ഒരു റിയാലിറ്റി ഷോയില്‍ മത്സരാര്‍ത്ഥിയായി എത്തി മലയാളി പ്രേക്ഷകരുടെ പ്രിയങ്കരിയായി മാറിയ നടിയും അവതാരകയുമാണ് മീനാക്ഷി രവീന്ദ്രന്‍. പൊതുവേദികളിലെത്തുന്ന മീനാക്ഷി വിവിധ തരത്തിലുളള സൈബര്‍ ആക്രമണങ്ങളും നേരിട്ടിരുന്നു. കൂടുതലും വസ്ത്രധാരണത്തെക്കുറിച്ചുളള വിമര്‍ശനങ്ങളാണ് ഉണ്ടായത്. ഇപ്പോഴിതാ ഒരു യൂട്യൂബ് ചാനലിന് അനുവദിച്ച അഭിമുഖത്തില്‍ സൈബര്‍ ആക്രമണങ്ങളെക്കുറിച്ച് തുറന്നുപറഞ്ഞിരിക്കുകയാണ് മീനാക്ഷി.

'ഒരു പ്രമുഖ ചാനലിലെ പരിപാടിയില്‍ അവതാരകയായി എത്തിയിരുന്നു. ഒരിക്കല്‍ പോലും ആ പരിപാടിയില്‍ ഞാന്‍ എക്‌സ്‌പോസിംഗായിട്ടുളള വസ്ത്രങ്ങള്‍ ധരിച്ചിട്ടില്ല. അതുകൊണ്ട് പ്രേക്ഷകര്‍ എന്നെ മോശം രീതിയില്‍ കണ്ടിട്ടില്ല. കൊവിഡ് കഴിഞ്ഞ് ഞാന്‍ ഒരു പൊതുപരിപാടിയില്‍ പങ്കെടുക്കാന്‍ പോയിരുന്നു. അവിടെ എത്തിയപ്പോള്‍ ഒരുപാട് ഓണ്‍ലൈന്‍ മാദ്ധ്യമങ്ങളും ഉണ്ടായിരുന്നു. ഞാന്‍ മനോഹരമായ രീതിയിലാണ് വസ്ത്രം ധരിച്ചത്. പക്ഷെ അവര്‍ വീഡിയോയിലൂടെ കാണിച്ചത് വേറെ രീതിയിലായിരുന്നു. അതിനുശേഷം പല സ്ഥലങ്ങളില്‍ പോയപ്പോഴും ഇതായിരുന്നു അവസ്ഥ. പലരും പല ദിശയില്‍ തന്നെയാണ് എന്നെ ഷൂട്ട് ചെയ്തത്.

ഒരുപാട് സൈബര്‍ ആക്രമണങ്ങള്‍ ഉണ്ടായി. വണ്ണമില്ലെന്ന് പലരും പറഞ്ഞിട്ടുണ്ട്. ബോഡി ഷെയ്മിംഗ് നടത്തുന്നവരോട് പലരും പ്രതികരിക്കാറുണ്ട്. സത്യത്തില്‍ അതിന്റെ ആവശ്യമൊന്നുമില്ല. എല്ലാം അവഗണിച്ചാല്‍ മതി. ഞാനും ഡെയ്‌നും തമ്മിലുളളത് സൗഹൃദം മാത്രമാണ്. ഞങ്ങള്‍ പ്രണയത്തിലാണോയെന്നാണ് മിക്കവരും ചോദിക്കുന്നത്. അതിനല്ലൊം ഉത്തരം പറഞ്ഞുമടുത്തു. നാട്ടുകാരാണ് ഞങ്ങള്‍ ഒന്നിക്കാന്‍ വേണ്ടി ആഗ്രഹിക്കുന്നത്. എനിക്ക് ചെറുപ്പത്തില്‍ ഒരു പ്രണയം ഉണ്ടായിട്ടുണ്ട്. നമ്മള്‍ എങ്ങനെയാകണമെന്ന് പങ്കാളിയല്ല തീരുമാനിക്കേണ്ടത്. ആ പ്രശ്‌നം വന്നതോടെ പ്രണയബന്ധവും അവസാനിപ്പിച്ചു. ആ ബന്ധത്തിന്റെ ആവശ്യമില്ല. വിവാഹം കഴിക്കേണ്ടയെന്നതാണ് എന്റെ വ്യക്തിപരമായ അഭിപ്രായം' മീനാക്ഷി പറഞ്ഞു.