ബോളിവുഡിന്റെ പ്രിയങ്കരിയായ സണ്ണിലിയോണ്‍ ഇനി മലയാളികളുടെയും പ്രിയങ്കരിയായി മാറും. വീരമഹാദേവിയില്‍ മലയാളിയായ കളരിയഭ്യാസിയുടെ വേഷത്തിലാണ് സണ്ണി ലിയോണ്‍ എത്തുന്നത്. സ്റ്റീഫ്‌സ് കോര്‍ണര്‍ ഫിലിംസിന്റെ ബാനറില്‍ പൊന്‍സെ സ്റ്റീഫന്‍ നിര്‍മ്മിക്കുന്ന ചിത്രമാണ് വീരമഹാദേവി. മലയാളത്തിന് പുറമെ തമിഴ്, തെലുങ്ക് ഭാഷകളിലും ചിത്രം പുറത്തിറങ്ങും. സിനിമയുടെ തിരക്കഥ കേട്ടപ്പോള്‍ തന്നെ സണ്ണി സമ്മതം മൂളുകയായിരുന്നു.

തനിക്കേറ്റവും ഇഷ്ടപ്പെട്ട കഥാപാത്രങ്ങളിലൊന്നായിരിക്കും ഇത്. ചെയ്യാന്‍ ആഗ്രഹിച്ചതും ഇതുതന്നെ. നൂറ്റന്‍പത് ദിവസത്തെ ഡേറ്റാണ് സണ്ണി ചിത്രത്തിനായി നല്‍കിയിരിക്കുന്നത്. ഇതിന് ശേഷമേ ഇനി മറ്റ് സിനിമകളില്‍ അഭിനയിക്കുന്നുള്ളുവെന്നും സണ്ണി പറഞ്ഞു. ഒരുപാട് കാലമായി താന്‍ പ്രതീക്ഷിച്ച വേഷമാണിത്. ആദ്യമായാണ് ഞാന്‍ ഒരു ചരിത്ര സിനിമ ചെയ്യുന്നത്. അതും ഒരു തനി മലയാളി പെണ്‍കൊടിയായി.

ദക്ഷിണേന്ത്യയില്‍ എനിക്ക് ഒരുപാട് ആരാധകരുണ്ട്. അവരെ തൃപ്തിപ്പെടുത്തുന്ന സിനിമയായിരിക്കും ഇതെന്നും സണ്ണി പറയുന്നു. വീരമഹാദേവി ആകുന്നത് സണ്ണി തന്നെയാണ്.

ഒരു വീരപോരാളിയായ രാജകുമാരിയുടെ വേഷമാണ് സണ്ണിക്ക് ചിത്രത്തിലുള്ളത്. കേരളത്തിന്റെ ചരിത്രവുമായി ബന്ധപ്പെട്ട കഥയാണ് ചിത്രത്തിനായി തെരഞ്ഞെടുത്തിരിക്കുന്നത്. സണ്ണി ലിയോണിനൊപ്പം നാസര്‍ ഒരു പ്രധാന കഥാപാത്രത്തെ അവതരിപ്പിക്കും.