മറ്റുള്ള നടിമാരെ പോലെ ഒരുപാട് സിനിമകളൊന്നും ചെയ്തില്ലെങ്കിലും ചെയ്ത സിനിമകളിലൂടെ തന്റേതായ വ്യക്തിമുദ്ര മലയാള സിനിമാലോകത്ത് സൃഷ്ടിച്ച നടിയാണ് റോമ. പക്ഷേ കുറച്ചു നാളുകളായി താരം അഭിനയരംഗത്ത് അത്ര സജീവമായിരുന്നില്ല. എന്നാല്‍ ഒരിടവേളയ്ക്ക് ശേഷം റോമ മലയാളത്തിലേയ്ക്ക് മടങ്ങിയെത്തുകയാണ്.

ദീപന്‍ സംവിധാനം ചെയ്യുന്ന സിനിമയിലൂടെയാണ് റോമയുടെ തിരിച്ചുവരവ്. സത്യ എന്നാണ് ചിത്രത്തുന്റെ പേര്. നായകന്‍ ജയറാമാണ്. ചിത്രത്തില്‍ റോസി എന്ന നര്‍ത്തകിയായാണ് റോമ എത്തുന്നത്. മുഴനീള കഥാപാത്രമാണ് താന്‍ കൈകാര്യം ചെയ്യുന്നതെന്ന് റോമ പറഞ്ഞു. താന്‍ ആദ്യമായിട്ടാണ് ജയറാം ചിത്രത്തില്‍ അഭിനയിക്കുന്നതെന്നും അതില്‍ ഒരുപാട് സന്തോഷമുണ്ടെന്നും റോമ കൂട്ടിച്ചേര്‍ത്തു.

പോണ്ടിച്ചേരിയില്‍ പല ജോലികള്‍ ചെയ്യുന്ന, യാത്രകള്‍ ഇഷ്ടപ്പെടുന്ന സത്യ എന്ന ചെറുപ്പക്കാരനായാണ് ജയറാം ചിത്രത്തിലെത്തുന്നത്. അയാളുടെ ജീവിതത്തില്‍ യാദൃച്ഛികമായി സംഭവിക്കുന്ന ചില പ്രശ്‌നങ്ങളാണ് ചിത്രത്തിന്റെ ഇതുവൃത്തം. സത്യ യാത്രയ്ക്കിടയില്‍ പരിചയപ്പെടുന്ന പെണ്‍കുട്ടിയാണ് റോസി (റോമ). ഇവരുടെ കൂടിച്ചേരലാണ് സിനിമയിലെ പ്രധാന മുഹൂര്‍ത്തം.

ഈ ചിത്രത്തിന്റെ കഥയ്ക്ക് വലിയ പ്രാധാന്യമില്ലെന്നും സിനിമയുടെ മേക്കിംഗിലാണ് പ്രത്യേകതയെന്നും തിരക്കഥാകൃത്ത് എ.കെ.സാജന്‍ പറഞ്ഞു. ഷെഹനാസ് മൂവി ക്രിയേഷന്‍സിന്റെ ബാനറില്‍ ഫിറോസ് ഷഹീദ് നിര്‍മിക്കുന്ന ചിത്രത്തിന്റെ ഛായാഗ്രഹണം നിര്‍വഹിക്കുന്നത് ദീപന്റെ പുതിയ മുഖം എന്ന സിനിമയിലൂടെ പ്രശസ്തനായ ഭരണി കെ. ധരനാണ്. ഗോപിസുന്ദറിന്റേതാണ് സംഗീതം.