കലകലപ്പ് 2വിന്റെ റിലീസിന് മുന്നോടിയായി നടന്ന പത്രസമ്മേളനത്തില്‍ കാതറിന്‍ തെരേസയെ കളിയാക്കി നടന്‍ റോബോ ഷങ്കര്‍. പരിപാടിക്കിടെ ചിത്രത്തിനെക്കുറിച്ച് നടി കാതറിന്‍ സംസാരിച്ച് തുടങ്ങിയതോടെ വേദിയിലിരുന്ന നടനും കോമഡി താരവുമായ റോബോ ഷങ്കര്‍ തല ചൊറിയാന്‍ തുടങ്ങി. മുഴുനീള ഇംഗ്ലീഷ് പ്രസംഗമായിരുന്നു അത്. നടി പറഞ്ഞ പല കാര്യങ്ങളും ഷങ്കറിന് മനസ്സിലായില്ല.

അടുത്തിരുന്ന നടന്‍ ജീവയോട് എന്താണ് ഇവര്‍ സംസാരിക്കുന്നത്, ഒന്നും മനസ്സിലാകുന്നില്ലല്ലോ എന്ന് തമാശ രൂപത്തില്‍ പരാതിപ്പെട്ടു. അല്‍പസമയം കഴിഞ്ഞ് ജീവ തന്റെ മൊബൈലില്‍ റോബോ ഷങ്കറിന്റെ മുഖ ഭാവങ്ങള്‍ പകര്‍ത്തി. ഇംഗ്ലീഷ് പ്രസംഗം കേട്ട തന്റെ വികാരം എന്താണെന്ന് കൃത്യമായി തന്നെ ജീവയുടെ മൊബൈലിന് മുന്നില്‍ താരം അവതരിപ്പിച്ചു.

വീഡിയോ പകര്‍ത്തിയ ശേഷം തൊട്ടടുത്ത് ഇരുന്ന നടി നിക്കി ഗല്‍റാണിക്കും സംവിധായകന്‍ സുന്ദര്‍ സിയ്ക്കും കാണിച്ചുകൊടുത്തു. വീഡിയോ കണ്ട എല്ലാവരും ചിരിച്ചു. പ്രസംഗത്തിനിടെ സമീപത്തു നിന്നും വന്ന പൊട്ടിച്ചിരി കാതറിനും ശ്രദ്ധിച്ചു. അവരെന്തോ വീഡിയോ കണ്ട് ചിരിക്കുകയാണെന്ന് കാതറിന്‍ പ്രസംഗത്തിനിടെ പറഞ്ഞു. സംഭവം എന്താണന്ന് അറിഞ്ഞില്ലെങ്കിലും നടി അതൊന്നും ശ്രദ്ധിക്കാതെ പ്രസംഗം പൂര്‍ത്തീകരിച്ചു. കാതറിന്‍ തെരേസ, നിക്കി ഗല്‍റാണി, മിര്‍ച്ചി ശിവ, ജയ്, ജീവ എന്നിവരെ പ്രധാന കഥാപാത്രങ്ങളാക്കി സുന്ദര്‍ സി ഒരുക്കിയ ചിത്രമാണ് കലകലപ്പ് 2. 2012 ല്‍ പുറത്തിറങ്ങിയ ചിത്രത്തിന്റെ രണ്ടാം ഭാഗമാണിത്.