കോവിഡ് രണ്ടാം തരംഗം തമിഴ് സിനിമാ രംഗത്തിന് നല്‍കിയത് കനത്ത ആഘാതമാണ്. കഴിഞ്ഞ കുറച്ചുമാസങ്ങളായി നിരവധി കലാകാരന്മാരും അവരുടെ ബന്ധുക്കളുമാണ് കോവിഡ് ബാധിച്ച്‌ മരിച്ചത്. ഏറ്റവും ഒടുവില്‍ നടനും നിര്‍മാതാവുമായ വെങ്കട്ട് ശുഭയാണ് ശനിയാഴ്ച പുലര്‍ച്ചെ കോവിഡ് ബാധിച്ച്‌ ചെന്നൈയിലെ സ്വകാര്യ ആശുപത്രിയില്‍ മരിച്ചത്.

വെങ്കട് ശുഭ പത്ത് ദിവസമായി കോവിഡ് ചികിത്സയിലായിരുന്നു. നിര്‍മാതാവും അടുത്ത സുഹൃത്തുമായ ടി ശിവയാണ് മരണവാര്‍ത്ത അറിയിച്ചത്. വെങ്കട് ശുഭയുടെ ആരോഗ്യനില മോശമായതിനെത്തുടര്‍ന്ന് കഴിഞ്ഞ ദിവസം തീവ്രപരിചരണ വിഭാഗത്തിലേക്ക് മാറ്റിയിരുന്നു. മൊഴി, അഴകിയ തീയേ, കണ്ട നാള്‍ മുതല്‍ തുടങ്ങിയ സിനിമകളില്‍ അദ്ദേഹം അഭിനയിച്ചിട്ടുണ്ട്. ഇതിനുപുറമെ തമിഴ് സീരിയലുകളിലും വേഷമിട്ടു. ടൂറിങ് ടാക്കീസ് എന്ന യൂട്യൂബ് ചാനലില്‍ സിനിമാ നിരൂപണ പരിപാടി അവതരിപ്പിച്ചിരുന്നു. ഹര്‍ഭജന്‍ സിംഗും ലോസ്ലിയായും അഭിനയിക്കുന്ന ഫ്രണ്ട് ഷിപ്പ് എന്ന സിനിമയിലും അദ്ദേഹം അഭിനയിച്ചിരുന്നു.