകരണത്തിനിടെ നടന്‍ ടൊവിനോ തോമസിന്റെ ശരീരത്തില്‍ തീ പടര്‍ന്ന് നിസ്സാര പൊള്ളലേറ്റു. വെള്ളിയാഴ്ച ഉച്ചക്ക് എടക്കാട് നടന്ന 'എടക്കാട് ബറ്റാലിയന്‍ 06' എന്ന സിനിമയുടെ ചിത്രീകരണത്തിനിടെ ഡ്യൂപ്പില്ലാതെ അഭിനയിച്ചപ്പോഴായിരുന്നു സംഭവം നടന്നത്. തീ പടര്‍ന്ന് പിടിച്ചതോടെ സ്ഥലത്തുണ്ടായിരുന്ന അണിയറ പ്രവര്‍ത്തകര്‍ വെള്ളമൊഴിച്ച് തീയണക്കുകയും ഉടന്‍ വൈദ്യസഹായം ലഭ്യമാക്കുകയും ചെയ്തു.

താരത്തിനേറ്റ പരിക്ക് നിസ്സാരമാണെന്നും ആശങ്കപ്പെടേണ്ടതായി ഒന്നുമില്ലെന്നും അണിയറപ്രവര്‍ത്തകര്‍ അറിയിച്ചു. അപകടസാധ്യതയുള്ള രംഗത്ത് ഡ്യൂപ്പിനെ ഉപയോഗിക്കാമെന്ന് സംവിധായകന്‍ നിര്‍ബന്ധം പിടിച്ചെങ്കിലും അത് വേണ്ടെന്ന് ടൊവിനോ തീരുമാനിക്കുകയായിരുന്നു. സംഘട്ടനരംഗം അഭിനയിച്ച് പൂര്‍ത്തിയാക്കിയശേഷമാണ് അദ്ദേഹം പിന്‍വാങ്ങിയത്.