സ്റ്റൈല്‍ മന്നന്‍ രജനീകാന്തിന്‍റെ പുതിയ ചിത്രം 'കാല'യുടെ ടീസര്‍ യൂട്യൂബില്‍ ട്രെന്‍ഡിങ് ആയി ഒന്നാം സ്ഥാനത്തെത്തി നില്‍ക്കുകയാണ്. അതേസമയം, ടീസറിന് ലഭിച്ച ഡിസ് ലൈകുകളും ചര്‍ച്ചയാകുന്നു. 33000 ഡിസ് ലൈകുകളോടൊപ്പം 284000 ലൈകുകളും ടീസറിന് ലഭിച്ചു. 54 ലക്ഷത്തിന് മുകളില്‍ കാണികളും ടീസര്‍ കണ്ടു കഴിഞ്ഞു.

ടീസറിന് ലഭിക്കുന്ന ഡിസ് ലൈകുകളെല്ലാം ജാതീയത ഇപ്പോഴും നിലനില്‍ക്കുന്നതിന്‍റെ തെളിവാണെന്നും അംബേദ്ക്കറുടെ ആശയങ്ങള്‍ പിന്‍പറ്റുന്ന താഴ്ന്ന ജാതിക്കാരനായ സംവിധായകന്‍ പാ രഞ്ജിത്ത് ചെയ്യുന്ന ചിത്രമായതിനാലാണ് ഇതെന്നും ചൂണ്ടിക്കാട്ടി ചിലര്‍ സോഷ്യല്‍ മീഡിയയില്‍ രംഗത്തുവന്നു.

കബാലിയെ പോലെ കാലയും ദലിത് രാഷ്ട്രീയം പ്രമേയമാ‍യിട്ടാണ് വരുന്നത്. കറുപ്പ് ഷര്‍ട്ടും കറുപ്പ് മുണ്ടുമാണ് കരികാലന്‍റെ വേഷം. വെളുത്ത വസ്ത്രം ധരിച്ച നാന പടേക്കറിന്‍റെ കഥാപാത്രം പറയുന്നത് തനിക്ക് ഈ രാജ്യം വൃത്തിയും ശുദ്ധിയുമുള്ളതാക്കണമെന്നാണ്. കറുപ്പ് തൊഴിലാളിവര്‍ഗത്തിന്‍റെ നിറമാണ്. എന്‍റെ കോളനിയില്‍ വന്ന് നോക്ക് ചെളിയും പൊടിയുമെല്ലാം മഴവില്ല് പോലെ കാണാമെന്നാണ് ഇതിന് കാലയുടെ മറുപടി.

ഹുമ ഖുറേഷി, അഞ്ജലി പാട്ടില്‍, സമുദ്രകനി, പങ്കജ് ത്രിപതി എന്നിവരും ചിത്രത്തില്‍ അഭിനയിക്കുന്നുണ്ട്. വണ്ടര്‍ബാര്‍ ഫിലിംസിന്‍റെ ബാനറില്‍ ധനുഷ് ആണ് നിര്‍മാണം. കരികാലന്‍ എന്നാണ് സിനിമയുടെ ടാഗ്ലൈന്‍. ബോംബൈ അധോലോക നായകന്‍റെ കഥാപാത്രത്തെയാണ് രജനി അവതരിപ്പിക്കുന്നത്. ചിത്രം ഹാജി മസ്താന്‍റെ ജീവിതമാണെന്ന് ചൂണ്ടിക്കാട്ടി വിവാദങ്ങള്‍ ഉണ്ടായെങ്കിലും അണിയറ പ്രവര്‍ത്തകര്‍ അക്കാര്യം നിഷേധിക്കുകയായിരുന്നു.സംഗീതം സന്തോഷ് നാരായണന്‍, എഡിറ്റിങ് ശ്രീകര്‍ പ്രസാദ്. സ്റ്റണ്ട് ദിലിപ് സുബ്രഹ്മണ്യന്‍. ഏപ്രില്‍ 27നു ചിത്രം റിലീസ് ചെയ്യും.

വീഡിയോ കാണൂ