മൂന്നാല് മാസമായി വിദേശത്തായിരുന്ന പൃഥ്വിരാജ് വീണ്ടും പറക്കുന്നു. ഇത്തവണ ആസ്‌ത്രേലിയയ്ക്കാണ്. ജിനു ജോസഫ് സംവിധാനം ചെയ്യുന്ന പുതിയ ചിത്രത്തില്‍ അഭിനയിക്കാന്‍. എസ്രയുടെ അവസാന ഷെഡ്യൂള്‍ മുംബയില്‍ പൂര്‍ത്തിയാക്കിയ താരം നേരെ ഹൈദരാബാദിലേക്കാണ് പറന്നത്. ടിയാന്റെ സെറ്റില്‍. അവിടെ ഷൂട്ടിനിടെ സെറ്റിന് തീപിടിച്ചു. തൊട്ടടുത്ത ദിവസം വലിയ മഴയുമായി. അതോടെ ചിത്രീകരണം മുടങ്ങി. തുടര്‍ന്ന് ഹിന്ദി ചിത്രത്തിലഭിനയിക്കാന്‍ മലേഷ്യയ്ക്ക് പറന്നു. 15 ദിവസത്തെ ചിത്രീകരണത്തിന് ശേഷം മടങ്ങിയെത്തി. രണ്ട് ദിവസം മാത്രമാണ് കൊച്ചിയിലുണ്ടായിരുന്നു. ആ ദിവസങ്ങളിലാണ് എസ്ര ഡബ്ബിംഗ് പൂര്‍ത്തിയാക്കിയത്.

അടുത്ത ദിവസം പോര്‍ച്ചുഗലിന് തിരിച്ചു. മൈ സ്‌റ്റോറിയില്‍ അഭിനയിക്കാന്‍. ഏകദേശം ഒന്നര മാസത്തോളം അവിടെയായിരുന്നു. മണിയന്‍പിള്ള രാജി, പാര്‍വതി തുടങ്ങിയ നിരവധി താരങ്ങളാണ് ചിത്രത്തിലുള്ളത്. മലയാളത്തില്‍ ആദ്യമായാണ് ഒരു ചിത്രം പോര്‍ച്ചുഗലില്‍ ചിത്രീകരിക്കുന്നത്. ഷൂട്ടിംഗ് തുടങ്ങുന്നതിന് മാസങ്ങള്‍ക്ക് മുന്‍പ് പൃഥ്വിരാജും ഭാര്യ സുപ്രീയയും മകളും പോര്‍ച്ചുഗല്‍ സന്ദര്‍ശിച്ചിരുന്നു. അതിന് പക്ഷെ, സിനിമയുമായി ബന്ധം ഉണ്ടായിരുന്നില്ല. ഷൂട്ടിംഗ് കഴിഞ്ഞ് പറന്നെത്തിയ താരം നേരെ ഹൈദരാബാദിലേക്കാണ് പോയത്. ടി യാന്റെ ബാക്കിഭാഗങ്ങള്‍ പൂര്‍ത്തിയാക്കുകയായിരുന്നു ലക്ഷ്യം.

അതിനിടെ വീട്ടിലെ ചില അത്യാവശ്യ കാര്യങ്ങള്‍ക്കായി പത്താം തീയതി കൊച്ചിയിലെത്തി. ഇന്നലെ വീണ്ടും ഹൈദരാബാദിലേക്ക് പറന്നു. കുറച്ച് ദിവസത്തെ ഷൂട്ട് കൂടി ബാക്കിയുണ്ട്. തിരിച്ചെത്തിയാലുടന്‍ വിമാനത്തിന്റെ സെറ്റില്‍ ജോയിന്‍ ചെയ്യും. പത്ത് ദിവസത്തെ ഡേറ്റാണ് നല്‍കിയിരിക്കുന്നത്. ജിനു ജോസഫിന്റെ സിനിമയുടെ ക്രൂ കപ്പലിലാണ് ആസ്‌ത്രേലിയയ്ക്ക് പോകുന്നത്. അവരവിടെ എത്താന്‍ പത്ത് ദിവസമെടുക്കും. ആ സമയം താരം വിമാനത്തിന് നല്‍കി. കപ്പല്‍ ആസ്‌ത്രേലിയയിലെത്തുമ്പോള്‍ പൃഥ്വിരാജ് നെടുമ്പാശേരിയില്‍ നിന്ന് വിമാനം കയറും.