മനീഷാ കൊയ്‌രാള സഞ്ജയ് ദത്തിന്റെ അമ്മയാകുന്നു
നടി മനീഷ കൊയ്‌രാള സഞ്ജയ് ദത്തിന്റെ അമ്മയാകുന്നു. രാജ്കുമാര്‍ ഹിറാനി സഞ്ജയ് ദത്തിന്റെ ജീവിതത്തെ ആസ്പദമാക്കി എടുക്കുന്ന സിനിമയിലാണ് താരത്തിന്റെ അമ്മ നര്‍ഗീസ് ദത്തായി മനീഷ വേഷമിടുന്നത്. രണ്‍ബീര്‍ കപൂറാണ് സഞ്ജയ് ദത്തായി അഭിനയിക്കുന്നത്. നര്‍ഗീസിന്റെ റോളിനായി മറ്റ് പല നടിമാരെയും ആലോചിച്ചെങ്കിലും സുന്ദരിയും അസാമാന്യമായ അഭിനയ മികവും ഉള്ള മനീഷയില്‍ അന്വേഷണം അവസാനിപ്പിക്കുകയായിരുന്നു. അനുഷ്‌കാ ശര്‍മ പത്രപ്രവര്‍ത്തകയായും സോനംകപൂര്‍ സഞ്ജയ് ദത്തിന്റെ കാമുകിയായും അഭിനയിക്കുന്നു. ചിത്രത്തിന്റെ പ്രീ പ്രൊഡക്ഷന്‍ ജോലികളെല്ലാം പൂര്‍ത്തിയായിക്കഴിഞ്ഞു. താമസിക്കാതെ ചിത്രീകരണം തുടങ്ങും.
നടി നര്‍ഗീസ് ദത്തിന്റെയും സുനില്‍ ദത്തിന്റെയും മകനായ സഞ്ജയ് ദത്തിന്റെ ജീവിതം സിനിമാക്കഥകളെ വെല്ലുന്നതാണ്. മയക്ക്മരുന്നിന് അടിമയായിരുന്ന താരത്തെ വളരെ പ്രയാസപ്പെട്ടാണ് വീട്ടുകാര്‍ അതില്‍ നിന്നും മോചിപ്പിച്ചത്. സിനിമയില്‍ സ്റ്റാറായി നില്‍ക്കുമ്പോഴാണ് മുംബയ് സ്‌ഫോടനവുമായി ബന്ധപ്പെട്ട് , ടാഡാ നിയമപ്രകാരം അറസ്റ്റിലാകുന്നത്. എ.കെ 47 തോക്ക് കൈവശം വച്ചതിനായിരുന്നു അത്. തുടര്‍ന്ന് നീണ്ട നിയമ പോരാട്ടങ്ങള്‍ക്ക് ഒടുവില്‍ ഒരു വര്‍ഷം മുമ്പ് ജയില്‍ മോചിതനായി. വീട്ടുകാരുമൊത്ത് കഴിയുകയായിരുന്നു താരം. അതിന് ശേഷം അഭിനയിക്കുന്ന സിനിമയുടെ ചിത്രീകരണം കഴിഞ്ഞ മാസം ഡല്‍ഹിയില്‍ തുടങ്ങി.
ജയിലില്‍ കഴിയുന്ന സമയത്ത് പരോളില്‍ ഇറങ്ങിയാണ് ഹിറാനിയുടെ പി.കെയില്‍ അഭിനയിച്ചത്. ആ സമയത്താണ് സഞ്ജയ്‌യുടെ ബയോപിക് ചെയ്യുന്ന കാര്യം സംവിധായകന്‍ മുന്നോട്ട് വച്ചത്. അദ്ദേഹത്തിന് എതിര്‍പ്പില്ലായിരുന്നു. ആദ്യ ഭാര്യയില്‍ നിന്ന് ബന്ധം വേര്‍പ്പെടുത്തിയ സഞ്ജയ് ദത്ത് രണ്ടാം ഭാര്യയ്ക്കും കുട്ടികള്‍ക്കും ഒപ്പമാണ് മുംബയില്‍ താമസിക്കുന്നത്. മൂത്ത മകള്‍ക്ക് 17 വയസുണ്ട്. അവളുടെ പ്രായത്തിലുള്ള കുട്ടിയുടെ പിതാവായാണ് രണ്ടാംവരവിലെ ആദ്യചിത്രമായ ഭൂമികയില്‍ അഭിനയിക്കുന്നത്. അടുത്തിടെ ബോളിവുഡില്‍ ഇറങ്ങിയ ബോയോപിക്കുകളായ മേരികോം, എം.എസ് ധോണി എന്നിവയെല്ലാം സൂപ്പര്‍ഹിറ്റായിരുന്നു.
https://www.facebook.com/Malayalivartha
