തീവണ്ടി എന്ന മലയാള സിനിമയിലൂടെയാണ് സംയുക്ത മേനോന്‍ മലയാളി സിനിമാ പ്രേക്ഷകരുടെ മനസില്‍ ഇടംപിടിച്ചത്. പുകവലിക്കുന്ന ടോവിനോ തോമസിന്റെ കഥാപാത്രത്തെ നന്നാക്കാന്‍ ശ്രമിക്കുന്ന കാമുകിയാണ് സിനിമയില്‍ സംയുക്ത മേനോന്‍. ഈ ചിത്രത്തില്‍ സംയുക്ത പുകവലിക്കാരനായ ടോവിനോയുടെ മുഖത്ത് അടിക്കുന്ന രംഗങ്ങളും നിരവധിയുണ്ട്. എന്നാല്‍ യഥാര്‍ത്ഥ ജീവിതത്തിലും ഇതിനു സമാനമായ ഒരു അനുഭവം സംയുക്തയ്ക്ക് നേരിടേണ്ടി വന്നിട്ടുള്ളത് അധികമാര്‍ക്കും അറിയില്ല. ഒരു അഭിമുഖത്തില്‍ 'ജീവിതത്തില്‍ ആരുടെയെങ്കിലും മുഖത്തടിച്ചിട്ടുണ്ടോ?' എന്ന ചോദ്യത്തിന് ഉത്തരമായായാണ് നടി തനിക്കുണ്ടായ ഒരു മോശം അനുഭവം വിവരിച്ചത്. തനിക്കും തന്റെ അമ്മയ്ക്കും മുന്‍പില്‍ വച്ച് പുകവലിച്ച ഒരാളുടെ മുഖത്തടിച്ചിട്ടുള്ള കാര്യമാണ് സംയുക്ത അഭിമുഖത്തിലൂടെ പറഞ്ഞത്.

സംയുക്തയുടെ വാക്കുകള്‍ കേള്‍ക്കാം. 'എന്റെ അമ്മയ്ക്കു ശ്വാസം മുട്ടുണ്ട്. അതുകൊണ്ട് പുകവലിക്കാരുടെ ഇടയില്‍ നില്‍ക്കാനേ പറ്റില്ല. ഒരിക്കല്‍ പൊതുനിരത്തില്‍ ഞാനും അമ്മയും കൂടെ നില്‍ക്കുകയായിരുന്നു. ഒരാള്‍ തൊട്ടപ്പുറത്തു നിന്ന് പുക വലിക്കുന്നുണ്ടായിരുന്നു. അമ്മ മൂക്കുപൊത്തി നില്‍ക്കുകയാണ്. അവിടെ നിന്നും മാറി നില്‍ക്കാനും സ്ഥലമില്ല. ഞാന്‍ അയാളുടെ അടുത്തുചെന്നു വളരെ മാന്യമായി പറഞ്ഞു. പുക വലിക്കുന്നതുകൊണ്ട് ബുദ്ധിമുട്ടുണ്ട്, ഇത് പുകവലിക്കാനുള്ള ഇടമല്ലല്ലോ എന്ന്. അപ്പുറത്ത് അതിനുള്ള സ്ഥലമുണ്ടല്ലോ എന്നും ഞാന്‍ അയാളോട് പറഞ്ഞു. പക്ഷേ വളരെ മോശമായാണ് അയാള്‍ എന്നോടു പ്രതികരിച്ചത്. പെട്ടെന്ന് എന്റെ നിയന്ത്രണം വിട്ടു, കൈ തരിക്കുകയും തുടര്‍ന്ന് അയാളുടെ മുഖത്തടിക്കുകയും ചെയ്തു. ഇതൊക്കെ കണ്ടു നിന്ന അമ്മയും ആകെ വല്ലാതായി. ഇത്രയൊക്കെ വേണമായിരുന്നോ എന്നായി അമ്മ. പക്ഷേ എല്ലാം സംഭവിച്ചുകഴിഞ്ഞില്ലേ? പിന്നെ ആ സമയത്ത് ഞാന്‍ സിനിമയില്‍ അഭിനയിച്ചിട്ടില്ല.' സംയുക്ത പറഞ്ഞുനിര്‍ത്തി.