പതിനാറാം വയസ്സില്‍ തന്നെ ലൈംഗികാക്രമണത്തിന് വിധേയയാക്കിയത് ബോളിവുഡ് താരം ആദിത്യ പഞ്ചോളിയാണെന്ന കങ്കണയുടെ വെളിപ്പെടുത്തല്‍ ചില്ലറ പുകിലല്ല ബോളിവുഡില്‍ ഉണ്ടാക്കിയത്. ഏറെനാളായി മനസ്സില്‍ സൂക്ഷിച്ച ആ വേദനിപ്പിക്കുന്ന രഹസ്യം ഒരു ടെലിവിഷന്‍ അഭിമുഖത്തിനിടെയാണ് കങ്കണ വെളിപ്പെടുത്തിയത്.

കങ്കണയുടെ തുറന്ന് പറച്ചിലിന് പിന്നാലെ പ്രതികരണവുമായി എത്തിയിരിക്കുകയാണ് ആദിത്യ പഞ്ചോളി. അവള്‍ക്ക് ഭ്രാന്താണ്. എന്തു ചെയ്യാനാകും. നിങ്ങള്‍ അവളുടെ സംസാരം ശ്രദ്ധിച്ചോ ഒരു ഭ്രാന്തിയെ പോലെയല്ലെ അവള്‍ സംസാരിക്കുന്നത്?. മറ്റാരെങ്കിലും അത്തരത്തില്‍ സംസാരിക്കാറുണ്ടോ.

ഒരു പാട് കാലങ്ങളായി സിനിമ മേഖലയില്‍ ജീവിക്കുന്നവരാണ് ഞങ്ങള്‍. ഇക്കാലമത്രയും ആരും മറ്റുള്ളവരെ കുറിച്ച് ഇത്രത്തോളം മോശമായി സംസാരിച്ചിട്ടില്ല. ഞാനെന്താണ് പറയേണ്ടത്. അവള്‍ക്ക് ഭ്രാന്താണ്. ചെളിയിലേക്ക് കല്ലെറിഞ്ഞാല്‍ അത് നമ്മുടെ വസ്ത്രം വൃത്തികേടാക്കുക മാത്രമാണ് ചെയ്യുന്നത്.

എന്നാണ് ആദിത്യ പഞ്ചോളി പ്രതികരിച്ചത്. വേണ്ടിവന്നാല്‍ കങ്കണയ്‌ക്കെതിരെ നിയമനടപടി കൈക്കൊള്ളുമെന്നും മറ്റൊരു അഭിമുഖത്തില്‍ ആദിത്യ പഞ്ചോളി പറഞ്ഞു. പ്രായപൂര്‍ത്തിയാവാത്ത തന്നെ ആദിത്യ പഞ്ചോളി പീഡിപ്പിച്ച കാര്യം ആദിത്യയുടെ ഭാര്യയും നടിയുമായ സെറീന വഹാബിനോട് പറഞ്ഞെങ്കിലും യാതൊരു കാര്യവുമുണ്ടായില്ലെന്നും കങ്കണ പറഞ്ഞു.

എനിക്ക് അയാളുടെ മകളേക്കാള്‍ പ്രായം കുറവായിരുന്നു. ശരിക്കും കെണിയിലായ അവസ്ഥയിലായിരുന്നു ഞാന്‍. അയാളെന്നെ മര്‍ദിച്ചു. തലയ്ക്കടിയേറ്റ് മുറിവും പറ്റി. ഞാന്‍ അയാളെ ചെരിപ്പൂരി അടിച്ചു. അയാള്‍ക്കും മുറിവേറ്റു. അന്ന് ഞാന്‍ പ്രായപൂര്‍ത്തിയായിട്ടുപോലുമുണ്ടായിരുന്നില്ല.

കങ്കണ പിന്നീട് പരാതി നല്‍കിയെങ്കിലും പോലീസ് ആദിത്യയെ വിളിച്ചുവരുത്തി ശാസിച്ച് വിട്ടയക്കുകയാണുണ്ടായത് എന്നും കങ്കണ വെളിപ്പെടുത്തിയിരുന്നു.