തമിഴകത്തും തെലുങ്കിലും ഇത് കീര്‍ത്തിയുടെ കാലം... അന്തരിച്ച തമിഴ്‌നാട് മുന്‍ മുഖ്യമന്ത്രി ജയലളിതയായി കീര്‍ത്തി എത്തുന്നു?
അന്തരിച്ച തമിഴ്‌നാട് മുന്‍ മുഖ്യമന്ത്രി ജയലളിതയായി കീര്‍ത്തി വേഷമിടുന്നുണ്ടെന്ന് വാര്‍ത്തകള്‍. എന്നാല്‍ തിരുപ്പതിയില്‍ മാധ്യമപ്രവര്‍ത്തകരുടെ ചോദ്യത്തിന് കീര്‍ത്തി ഇത് സംബന്ധിച്ച മറുപടി പറഞ്ഞു. മഹാനടിക്ക് ശേഷം മറ്റൊരു സിനിമയ്ക്കും താന്‍ കരാര്‍ ഒപ്പിട്ടില്ലെന്നായിരുന്നു നടിയുടെ വെളിപ്പെടുത്തല്‍. 'മറ്റ് സിനിമകളുടെ തിരക്കിലാണ് ഞാനിപ്പോള്‍.
ഏതെങ്കിലും ജീവചരിത്രം സിനിമയാകുന്നതിന് ഞാന്‍ കരാറൊന്നും ഒപ്പിട്ടിട്ടില്ല', കീര്‍ത്തി പറഞ്ഞു. എന്നാല്‍ മറ്റൊരു മാധ്യമത്തിന് നല്‍കിയ അഭിമുഖത്തില്‍ മഹാനടി തന്റെ കരിയറിലെ ആദ്യത്തേയും അവസാനത്തേയും ജീവചരിത്ര സിനിമയായിരിക്കുമെന്ന് കീര്‍ത്തി പറഞ്ഞു. ഇനിയും ഒരു ജീവചരിത്ര സിനിമയുടെ ഭാഗമാവില്ലെന്നും നടി വ്യക്തമാക്കി. മഹാനടിക്ക് ശേഷം ദളപതി 62വിലാണ് നടി അഭിനയിക്കുന്നത്.
വിജയ്യുടെ നായികയായാണ് ചിത്രത്തില്‍ കീര്‍ത്തി പ്രത്യക്ഷപ്പെടുന്നത്. കോളിവുഡില്‍ മാത്രമല്ല ടോളിവുഡിലും കീര്‍ത്തി വിജയങ്ങള്‍ തീര്‍ക്കുകയാണ്. തമിഴിലും തെലുങ്കിലുമായി 6 ബിഗ് ബജറ്റ് ചിത്രങ്ങളാണ് കീര്‍ത്തിയുടേതായി പുറത്തിറങ്ങാന്‍ പോകുന്നത്. മലയാളത്തില്‍ ഗീതാഞ്ജലി, റിങ് മാസ്റ്റര്‍ എന്നീ 2 ചിത്രങ്ങളില്‍ അഭിനയിച്ചെങ്കിലും കീര്‍ത്തിക്ക് മലയാളികളുടെ മനസ് കീഴടക്കാനായില്ല.
മറ്റു മലയാളി നടിമാരെ പോലെ കീര്‍ത്തിയും അടുത്ത തന്റെ തട്ടകമായി തിരഞ്ഞെടുത്തത് തമിഴകമായിരുന്നു.മലയാളികളെ എന്നും സ്വീകരിച്ചിട്ടുളള തമിഴ് മക്കള്‍ കീര്‍ത്തിയെയും മനസാ സ്വീകരിച്ചു. 2015 ലാണ് തമിഴില്‍ കീര്‍ത്തി അരങ്ങേറ്റം കുറിക്കുന്നത്. 'ഇതു എന്ന മായം' എന്ന ചിത്രത്തില്‍ വിക്രം പ്രഭുവിന്റെ നായിക ആയിട്ടായിരുന്നു തുടക്കം.
ചിത്രം വേണ്ടത്ര ശ്രദ്ധിക്കപ്പെട്ടില്ലെങ്കിലും കീര്‍ത്തിയെ തേടി നിരവധി സിനിമകള്‍ എത്തി. തമിഴില്‍ അരങ്ങേറ്റം കുറിച്ചതിനുപിന്നാലെ തെലുങ്കിലും കീര്‍ത്തി അരങ്ങേറ്റം നടത്തി.
https://www.facebook.com/Malayalivartha
