സൂപ്പര്‍ഹിറ്റായ ആകാശദൂത് എന്ന ചിത്രത്തില്‍ മാധവി നായികയായത് തികച്ചും യാദൃഛികമായാണ്. മലയാളത്തിലെ പ്രമുഖരായ പല നടിമാരെയും നായികയുടെ വേഷത്തിലേക്ക് സിബിമലയില്‍ നോക്കിയിരുന്നു. എന്നാല്‍ ഡേറ്റില്ലാത്തതിനാല്‍ സിനിമ നടക്കാത്ത അവസ്ഥയായി. നായികാ പ്രാധാന്യമുള്ള ചിത്രമായതിനാല്‍ നല്ല നടിമാരെ കിട്ടിയില്ലെങ്കില്‍ പ്രോജക്ട് ഉപേക്ഷിക്കാമെന്ന സ്ഥിതിയില്‍ കാര്യങ്ങളെത്തി.
പ്രേംപ്രകാശും സുഹൃത്തുക്കളുമായിരുന്നു നിര്‍മാതാക്കള്‍. തിരക്കഥാകൃത്ത് ഡെന്നിസ് ജോസഫിന്റെ ഭാര്യ ലീനയാണ് അന്ന് തിരക്കഥയുടെ കോപ്പി പകര്‍ത്തിയെഴുതിയത്. ലീനയുടേത് നല്ല കയ്യക്ഷരമാണ്. താന്‍ പകര്‍ത്തിയെഴുതിയ തിരക്കഥ സിനിമയാകില്ലെന്ന് അറിഞ്ഞപ്പോള്‍ ലീനയ്ക്കും വിഷമമായി. അങ്ങനെ ഒരു ദിവസം ലീന ഡെന്നിസിനോട് പറഞ്ഞു, വടക്കന്‍ വീരഗാഥയിലൊക്കെ അഭിനയിച്ച മാധവിയെ നായികയാക്കിക്കൂടേ... അത് കേട്ടതും ഡെന്നിസ് ചൂടായി. കാരണം മാധവിക്ക് മലയാളത്തില്‍ രാശിയില്ലെന്ന് അക്കാലത്ത് വ്യാപക പ്രചരണം ഉണ്ടായിരുന്നു. വടക്കന്‍ വീരഗാഥ ഒഴികെ അവര്‍ അഭിനയിച്ച പല മലയാളികളും സിനിമകളും പരാജയമായിരുന്നു.
ഡെന്നിസ് അതുകൊണ്ടല്ല ഭാര്യയോട് ദേഷ്യപ്പെട്ടത്. മാധവി അഭിതാബ് ബച്ചന്റെ നായികയായി അഭിനയിച്ച ശേഷം മുംബയില്‍ സെറ്റില്‍ഡായി കഴിയുകയായിരുന്നു. അവരെ തപ്പിപ്പിടിക്കാന്‍ വലിയ പാടാണ്. പക്ഷെ, അടുത്തദിവസം രാവിലെ ഡെന്നിസ് ഇക്കാര്യം സിബിമലയിലിനോട് പറഞ്ഞു. അദ്ദേഹത്തിനത് ഇഷ്ടമായി. താമസിക്കാതെ സിബി മുംബയില്‍ പോയി മാധവിയെ കണ്ട് കഥ പറഞ്ഞു. അവര്‍ക്ക് ഇഷ്ടമായി.
തുലാഭാരത്തിന് ശേഷം മലയാളം കണ്ട ഏറ്റവും വലിയ കണ്ണീര്‍ പടമായിരുന്നു ആകാശദൂത്. തുലഭാരത്തില്‍ ഷീല, ശാരദ, നസീര്‍ തുടങ്ങിയ വലിയ താരങ്ങളുണ്ടായിരുന്നു. എന്നാല്‍ താരങ്ങളില്ലാതെ ആകാശദൂത് സൂപ്പര്‍ഹിറ്റായി. ഡെന്നിസ് ഭാര്യയ്ക്ക് നന്ദി പറഞ്ഞു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha