പുലിമേളങ്ങളുടെ സ്വന്തം തട്ടകമായ തൃശ്ശൂരില്‍ നാളെ സിങ്കം എത്തുന്നു. തെന്നിന്ത്യന്‍ സൂപ്പര്‍ താരം സൂര്യയും സംവിധായകന്‍ ഹരിയും തങ്ങളുടെ പുതിയ ആക്ഷന്‍ ബ്രമാണ്ഡചിത്രമായ എസ് 3 ( സിങ്കം 3 ) യുടെ പ്രചാരണാര്‍ത്ഥം കേരളത്തില്‍ എത്തുന്നു. 17ന് ചൊവ്വാഴ്ച്ച വൈകുന്നേരം 5ന് തൃശ്ശൂര്‍ കുരിയച്ചിറ ലീ ഗ്രാന്‍ഡ് ഓഡിറ്റോറയത്തില്‍ ആരാധകര്‍ നല്‍കുന്ന സ്വീകരണ ചടങ്ങില്‍ പങ്കെടുത്ത ശേഷം 18ന് ബുധനാഴ്ച രാവിലെ 10 മണിക്ക് തിരുവനന്തപുരം ക്ലാസിക്ക് അവന്യുവില്‍ വെച്ച് നടക്കുന്ന 'സിങ്കം 3 കേരള ലോഞ്ചിങ് പത്ര സമ്മേളന'ത്തില്‍ പങ്കെടുക്കും.
സൂപ്പര്‍ഹിറ്റ് ചിത്രമായ സിങ്കം സീരിസിന്റെ തുടര്‍ച്ചയാണ് ഈ ചിത്രം. ആദ്യ രണ്ടു ഭാഗങ്ങള്‍ ഒരുക്കിയ ഹരി തന്നെയാണ് സിങ്കം മൂന്നാം ഭാഗവും സംവിധാനം ചെയ്യുന്നത്. ശ്രുതി ഹാസനും അനുഷ്‌ക ഷെട്ടിയുമാണ് ചിത്രത്തില്‍ നായികമാരായി എത്തുന്നത്. ഹാരിസ് ജയരാജ് ആണ് സംഗീതം. ജനുവരി 26ന് ചിത്രം തിയറ്ററുകളിലെത്തും.