ക്യാമറക്കണ്ണുകളെ പേടിയോടെ കണ്ട് അമ്മയുടെ ചുമലില്‍ മുഖമൊളിപ്പിച്ച കുഞ്ഞ് ആരാധ്യയെ ആരാധകര്‍ ഇപ്പോഴും മറന്നു കാണില്ല. എന്നാല്‍ ഇക്കുറി അമ്മയോടൊപ്പം കാന്‍ഫിലിംഫെസ്റ്റിവെലിനെത്തിയപ്പോള്‍ വളരെ സൗഹൃദത്തോടെയാണ് കുഞ്ഞു രാജകുമാരി പെരുമാറിയത്. ആരാധ്യയുടെ ഈ മാറ്റത്തില്‍ ഏറെ ആഹ്ലാദിക്കുന്നതും അമ്മ ഐശ്വര്യ തന്നെയാണ്. കാന്‍ഫിലിംഫെസ്റ്റിവെലില്‍ പങ്കെടുക്കാന്‍ എയര്‍പോര്‍ട്ടിലെത്തിയ ഐശ്വര്യയുടെയും ആരാധ്യയുടെയും ചിത്രങ്ങള്‍ വളരെപ്പെട്ടന്നു തന്നെ വൈറലായിരുന്നു.

അതിലൊരു ചിത്രത്തില്‍ ആരാധ്യ ആരെയോ നോക്കി കൈവീശുന്ന ചിത്രങ്ങള്‍ ശ്രദ്ധയില്‍പ്പെട്ടപ്പോള്‍ ഒരു അമ്മയുടെ ആകാംക്ഷയോടെ ഐശ്വര്യ കുഞ്ഞിനോടു ചോദിച്ചു. എയര്‍പോട്ടില്‍ വെച്ച് നീ ആരെയാണ് കൈ വീശി അഭിവാദ്യം ചെയ്തതെന്ന്. അവളുടെ മറുപടി തന്നെ ചിരിപ്പിച്ചുവെന്നാണ് ഐശ്വര്യ ഒരു മാധ്യമത്തിനു നല്‍കിയ അഭിമുഖത്തില്‍ പറഞ്ഞത്. താന്‍ ആരെയും നോക്കി കൈ വീശിയതല്ലെന്നും. ദയവായി ചിത്രങ്ങളെടുക്കരുതെന്ന് അമ്മയുടെ ആരാധകരോട് അപേക്ഷിക്കുകയായിരുന്നുവെന്നുമാണ് ആരാധ്യ പറഞ്ഞ മറുപടി.

മറ്റുചിലപ്പോള്‍ ഒരു സെല്‍ഫിയെടുക്കട്ടേയെന്ന ചോദ്യവുമായി ആരാധകരെത്തുമ്പോള്‍ ഈ ചിത്രത്തില്‍ ഞാന്‍ വേണ്ടല്ലോ അല്ലേ അമ്മേ എന്നവള്‍ കൊഞ്ചി ചോദിക്കുമെന്നും ഐശ്വര്യ പറയുന്നു. ചിലനേരത്ത് ഫോട്ടോബോംബുമായി ആളുകളെ ഞെട്ടിക്കുന്ന പതിവും അവള്‍ക്കുണ്ട്. ആളുകള്‍ കൂടുമ്പോഴും കാമറയുടെ ഫ്‌ലാഷ് മിന്നുമ്പോഴും എങ്ങനെ പെരുമാറണമെന്നൊന്നും ഞാന്‍ അവളെ പഠിപ്പിച്ചിട്ടില്ല. വീടിനു പുറത്തിറങ്ങുമ്പോഴും പൊതുസ്ഥലങ്ങളില്‍വെച്ചും ആളുകള്‍ ചിത്രങ്ങളെടുക്കുമെന്നൊക്കെ ഇപ്പോള്‍ അവള്‍ക്കു മനസ്സിലാവുന്നുണ്ടെന്നും ഐശ്വര്യ പറയുന്നു.

പതിനഞ്ചുവര്‍ഷമായി കാന്‍ ഫിലിംഫെസ്റ്റിവെലിലെ സ്ഥിരം സാന്നിധ്യമാണ് ഐശ്വര്യ. ആദ്യം ജൂറി അംഗം പിന്നീട് പ്രമുഖ കോസ്‌മെറ്റിക് ബ്രാന്‍ഡിനെ പ്രതിനിധീകരിച്ച് ഐശ്വര്യ കാനിലെ റെഡ്കാര്‍പ്പറ്റിലെത്തി ആരാധകരെ അതിശയിപ്പിക്കാറുണ്ട്. കഴിഞ്ഞ കുറച്ച് വര്‍ഷമായി കുഞ്ഞു ആരാധ്യയെയും കൂട്ടിയാണ് ഐശ്വര്യ കാനിലെത്തുന്നത്. സംഗീതം പോലെ താന്‍ മേയ്ക്കപ്പും ആസ്വദിക്കുന്നുണ്ടെന്നും അതുകൊണ്ടു തന്നെയാണ് പ്രമുഖ കോസ്‌മെറ്റിക് ബ്രാന്‍ഡിനെ പ്രതിനിധീകരിച്ച് കാനിലെ സ്ഥിരം സാന്നിധ്യമാകുന്നതെന്നും ഐശ്വര്യ പറയുന്നു. ജീവിതത്തില്‍ നമ്മളെല്ലാവരും നിറങ്ങളെ ഇഷ്ടപ്പെടുന്നു. സര്‍ഗ്ഗാത്മകതയെ കൂടുതല്‍ മിഴിവുള്ളതാക്കാന്‍ നിറങ്ങളുടെ വകഭേദങ്ങള്‍ നമ്മള്‍ ഉപയോഗിക്കാറുണ്ട്. മെയ്ക്കപ്പില്‍ അതു ഫാഷനാണ്. അതുമാത്രമാണ് വ്യത്യാസം ഐശ്വര്യ പറഞ്ഞു നിര്‍ത്തുന്നു.