സായി പല്ലവി തമിഴിലും തെലുങ്കിലുമൊക്കെ തിളങ്ങി നിൽക്കുകയാണ്. ഇതിൽ സഹ താരങ്ങൾക്ക് അല്പം അസൂയയുമുണ്ട്. സായി പല്ലവിയെ പോലെ തിളങ്ങുന്ന നടിയാണ് രാകുൽ പ്രീത്. കാർത്തിയുടെ ‘തീരൻ അധികാരം ഒൻട്രു’ എന്ന ചിത്രത്തിലെ നടിയുടെ അഭിനയം ഏറെ ശ്രദ്ധനേടുകയും ചെയ്തു. ഈ സിനിമയുടെ വലിയ വിജയത്തോടെ കോളിവുഡിൽ നിന്നും നിരവധി അവസരങ്ങളാണ് രാകുലിനെ തേടിയെത്തുന്നത്. തമിഴ് സൂപ്പർതാരം സൂര്യയുടെ നായികയായി അഭിനയിക്കാനും രാകുലിന് ഭാഗ്യം ലഭിച്ചിരിക്കുകയാണ്. എന്നാൽ സായി പല്ലവിയുടെ വരവോടെ രാകുലിന്റെ പ്രതീക്ഷയാകെ തകിടം മറിഞ്ഞു.

സെൽവരാഘവൻ സംവിധാനം ചെയുന്ന നടൻ സൂര്യയുടെ മുപ്പത്തി ആറാമത്തെ ചിത്രത്തിൽ നായികയായി ആദ്യം പരിഗണിച്ചത് രാകുലിനെയായിരുന്നു. സിനിമയിൽ രണ്ടുനായികാകഥാപാത്രങ്ങളാണുള്ളത്. രണ്ടുപേർക്കും തുല്യപ്രാധാന്യമല്ല. അതാണ് പ്രശ്നം .

എന്നാൽ സംവിധായകൻ പിന്നീട സായി പല്ലവിയെ നായികയായി തീരുമാനിക്കുകയും രാകുലിന് രണ്ടാം നായികയുടെ വേഷം നൽകുകയുമായിരുന്നു. ഇതോടെ രാകുലിന് ആകെ വിഷമമായി. തന്റെ വേഷം സായി പല്ലവി കാരണം ഒതുങ്ങിപ്പോകുമോ എന്ന ഭയമാണ് നടിക്ക് ഇപ്പോൾ.

തന്നെ സെക്കന്റ് ഹീറോയിൻ ആക്കുകയാണെങ്കിൽ താൻ ഈ സിനിമയിൽ നിന്ന് ഇറങ്ങി പോകുമെന്നും, ഒരു ഡമ്മി നടി ആയി അഭിനയിക്കാൻ താല്പര്യമില്ലെന്നും രാകുൽ പറഞ്ഞെന്നാണ് കോളിവുഡിൽ നിന്നുള്ള സംസാരം. താൻ ഇനി പ്രധാന വേഷങ്ങൾ മാത്രമേ ചെയ്യുള്ളു എന്നും സെക്കന്റ് ഹെറോയിൻ ആയി അഭിനയിക്കയില്ലെന്നും മുമ്പ് പല അഭിമുഖങ്ങളിലും നടി വ്യക്തമാക്കിയിരുന്നു.

ഇതിനിടെ രാകുൽ നായികയായി എത്തിയ ബോളിവുഡ് ചിത്രം അയ്യാരി ബോക്സ്ഓഫീസിൽ തകർന്നടിഞ്ഞു. മഹേഷ് ബാബുവിന്റെ നായികയായി എത്തിയ സ്പൈഡറും പരാജയമായിരുന്നു. അജയ് ദേവ്ഗണിനൊപ്പം ഹിന്ദിചിത്രം, കാർത്തി–രജത് ചിത്രം, ശിവകാര്‍ത്തികേയൻ ചിത്രം എന്നിവയാണ് രാകുലിന്റെ പുതിയ പ്രോജക്ടുകൾ.