താരങ്ങളുടെ പ്രവർത്തികൾ പലപ്പോളും വിമർശനത്തിന് പാത്രമാകാറുണ്ട്. ഇപ്പോൾ വിവാദത്തിലായിരിക്കുന്നത് ശില്പ ഷെട്ടിയാണ്. മകന്‍ വിയാന്റെ ആറാം പിറന്നാളിന് ഭര്‍ത്താവ് രാജ് കുന്ദ്ര, അമ്മ സുനന്ദ ഷെട്ടി എന്നിവര്‍ക്കൊപ്പം നടി ശില്‍പ ഷെട്ടി വൃദ്ധസദനത്തില്‍ പഴങ്ങളും മധുരപലഹാരങ്ങളും അടങ്ങുന്ന അത്താഴം വിതരണം ചെയ്തിരുന്നു. ഇതിന്റെ വീഡിയോ ശില്‍പ തന്നെ തന്റെ ഇന്‍സ്റ്റഗ്രാമില്‍ പോസ്റ്റ് ചെയ്യുകയും ചെയ്തു.

എന്നാല്‍ ചിലര്‍ ഇതിനെ വിമര്‍ശിച്ചുകൊണ്ട് രംഗത്തെത്തി. ‘ഈ പൊങ്ങച്ചം അവസാനിപ്പിക്കൂ. എന്തിനാണ് ഇങ്ങനെ വിലകുറഞ്ഞ പഴങ്ങള്‍ കൊടുക്കുകയും അതിന് ഇന്‍സ്റ്റഗ്രാമിലൂടെ പ്രചാരം കൊടുക്കുകയും ചെയ്യുന്നത്’ – എന്നൊക്കെ പലരും ശില്പയെ വിമര്‍ശിച്ചു.

ഇതിനെതിരെ രൂക്ഷ പ്രതികരണവുമായി ശില്പ രംഗത്തെത്തിയിരിക്കുകയാണ്. നിങ്ങള്‍ ഇങ്ങനെ ചിന്തിക്കുന്നത് സങ്കടകരമാണ്. പിന്നീട് ഞങ്ങള്‍ നേരിട്ടു തന്നെ അവര്‍ക്ക് ഒരു വലിയ അത്താഴം നല്‍കിയിരുന്നു. ഇതുപോലെ സഹായം ആവശ്യമായ സ്ഥലങ്ങളിലേയ്ക്ക് കൂടുതല്‍ സഹായം എത്തിക്കാന്‍ ആളുകളെ പ്രേരിപ്പിക്കുന്നതിനുവേണ്ടിയാണ് ഞാന്‍ അതിന്റെ വീഡിയോ പോസ്റ്റ് ചെയ്തത്.

ഇത് ഞങ്ങളുടെ പാരമ്പര്യമാണ്. ഞങ്ങളുടെ രക്ഷിതാക്കള്‍ വര്‍ഷങ്ങളായി ഞങ്ങളെ ഇവിടേയ്ക്ക് കൊണ്ടുവരാറുണ്ടായിരുന്നു. ഞാന്‍ എന്റെ മകനിലൂടെ അത് തുടരുകയാണ്. പൊങ്ങച്ചം കാണിക്കുകയായിരുന്നില്ല എന്റെ ഉദ്ദേശം – ശില്പ പ്രതികരിച്ചു.