സിനിമയില്‍ സജീവമല്ലെങ്കിലും വിവാദപരമായ വിഷയങ്ങളില്‍ ഇടപെട്ടും പ്രസ്താവനകള്‍ പുറപ്പെടുവിച്ചും വ്യക്തി ജീവിതത്തിലുണ്ടായ സംഭവങ്ങളുടെ പേരിലും നടന്‍ ബാല എന്നും മീഡിയയില്‍ വൈറലാണ്. തുടര്‍ച്ചയായ കല്യാണങ്ങളും വേര്‍പിരിയലുകളും ബാലയുടെ കരിയറില്‍ തന്നെ കരിനിഴല്‍ വീഴ്ത്തിയിരുന്നു. ബാലക്കെതിരെ മുന്‍ ഭാര്യമാരായ അമൃത സുരേഷും എലിസബത്തും ഗാര്‍ഹിക പീഡന ആരോപണങ്ങള്‍ ഉന്നയിച്ചിരുന്നു. ഇതിനു പിന്നാലെയാണ് ബന്ധുവായ കോകിലയെ വിവാഹം കഴിച്ചത്.

ഭാര്യ കോകിലയ്‌ക്കൊപ്പമുള്ള ചിത്രങ്ങളും കുക്കിംഗ് വീഡിയോകളുമൊക്കെ നടന്‍ ബാല സോഷ്യല്‍ മീഡിയയില്‍ പങ്കുവയ്ക്കാറുണ്ട്. വ്യത്യസ്തമായ വീഡിയോയുമായെത്തിയിരിക്കുകയാണ് ബാലയിപ്പോള്‍. ഇടപ്പള്ളി സബ് രജിസ്ട്രാര്‍ ഓഫീസില്‍ നിന്നുള്ള വീഡിയോയാണ് ബാല പോസ്റ്റ് ചെയ്തിരിക്കുന്നത്.

'ഇന്ന് സന്തോഷത്തിന്റെയും അനുഗ്രഹത്തിന്റെയും ദിവസം. കണ്‍ഗ്രാജുലേഷന്‍സ് കോകില.' എന്ന അടിക്കുറിപ്പോടെയാണ് ബാല ഫേസ്ബുക്കില്‍ വീഡിയോ പങ്കുവച്ചിരിക്കുന്നത്. കോകില ചിരിച്ചുകൊണ്ട് ഫയല്‍ പിടിച്ചുനില്‍ക്കുന്നതും, ബാല രജിസ്റ്റര്‍ ഓഫീസില്‍ നിന്ന് എന്തോ ചെയ്യുന്നതുമാണ് വീഡിയോയിലുള്ളത്.

എന്തിന് വേണ്ടിയാണ് ഇരുവരും രജിസ്റ്റര്‍ ഓഫീസില്‍ പോയതെന്ന് വ്യക്തമല്ല. എന്നിരുന്നാലും '250 കോടിയുടെ സ്വത്ത് കോകിലയ്ക്ക് കൊടുത്തോ' എന്നാണ് കൂടുതലാളുകളും കമന്റ് ചെയ്തിരിക്കുന്നത്.

'ഭാര്യയ്ക്ക് ആഡംബര ഫ്‌ളാറ്റ് സമ്മാനമായി നല്‍കിയോ?', 'എല്ലാം എഴുതിവച്ചുകാണും' എന്നിങ്ങനെ പോകുന്നു കമന്റുകള്‍. 'ഡിവോഴ്‌സായോ'എന്ന് ഒരാള്‍ കമന്റ് ചെയ്തിട്ടുണ്ട്. ഇതിന് ബാല മറുപടിയും നല്‍കിയിട്ടുണ്ട്. 'അതേ, ഞാന്‍ നിങ്ങളെയാണ് ഡിവോഴ്‌സ് ചെയ്തിരിക്കുന്നത്, ഗെറ്റൗട്ട്' എന്നായിരുന്നു ബാലയുടെ മറുപടി. അതേസമയം, ഒരു മാസത്തിന് ശേഷം താന്‍ മാദ്ധ്യമങ്ങളെ നേരില്‍ കണ്ട് കാര്യം അറിയിക്കുമെന്നും ബാല വ്യക്തമാക്കിയിട്ടുണ്ട്.