നടിയെ തട്ടിക്കൊണ്ട് പോയ സംഭവത്തില്‍ സോഷ്യല്‍ മീഡിയയില്‍ അകാരണമായി ആക്രമിക്കപ്പെട്ടത് നടന്‍ ദിലീപാണ്. ഈ സംഭവം ദീലീപിനെ വേദനിപ്പിച്ചതായും അദ്ദേഹത്തിന് കടുത്ത മാനസിക സംഘര്‍ഷമുണ്ടാക്കിയെന്നും നടനും സംവിധായകനുമായ ലാല്‍ പറഞ്ഞു.

ദിലീപിനെ ചോദ്യം ചെയ്തില്ലെന്ന് പോലീസ് അറിയിച്ചിട്ടും ദിലീപിനെ ചോദ്യം ചെയ്താല്‍ എല്ലാം അറിയാമെന്ന് ചിലര്‍ പ്രചരിപ്പിച്ചു. ഇതാണ് ദിലീപിനെ വളരെ വേദനിപ്പിച്ചത്. താന്‍ ദിലീപിനെ വിളിച്ചു സംസാരിച്ചിരുന്നു. വേറൊരു ലോകത്താണ് ദിലീപ് ഉണ്ടായിരുന്നത്. കടുത്ത രോക്ഷവും എല്ലാം നശിപ്പിക്കാനുള്ള വേദനയുമാണ് ദിലീപ് അനുഭവിച്ചതെന്നും ലാല്‍ പറഞ്ഞു.

പ്രതിയെ പിടികൂടുന്നത് വരെ ദിലീപ് അനുഭവിച്ച വേദന അതിലൂടെ കടന്ന് പോയവര്‍ക്ക് മാത്രമേ അറിയൂവെന്നും ലാല്‍ പറഞ്ഞു. നടിയെ ആക്രമിച്ചതുമായി ബന്ധപ്പെട്ട് ആലുവയിലുള്ള ഒരു നടനെ ചോദ്യം ചെയ്തുവെന്ന റിപ്പോര്‍ട്ടുകള്‍ പുറത്ത് വന്നതോടെയാണ് നടന്‍ ദിലീപിന്റെ പേര് പ്രചരിച്ചത്. എന്നാല്‍ താനടക്കം ആലുവയിലുള്ള ഒരു നടനെയും പോലീസ് ചോദ്യം ചെയ്തിട്ടില്ലെന്നും തനിക്ക് പ്രതികളുമായി ഒരു ബന്ധവുമില്ലെന്നും ദിലീപ് ഫെയ്‌സ്ബുക്ക് പോസ്റ്റില്‍ വ്യക്തമാക്കിയിരുന്നു.