ചിലയവസരങ്ങളിലെങ്കിലും അല്‍പം വെയിറ്റിടുന്നവരാണ് നമ്മളോരോരുത്തരും. അപ്പോള്‍പ്പിന്നെ സിനിമാക്കാരുടെ കാര്യം പറയണോ. എന്നാല്‍ പൊതുവേദിയില്‍വച്ച് അത് തുറന്ന് പറഞ്ഞിരിക്കുകയാണ് യുവ താരം അനാര്‍ക്കലി മരയ്ക്കാര്‍.

തിരുവനന്തപുരം ഗവ. നഴ്‌സിംഗ് കോളേജില്‍ ആര്‍ട്‌സ് ക്ലബ്ബ് ഉദ്ഘാടനം ചെയ്യാനെത്തിയതാണ് അനാര്‍ക്കലി. തുടര്‍ന്ന് നടത്തിയ പ്രസംഗത്തിലാണ് അനാര്‍ക്കലി എല്ലാവരേയും ഞെട്ടിച്ചത്. സത്യത്തില്‍ ഞാന്‍ വന്നത് ബസിലാണ്. പക്ഷെ ഇവിടത്തെ കോളേജ് യൂണിയന്‍ നേതാവ് പറഞ്ഞു കാറിലാണ് വന്നതെന്നേ പറയാവൂ എന്ന്. പക്ഷെ പ്രസംഗത്തിന്റെ തുടക്കത്തില്‍ തന്നെ അനാര്‍ക്കലി അത് തുറന്ന് പറഞ്ഞു. ഞാന്‍ വന്നത് ബസിലാണ്. എനിക്ക് വെയിറ്റിടേണ്ട കാര്യമില്ല. ഇതോടെ കൂട്ട കൈയ്യടിയായി.

നഴ്‌സിംഗ് തനിക്ക് പറ്റിയ വിഷയമല്ലെന്ന് അനാര്‍ക്കലി പറഞ്ഞു. സയന്‍സില്‍ വലിയ മുന്നേറ്റമില്ലായിരുന്നു. പക്ഷെ കുഞ്ഞുനാള്‍ മുതല്‍ നഴ്‌സ് ആകാന്‍ ആഗ്രഹിച്ചു. ചെറുതിലെ ന്യൂമോണിയ പിടിപെട്ടെപ്പോള്‍ തന്നെ സഹായിച്ച നഴ്‌സുമാരുടെ സേവനം മറക്കാന്‍ കഴിയില്ല. ഇപ്പോള്‍ നഴ്‌സിംഗ് വിദ്യാര്‍ത്ഥികളെ കാണുമ്പോള്‍ അവരെ ഓര്‍ത്തു പോകുകയാണ്. 

ആനന്ദത്തിലൂടെ തന്നെ ഇഷ്ടപ്പെട്ട എല്ലാവര്‍ക്കും അനാര്‍ക്കലി നന്ദി പറഞ്ഞു. വളരെ ഡയലോഗ് കുറഞ്ഞ വേഷമാണെങ്കിലും ജനങ്ങള്‍ ഇഷ്ടപ്പെടുന്നതില്‍ സന്തോഷമുണ്ട്. പൃഥ്വി രാജിന്റെ വിമാനത്തില്‍ ചെറിയൊരു വേഷത്തില്‍ അഭിനയിക്കാന്‍ പറ്റിയത് വലിയ കാര്യമാണ്. ഏപ്രില്‍ ഷൂട്ടിംഗ് തുടങ്ങുന്ന ചിത്രത്തില്‍ തനിക്ക് നായികവേഷമാണെന്നും അനാര്‍ക്കലി പറഞ്ഞു.