തമിഴ്‌നാട് മുഖ്യമന്ത്രി ജയലളിത സുഖം പ്രാപിക്കണം, പുലിമുരുകന്‍ നിര്‍ത്താതെ ഓടണം, യുദ്ധം ചെയ്യില്ലെന്നു ലോകരാജ്യങ്ങള്‍ കരാറില്‍ ഏര്‍പ്പെടണം. ബാലുശ്ശേരി സ്വദേശി എ.എം.നാരായണന്റെ പ്രാര്‍ത്ഥന ഇതൊക്കെയാണ്. ഇതിനായി വഴിവക്കില്‍ വിളക്കു കത്തിച്ചു പ്രാര്‍ഥിക്കുകയാണ് ഈ അറുപത്തെട്ടുകാരന്‍. 

കഴിഞ്ഞ ദിവസം മനോരമ ജംക്ഷനു സമീപമായിരുന്നു നാരായണന്റെ പ്രാര്‍ഥന. മോഹന്‍ലാലിന്റെയും ജയലളിതയുടെയും ഒട്ടേറെ ചിത്രങ്ങള്‍ വച്ചായിരുന്നു പ്രാര്‍ഥന. നിലവിളക്കും ചന്ദനത്തിരിയും കത്തിച്ചു വച്ചുള്ള ഈ പ്രാര്‍ഥന ദിവസങ്ങള്‍ പിന്നിട്ടുവെന്നാണ് നാരായണന്റെ അവകാശവാദം.

ബാലുശ്ശേരി ബ്ലോക്ക് റോഡ് ജംക്ഷനിലെ ശ്രീകൃഷ്ണഭജന മഠത്തിലെ താമസക്കാരനായ നാരായണന്‍ എംജിആര്‍ മരിച്ചപ്പോള്‍ ആത്മാഹുതിക്കു ശ്രമിച്ചിരുന്നു. ജയലളിത ജയിലില്‍ പ്രവേശിപ്പിക്കപ്പെട്ടപ്പോഴും പ്രാര്‍ഥനാനിരതനായി നാരായണന്‍ തെരുവിലിറങ്ങിയിരുന്നു. 

എംജിആര്‍ അഭിനയിച്ച 136 സിനിമകളുടെ പേര് എഴുതി വച്ചും പുലിമുരുകന്റെ വിജയത്തിനായി ശയനപ്രദക്ഷിണം നടത്തിയുമൊക്കെ ആരാധനയുടെ വേറിട്ട ലോകത്തു ജീവിക്കുന്ന നാരായണന്‍ ലോട്ടറി ടിക്കറ്റ് വിറ്റാണ് ഉപജീവനം നടത്തുന്നത്. ജയലളിതയോടും മോഹന്‍ലാലിനോടുമൊക്കെ കടുത്ത ആരാധനയാണെങ്കിലും ഇവരെ നേരിട്ടു കാണാന്‍ ഇതുവരെ നാരായണനു ഭാഗ്യമുണ്ടായിട്ടില്ല.