താരങ്ങൾക്ക് നേരെയുള്ള അതിക്രമങ്ങൾ ഇപ്പോൾ പൊതു രംഗത്ത് തുറന്നു പറയുന്നത് സാധാരണമാണ്. ഇപ്പോളാണ് എങ്ങനാണ് അതിക്രമങ്ങൾ സംഭവിക്കുക എന്ന് ചിന്തിക്കാൻ പറ്റില്ല. ബോഡി ഗാർഡ് കൂടെയുണ്ടെങ്കിലും രക്ഷയില്ലാത്ത കാലത്ത് തനിക്കുണ്ടായ അനുഭവം തുറന്നു പറയുകയാണ് സുസ്മിത സെൻ.

 ഒരു പതിനഞ്ചുവയസ്സുകാരൻ പയ്യനാണ് തന്നെ ലൈംഗികമായി ചൂഷണം ചെയ്യാൻ ശ്രമിച്ചതെന്നും അവനെ കയ്യോടെ പിടികൂടി ഒരുപാഠം തന്നെ പഠിപ്പിച്ചെന്നും നടി വ്യക്തമാക്കി. സംഭവത്തെക്കുറിച്ച് സുസ്മിതയുടെ വാക്കുകൾ–

‘ആളുകൾക്കൊരു വിചാരമുണ്ട്, വലിയ ബോഡിഗാർഡുകൾ ഒക്കെ കൂടെ ഉള്ളപ്പോൾ ഞങ്ങളെ ആരും ഒന്ന് തൊടാൻ പോലും മടിക്കുമെന്ന്. ഒരുകാര്യം പറയെട്ട, പക്ഷെ ഞാന്‍ ഒന്ന് പറയട്ടെ പത്തു ബോഡിഗാര്‍ഡുകള്‍ കൂടെ ഉണ്ടെങ്കിലും ഒരു സ്ത്രീ എന്ന നിലയ്ക്ക് പൊതുസമൂഹത്തില്‍ മോശമായി പെരുമാറിയേക്കാവുന്ന നൂറുകണക്കിന് പുരുഷന്‍മാരെ ഞങ്ങള്‍ക്ക് കൈകാര്യം ചെയ്യേണ്ടി വരാറുണ്ട്. ആറുമാസം മുമ്പാണ് ഈ സംഭവം, ഞാനൊരു അവാർഡ്ദാന ചടങ്ങിന് എത്തിയതാണ്.’

‘അന്ന് ഒരു പതിനഞ്ച് വയസ്സുകാരൻ എന്നെ ലൈംഗികമായി ചൂഷണം ചെയ്യാൻ ശ്രമിച്ചു. വലിയ ജനക്കൂട്ടത്തിനിടയ്ക്ക് ഞാൻ അത് തിരിച്ചറിയില്ലെന്നാണ് അവൻ വിചാരിച്ചത്. അവന് തെറ്റിപ്പോയി. എന്റെ പുറകിൽ നിന്നും ഞാൻ അവന്റെ കയ്യിൽ പിടിച്ച് മുന്നോട്ട് വലിച്ചു. ഒരു പതിനഞ്ച്കാരൻ പയ്യൻ, സത്യത്തിൽ ഞാൻ ഞെട്ടിപ്പോയി. അവന്റെ കഴുത്തിൽ പിടിച്ച് കുറച്ച് ദൂരം ഞാൻ നടന്നു, എന്നിട്ട് പറഞ്ഞു. ‘ഞാൻ ഇപ്പോൾ ഇവിടെ നിന്ന് ഒച്ചയെടുത്ത് അലറി, നടന്ന കാര്യം വിവരിച്ചാൽ നിന്റെ ജീവിതം തന്നെ ഇല്ലാതാകും.’ എന്നാൽ അവൻ ചെയ്ത കാര്യം നിഷേധിച്ചുകൊണ്ടിരിക്കുകയായിരുന്നു. ഞാൻ കാര്യത്തിൽ ഉറച്ചുനിന്നപ്പോൾ അവൻ തെറ്റ് മനസ്സിലാക്കി. എന്നോട് ക്ഷമ ചോദിച്ച ആ പയ്യൻ, ജീവിതത്തിലൊരിക്കലും ഇനി ആരോടും അങ്ങനെ ചെയ്യില്ലെന്ന് എന്നോട് സത്യം ചെയ്തു.’

‘അവന്റെ പ്രായം ഓർത്ത് മാത്രമാണ് ആ സംഭവത്തിൽ യാതൊരു നടപടിയും ഞാൻ സ്വീകരിക്കാതിരുന്നത്. രസത്തിന് വേണ്ടി ചെയ്യുന്ന കാര്യങ്ങൾ കുറ്റകൃത്യമാണെന്ന് ബോധ്യമാണ് അവർക്ക് മനസ്സിലാക്കികൊടുക്കേണ്ടത്. അതാണ് ഞാനും ചെയ്തത്.’–സുസ്മിത സെൻ പറഞ്ഞു.