ആരോഗ്യ വകുപ്പില്‍ സൃഷ്ടിച്ച 3000 ത്തോളം തസ്തികകള്‍ക്ക് എന്തു സംഭവിച്ചു... അഞ്ചുമാസത്തിന് ശേഷവും പി.എസ്.സി റാങ്ക് ലിസ്റ്റില്‍ നിന്നും ഒരു നിയമനം പോലും നടന്നില്ല; സര്‍ക്കാരിന്റെ കൊടും ചതി; മന്ത്രിസഭാ പ്രഖ്യാപനം വെറും തിരഞ്ഞെടുപ്പ് പ്രചരണമോ? വീണ്ടും കരാര്‍, കണ്‍സെള്‍ട്ടെന്‍സി നിയമനങ്ങള്‍ക്ക് കളം ഒരുങ്ങുന്നു
ഒന്നാം പിണറായി സര്‍ക്കാരിന്റെ മന്ത്രിസഭയുടെ അവസാനത്തെ യോഗത്തിലാണ് ആരോഗ്യ വകുപ്പില്‍ 3000 ത്തോളം തസ്തികകള്‍ സൃഷ്ടിക്കുമെന്ന തീരുമാനത്തിന് അംഗീകാരം ലഭിക്കുന്നത്. ഒപ്പം എല്ലാ റാങ്ക് ലിസ്റ്റുകളും ഈ വര്‍ഷം ഓഗസ്റ്റ് മൂന്നു വരെ നീട്ടുകയും ചെയ്തു. അന്നത്തെ പി.എസ്.സി സമരങ്ങളെ തണുപ്പിച്ച ജനപ്രീയ പ്രഖ്യാപനമായിരുന്നു അത്. ആരോഗ്യവകുപ്പില്‍ ഇത്രയധികം തസ്തികകള്‍ സൃഷ്ടിച്ച ഒന്നാം പിണറായി സര്‍ക്കാരിന്റെ തീരുമാനത്തെ ചരിത്രപരമായ തീരുമാനമെന്നാണ് അന്ന് ആരോഗ്യമന്ത്രിയായിരുന്ന കെ.കെ ശൈലജ ഫേസ്ബുക്കില്‍ കുറിച്ചത്.
എന്നാല്‍ ഈ പ്രഖ്യാപനത്തിലൂടെ തുടര്‍ഭരണം കിട്ടി അഞ്ചുമാസം പിന്നിട്ട ശേഷവും ഇതില്‍ എന്തു നടപടിയാണ് സര്‍ക്കാര്‍ എടുത്തത് എന്നും പരിശോധിച്ചാല്‍ വീണ്ടും പിണറായി സര്‍ക്കാരിന്റെ ചതി തന്നെയാണ് ഇവിടെ തുറന്ന് കാട്ടപ്പെടുന്നത്. പ്രഖ്യാപനം ഇപ്പോഴും കടലാസില്‍ മാത്രമായി തുടരുകയാണ്. ഇതില്‍മേല്‍ ഒരു നടപടിയും സര്‍ക്കാര്‍ എടുത്തിട്ടില്ല. ഈ സ്ഥിതിലാണ് പോകുന്നതെങ്കില്‍ ഓഗസ്റ്റ് മൂന്നിന് നിലവിലെ റാങ്ക് ലിസ്റ്റുകളുടെ കലാവധി അവസാനിക്കുകയും ഇപ്പോള്‍ റാങ്ക് ലിസ്റ്റിലുള്ള ആര്‍ക്കും ഇതിന്റെ പ്രയോജനം ലഭിക്കുകയുമില്ല.
അങ്ങനെ എങ്കില്‍ പി.എസ്.സിക്ക് വിടാതെ ഈ തസ്തികകളില്‍ കരാര്‍ നിയമനം നടത്തി ഇഷ്ടക്കാരെ നിയമിക്കാനാണ് സാധ്യത. ഈ സാഹചര്യത്തില്‍ സര്‍ക്കാരിന്റെ പ്രഖ്യാപനം വെറും തിരഞ്ഞെടുപ്പ് പ്രചാരണമാണെന്ന ആരോപണവും ഉയരുകയാണ്. ''സര്‍ക്കാര്‍ ഉദ്യോഗസ്ഥരുടെ മുന്നിലുള്ള ഫയലുകള്‍ ഓരോന്നും ഒരു ജീവിതമാണ്'' എന്നാണ് മുഖ്യമന്ത്രി പോലും പറയുന്നത്. എന്നാല്‍ സര്‍ക്കാര്‍ ഇതു കണ്ടിട്ടും കണ്ടില്ലെന്ന് നടിക്കുകയാമെന്ന് പി.എസ്.സി റാങ്ക് ഹോള്‍ഡേഴ്‌സ് ആരോപിക്കുന്നു.
സര്‍ക്കാരിന്റെ ഈ നിലപാട് വീണ്ടും പി.എസ്.സി റാങ്ക് ഹോള്‍ഡേഴ്‌സിനെ സമരത്തിലേക്ക് തള്ളി വിടുമെന്ന കാര്യത്തില്‍ സംശയമില്ല. കഴിഞ്ഞ തവണത്തെ പോലെ കരാര്‍ നിയമനങ്ങളും കണ്‍സെള്‍ട്ടെന്‍സി നിയമനങ്ങളും നടത്തി ഇഷ്ടക്കാരെ നിയമിക്കാനാണ് സര്‍ക്കാര്‍ തയ്യാറെടുക്കുന്നതെന്ന് റാങ്ക് ഹോള്‍ഡേഴ്‌സ് ആരോപിക്കുന്നു. ഒരു സര്‍ക്കാര്‍ ജോലി എന്ന സ്വപ്‌നവുമായി വര്‍ഷങ്ങളായി കഠിനാധ്വാനം നടത്തുന്ന ഉദ്യോഗാര്‍ത്ഥികളെ വഞ്ചിക്കാന്‍ സര്‍ക്കാര്‍ കൂട്ടുനില്‍ക്കരുത് എന്നും അവര്‍ ആവശ്യപ്പെടുന്നു.
https://www.facebook.com/Malayalivartha
